ಸಂಪಾದಕೀಯ್:
ಉದ್ಕಾಚಿ ವಿಜ್ಮಿತ್ಕಾಯ್ ಆನಿ ನೆಂಟೆ ಮತಿಚಿಂ ಸವಾಲಾಂ
ಉದ್ಕಾಚೆ ವಿಜ್ಮಿತ್ಕಾಯೆವಿಶಿಂ, ಆಜ್ಯಾಪಾಂ ವಿಶಿಂ ವಿಲ್ಮಾ ಬಂಟ್ವಾಳಾನ್ ಮುಗ್ದಪಣಾನ್ ತರೀ ಸೊಬಿತ್ ಕರುನ್ ಏಕ್ ಕವಿತಾ ಬರಯ್ಲ್ಯಾ. ಉದಕ್ ಮೊಡಾಂ ರುಪಾರ್ ವಯ್ರ್ ಕಶೆಂ ಆಸ್ತಾ? ತಾಕಾ ಕಿತ್ಯಾಕ್ ಬಣ್ ನಾ? ಪರ್ಮಳ್ ಕಿತ್ಯಾಕ್ ನಾ? ಭರೊನ್ ಘೆತಲ್ಲ್ಯಾ ಆಯ್ದಾನಾಚೆಂ ತಾಚೆಂ ರೂಪ್ ಕಶೆಂ? ಹಿಂ ಆನಿ ಜಾಯ್ತಿಂ ಹೆರ್ ಸವಾಲಾಂ ಜಿಂ ಚಡಿತ್ ಕರುನ್ ಭುರ್ಗ್ಯಾಂಚಿಂ ಆಸ್ತಾತ್ ತಿಂ ಹೆ ಕವಿತೆಂತ್ ಕವಯಿತ್ರಿ ವಿಚಾರ್ತಾ.
ವಿಲ್ಮಾ ಬಂಟ್ವಾಳಾನ್ ಕಾಂಯ್ ವರ್ಸಾ ಆದಿಂ ‘ರಾಕ್ಣೊ' ಪತ್ರಾರ್ ಪರ್ಗಟ್ ಕೆಲ್ಲಿ ಕವಿತಾ ಹಿ ಹಾಂಗಾಸರ್ ಆಮಿ ವಿಂಚ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಾಪ್ ಸೊದ್ತಾನಾ
ಉದಕ್ ಕಶೆಂ ವಯ್ರ್ ರಾವ್ತಾ?
ಹಾಂಗಾಥಾವ್ನ್ ಕಶೆಂ ವಯ್ರ್ ವೆತಾ?
ಉದ್ಕಾಕ್ ಕಿತ್ಯಾಕ್ ಬಣ್ ನಾ?
ಪರ್ಮಳ್, ಆಕಾರ್ ನಾ?
ವೊತಲ್ಲ್ಯಾಕಡೆಂ ಆಯ್ದಾನಾಚೆಂ ರೂಪ್ ಘೆತಾ
ತಾಕಾ ಕಿತೆಂ ಸ್ವಾಭಿಮಾನ್ ನಾ?
ಪುಣ್ ತಾಚೆಂ ಬಳ್ ತರಿ ಕಿತೆಂ!
ಹಜಾರಾಂಕ್ ಖಿಣಾನ್ ಬುಡಯ್ತಾ
ತಾಚಿ ಮಹಿಮಾ ತರಿ ಕಸಲಿ!
ತಾಚ್ಯಾ ಥೆಂಬ್ಯಾಕೀ ಹಾಕ್‍ಬೊಬ್ ಮಾರ್ತಾತ್
ಉದ್ಕಾ ತುಂಚ್ ಏಕ್ ವಿಜ್ಮಿತ್
ವಾರ್ಯಾಂತಯ್ ಮಿಸ್ಳೊನ್ ಆಸಾಯ್ ಖಂಯ್
ಆನಿ ತೊ ಗಡ್ ನಾತಲ್ಲೊ ಸಾಗೊರ್
ಹಾ ಆಟಾಪುಂಕ್ ಜಾಯ್ನಾ ತಸಲೊ
ಸವಾಲಾಂಚೊ ಪುಂಜೊ ತುಂ ಮಾಣ್ಕುಲ್ಯಾಂಕ್
ಸವಾಲಾಂಕ್ ಜಬಾವಿ ಮೆಳ್ಳ್ಯೊನಾಂತ್ ಮ್ಹಣೊನ್
ಕೊಣೀ ಜಲ್ಮಾಥಾವ್ನ್ ಉದಕ್ ಪಿಯೆನಾಸ್ತಾಂ ರಾವ್ಲ್ಯಾಂತ್?
ಹಾಂವಯ್ ತಶೆಂಚ್
ಗ್ಯಾನಾಚ್ಯಾ ಸಂಸಾರಾಂತ್ ಆಜೂನ್ ಮಾಣ್ಕುಲಿಂ
ಜವಾಬಿಂಕ್ ರಾಕನಾಸ್ತಾಂ ಮ್ಹಜ್ಯಾ ಆಯ್ದಾನಾಂತ್
ಉದಕ್ ಭರ್ನ್ ಘೆತಾಂ
ಮ್ಹಜ್ಯಾ ಆಯ್ದಾನಾಚೆಂ ರೂಪ್ ತಾಕಾ
ತುಮ್ಚ್ಯಾ ತುಮ್ಚ್ಯಾ ಆಯ್ದಾನಾಚೆಂ ರೂಪ್
ತುಮ್ಚ್ಯಾ ತುಮ್ಚ್ಯಾ ಉದ್ಕಾಕ್
ಪುಣ್ ಉದಕ್ ತೆಂ ಏಕಚ್
ತುಕಾ ಉದ್ಕಾ ಸಾರ್ಕೆಂ ಮನ್ ಆಸಾ ತರ್
ತಾಂಬ್ಲೆರಾಂತಯ್ ದರ್ಯೊ ದೆಖ್ಯೆತ್!
-ವಿಲ್ಮಾ ಬಂಟ್ವಾಳ್
संपादकीय:
उदकाची विज्मित्काय आनी नेंटे मतिचीं सवालां
उदकाचे विज्मित्कायेविशीं, आज्यापां विशीं विल्मा बंटवाळान मुगदपणान तरी सोबित करुन एक कविता बरयल्या. उदक मोडां रुपार वयर कशें आस्ता? ताका कित्याक बण ना? पर्मळ कित्याक ना? भरोन घेतल्ल्या आयदानाचें ताचें रूप कशें? हीं आनी जायतीं हेर सवालां जीं चडित करुन भुर्ग्यांचीं आस्तात तीं हे कवितेंत कवयित्री विचार्ता.
विल्मा बंटवाळान कांय वर्सा आदीं ‘राकणो' पत्रार पर्गट केल्ली कविता ही हांगासर आमी विंचल्या.
-मेलविन रोडरिगस
कविता:
जाप सोदताना
उदक कशें वयर रावता?
हांगाथावन कशें वयर वेता?
उदकाक कित्याक बण ना?
पर्मळ, आकार ना?
वोतल्ल्याकडें आयदानाचें रूप घेता
ताका कितें स्वाभिमान ना?
पुण ताचें बळ तरी कितें!
हजारांक खिणान बुडयता
ताची महिमा तरी कसली!
ताच्या थेंबयाकी हाकबोब मार्तात
उदका तुंच एक विज्मित
वार्यांतय मिसळोन आसाय खंय
आनी तो गड नातल्लो सागोर
हा आटापुंक जायना तसलो
सवालांचो पुंजो तूं माणकुल्यांक
सवालांक जबावी मेळ्ळ्योनांत म्हणोन
कोणी जल्माथावन उदक पियेनास्तां रावल्यांत?
हांवय तशेंच
ग्यानाच्या संसारांत आजून माणकुलीं
जवाबिंक राकनास्तां म्हज्या आयदानांत
उदक भरन घेतां
म्हज्या आयदानाचें रूप ताका
तुमच्या तुमच्या आयदानाचें रूप
तुमच्या तुमच्या उदकाक
पुण उदक तें एकच
तुका उदका सार्कें मन आसा तर
तांबलेरांतय दर्यो देख्येत!
-विल्मा बंटवाळ