ಸಂಪಾದಕೀಯ್:
ದಿಸನಾತ್ಲೆ ಸಕ್ತೆನ್ ಬರಯಿಲ್ಲಿ ಕವಿತಾ
ಹರ್ಯೆಕ್ಲ್ಯಾಚೆಂ ಜಿವಿತ್ ಏಕ್ ಕವಿತ್. ಹೆಂ ಕವಿತ್ ಎಕ್ಲೊ ಕವಿ ಬರಯ್ತಾ. ಕೊಣ್ ಹೊ ಕವಿ? ಹಾಂಗಾಸರ್ ಹೆ ಕವಿತೆಂತ್ ಹೊ ಕವಿ ಕೊಣ್ ಮ್ಹಣೊನ್ ಸಾಂಗೊಂಕ್ ನಾ. ಪುಣ್ ದುಸ್ರ್ಯಾ ಕಡ್ವ್ಯಾಂತ್ ಖಾವ್ಣೆರ್ ನಿದಲ್ಲೆಂ ಚಿತ್ರಣ್, ಶಿಮ್ಟಿ ನೆಕೆತ್ರ್, ಬಾಳೊಕ್ ಜೆಜುಚೊ ಉಡಾಸ್ - ಹೊ ಕವಿ ದುಸ್ರೊ ಕೊಣಯ್ ನ್ಹಯ್, ಬಗರ್ ದೇವ್ ಮ್ಹಳ್ಳ್ಯಾ ಚಿಂತ್ಪಾಕ್ ಚಡಿತ್ ಬಳ್ವಂತ್ ಕರ್ತಾತ್.
ಹೆ ಕವಿತೆಂತ್ ಜಿವಿತಾಚೆ ವೆವೆಗ್ಳೆ ಪಾಂವ್ಡೆ ಚಿತ್ರಿತ್ ಜಾಲ್ಯಾತ್. ಸೊಭಿತ್ ಉತ್ರಾಂನಿ ಹೆ ಪಾಂವ್ಡೆ ಸಾದರ್ ಜಾಲ್ಯಾತ್. ಉತ್ರಾಂಚೆಂ ಗುಂತಪ್ ಸುಂದರ್ ರಿತಿನ್ ಆಯಿಲ್ಲ್ಯಾನ್, ವಾಚ್ತಾನಾ ಖುಶಿ ಜಾತಾ.
ಹಿ ಕವಿತಾ ಫಕತ್ ವಿವರಾತ್ಮಕ್ ಜಾವ್ನ್ ಉರ್ಲ್ಯಾ. ಬರಯಿಲ್ಲೆ ಶೈಲಿಕ್ ಆನಿ ವಿಂಚ್ಲಲ್ಯಾ ಉತ್ರಾಂಕ್ ಹಿ ಕವಿತಾ ಬರಿ ಲಾಗ್ತಾ ತರೀ, ಠರಾವಣ್ ವಿಶೇಸ್ ಆಕರ್ಶಣಾಚಿ ಮ್ಹಣ್ ಸಾಂಗೊಂಕ್ ಜಾಯ್ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸುಂದರ್ ಕವನ್
ದಿಸನಾತ್ಲಿ ಲಿಖ್ಣಿ ತಾಚಿ ಮೀತ್ ಮೇರ್ ನಾತ್ಲಿ ಜಾಣ್ವಾಯ್ ತಾಚಿ,
ವಾಂಕ್ಡೆಂ ತಿಂಕ್ಡೆಂ ಘುಂವ್ಡಾವ್ನ್ ಬರೊಂವ್ಕ್ ಗೂಂಡ್ ಸತಾಂ ಜಿವಿತಾಚಿಂ,
ಹರ್ಯೆಕ್ ಘಡಿ ರಂಗಾಳ್ ತಿಂತಾನ್ ತ್ಯಾಚ್ ಹಾತಾಂನಿ ಪಿಂತ್ರಾಯಿಲ್ಲೆಂ.
ಮ್ಹಜೆಂ ಜೀವನ್ ಏಕ್ ಸುಂದರ್ ಕವನ್ ತ್ಯಾಚ್ ಕವಿನ್ ತೆಂ ಬರಯಿಲ್ಲೆಂ
ಬಾಳ್ಪಣ್ ಮ್ಹಜೆಂ ಅತೀ ಸುಂದರ್, ಖಂಯ್ಚ್ಯಾಯ್ ಫುಲಾಕ್ ಸರಿ ನಾತ್ಲೆಂ.
ಆವಯ್ಕ್ ಮೊರ್ನಾನ್ ವೆಲ್ಲೆಂ, ಬಾಪಾಯ್ಕ್ ಮಾವ್ಶೆನ್ ವೆಂಗ್‌ಲ್ಲೆಂ
ಶಿಕಪ್ ಸಗ್ಳೆಂ ಪಿಡ್ಡ್ಯಾರ್ ಜಾಲ್ಲೆಂ, ಜಿಣಿಯೆ ಪಾಲ್ಕಾರ್ ಸವಾಲ್ ಸದಾಂ
ಕಿತೆಂ ಕರುಂ?
ಗಾದೆ ಕೊಸ್ಲೆ, ಸಾರೆಂ ವ್ಹಾವಯ್ಲೆಂ ಕಾಜ್ರ್ಯಾ ಬೊಡಿಯೆಚೆ ಪ್ರಹಾರ್ ಸೊಸ್ಲೆ
ನಿದೊಂಕ್ ಖಾವ್ಣಿ ಸಾಂಗಾತ್ ರೆಡ್ಯಾಂಚೊ ಕಾಡ್ತಾಂ ಉಗ್ಡಾಸ್ ಬಾಳ್ಕಾ ಜೆಜುಚೊ
ತೆಂಚ್ ನೆಕೆತ್ರ್ ಮುಖಾರ್ ದಿಸ್ಲೆಂ. ಪ್ರಕಾಶಿತ್ ಜಾಲೆಂ ಜೀವನ್ ಮ್ಹಜೆಂ
ತೆಂಚ್ ತೆಂ ಸುಂದರ್ ಕವನ್, ತ್ಯಾಚ್ ಕವಿನ್ ತೆಂ ಬರಯಿಲ್ಲೆಂ
ತರ್ನಾಟ್ ಪಣ್ ಏಕ್ ರಂಗೀನ್ ವ್ಹಾಳೊ, ಬರ್ಫೂರ್ ಬೇಂಡಾ ನಾದಾನ್ ಭರೊನ್
ಸಂಸಾರ್ ಸಗ್ಳೊ ಹಾತಿಂ ಯೆತಾಂ, ಮ್ಹಜೆಚ್ ಶಾತೆಕ್ ತೃಪ್ತಿ ಪಾವೊನ್
ತರೀ ಮುಖಾರ್ ಸವಾಲ್ ಉಬೆಂ
ಕೋಣ್ ಮ್ಹಜೆಂ?
ನಾ ಕೋಣ್ ಠರಾಂವ್ಕ್, ನಾ ಕೋಣ್ ಥಿರಾಂವ್ಕ್ , ಸಂಗಿಂ ಜಿಯೆವ್ನ್ ಮ್ಹಾಕಾ ಆಪ್ಣಾಂವ್ಕ್
ಸವಾಲ್ ಮ್ಹಾಕಾಚ್ ವಿಚಾರ್ನ್ ಆಸ್ತಾಂ ಭಿಜೊನ್ ಗೆಲೆ ಸುಕೆ ನಯನ್
ಮನಾಂತ್ ದಿಸ್ಲಲೆಂ ಜಿಣಿಯೆ ಸಪಣ್ ಧುಂವ್ರೆ ದೊಂಗ್ರಾಂತ್ ಅದೃಶ್ ಜಾಲೆಂ.
ಇತ್ಲೆಂ ಸುಂದರ್ ಜಿಣ್ಯೆ ಕಥನ್, ತ್ಯಾಚ್ ಕವಿನ್ ತೆಂ ಬರಯಿಲ್ಲೆಂ.
ಗುಡೆ ದೊಂಗೊರ್ ರಾನಾ ಶೆತಾಂ, ಗಾದೆ ನಂಯೊಂ ಪುಲಾ-ತೊಟಾಂ
ಖಂಯಿಂಚ್ ಪೆಟ್ಲಿಂ ನಾಂತ್ ಮೊಗಾ ಕಿಟಾಂ
ವಾಲಿಚೊ ಏಕ್ ಆಧಾರ್ ಘೆವುನ್, ಚಡೊನ್ ಮುಕಾರ್ ವೆತಾಂ ವೆತಾಂ
ಮೊಡ್ಲೊ ಫಾಂಟೊ ತುಟ್ಲಿ ವಾಲ್ ನೆಗಾರ್ ಜಾಲಿಂ ಫುಟ್ಕರ್ ಮೆಟಾಂ
ಅಸ್ಕತ್ ಸೈಂಭಾರ್ ಪರತ್ ಸವಾಲ್
ಕಿತ್ಯಾಕ್ ಅಶೆಂ?
ಬಳಿಷ್ಟ್ ಲಿಖ್ಣೆ ಥಾವುನ್ ಉದೆಲ್ಲೆಂ ಅಸ್ಲೆಂ ಚಿತ್ರಣ್ ಕೋಣ್ ಪಿಂತ್ರಾಯ್ತ್?
ತಿದ್ವಣ್ ನಾತ್ಲೆಂ ಅಸ್ಲೆಂ ಕಥನ್ ಪರತ್ ತಿದ್ವುನ್ ಕೋಣ್ ಬರಯಿತ್?
ಬದ್ಲಾವಣೆಕ್ ಅಸಾಧ್ಯ್ ಜಾಲ್ಲೆಂ ಅಧುರ್‌ಪಣ್ ಏಕ್ ವಿಣ್ಗೆಂಚ್ ಉರ್ಲೆಂ
ಸಬ್ದಾಂ ಸಂಗಿಂ ಗೊಂದೊಳ್ ಭರ್ಸೊನ್ ನಿರೂಪಣ್ ನಿರರ್ಥಕ್ ಜಾಲೆಂ
ತಿತ್ಲೆಂಯಿ ಸುಂದರ್ ಜೀವನ್ ಮ್ಹಜೆಂ, ತೆಂಚ್ ತೆಂ ಸುಂದರ್ ಕವನ್
ತ್ಯಾಚ್ ಕವಿನ್ ತೆಂ ಬರಯಿಲ್ಲೆಂ.
-ಶಿಕೇರಾಮ್, ಸುರತ್ಕಲ್.