ಸಂಪಾದಕೀಯ್:
ಸಮಾಜಾಚೊ ಖಂತ್, ಹುಸ್ಕೊ ಆಸಲ್ಲ್ಯಾಂಕ್ ಸವಾಲಾಂ ಘಾಲ್ಚಿ ತಾಂಕ್ ಆಸ್ತಾ
ಏಕ್ ದಾಂತ್ ಗೆಲ್ಯಾರ್ ಸಗ್ಳೆ ದಾಂತ್ ಕಾಡುನ್ ಸೆಟ್ಟ್ ಬಸಯ್ಲ್ಯಾರ್ ಜಾತಾ? ಪಾಕ್ಯಾಚೆಂ ಏಕ್ ರೀಪ್ ಯಾ ಪಕ್ಕಾಸ್ ಸುರೆಲ್ಯಾರ್, ದುಡು ಆಸಾ ಮ್ಹಣೊನ್, ಸಗ್ಳೆಂಚ್ ಕಾಡುನ್ ನವೆಂ ಕರುಂಕ್ ವೆಚೆಂ ಕಿತ್ಲೆಂ ಸಾರ್ಕೆಂ?
ಹ್ಯಾ ಎಕಾ ವಿಷಯಾಚೆರ್ ಡೇವಿಡ್ ಡಿಸೋಜಾನ್ ಕವಿತಾ ಲಿಖ್ಲ್ಯಾ. ಸವಾಲ್ ಘಾಲಾಂ. ಸಮಾಜಾಚೊ ಖಂತ್, ಹುಸ್ಕೊ ಆಸಲ್ಲ್ಯಾಂಕ್ ಸವಾಲಾಂ ಘಾಲ್ಚಿ ತಾಂಕ್ ಆಸ್ತಾ. ಹೆರಾಂಕ್ ತಿ ಆಸನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾಕೆಂ ಆನಿ ದಾಂತ್
ಖರ್ಕಟ್ಯಾ ವೊತಾ ಉಪ್ರಾಂತ್ಲೊ
ಧಣ್ಸಣಿ ಪಾವ್ಸ್
ಥಂಡಿಯೆ ಆಂಕುಡ್ಣಾಯ್ ಜರೊಂವ್ಚೊ
ಭುಂಯ್ ಆನಿ ಅಂತ್ರಳಾ ಮಧ್ಲೆಂ
ಪಾಕೆಂ ಥಕ್ಲೆಂ
ಅಸ್ಕತ್ ರಿಪಾಂ ಪಕ್ಕಾಸ್ ಕಿಡಿ ಕಿಟಾಂಕ್ ಕಾಮಾಸಾಳ್
ಕೊಡ್ಶೆಂ, ಗೊಡ್ಶೆಂ, ಆಮ್ಶೆಂ, ಮಿಟ್ಶೆಂ ಆನಿ ತಿಕ್ಶೆಂ
ಲೆಂವೊನ್ ಚಿಂವೊನ್ ಆನಿ ಚಾಬೊನ್
ವೊಂಟಾಂ, ಗಾಲಾಂ ಆನಿ ಜಿಬೆ ಮದ್ಲೆ ದಾಂತ್
ಥಕ್ಲೆ, ಅಡ್ಚಲೆ, ಯೆರೆಲೆ ಆನಿ ಸುರ್‍ಯೆಲೆ
ದಾಂತಾ ದಾಕ್ತೆರಾಚ್ಯಾ
ಇರ್ನೆ, ಮೊಡ್ತೆಲ್ ಆನಿ ಸಿಮಿಟಿಕ್ ಆಯ್ತೆ ಜಾಲೆ
ದೆವಾಳಾ ಭೊಂವಾರಾ ಭಿತರ್‍ಲೆ ಸಂಘ ಹುದ್ದೆದಾರ್
ವಾವ್ರಾ ಉರ್ಬೆನ್ ಭರೊನ್ ಆಸ್ತಾಂ
ದುಬ್ಳ್ಯಾಚ್ಯಾ ಮೊಡ್ಕರ್ ಪಾಕ್ಯಾಚಿ ಖಬರ್
ವಾರ್‍ಯಾ ಸಂಗಿಂ ಕಾನಿಂ ಪಾವ್ಲಿ
ಆಮಿ ಆಸಾಂವ್, ಸಗ್ಳೆಂ ನವೆಂಚ್ ಬಸಯ್ತಾಂವ್
ಥೊಡೆ ಮಿಲಾವಾ ಸಾಂಗ್ಡೆ ಬೆರ್ಸೊಲ್, ಪಕ್ಕಾಸ್ ಥಟಾಕ್ಲೆ
ಸಂಘ ಹುದ್ದೆದಾರ್ ಎಕ್ಲೊ
ದೂಕ್ ದಿಂವ್ಚೆ ದಾಂತ್ ದಾಕೊಂವ್ಕ್
ದಾಂತಾ ದಾಕ್ತೆರಾ ಕದೆಲಾರ್ ಗಳ್ಳೊ
ಏಕ್ ದೋನ್ ದಾಂತ್ ವೆಗ್ಗಿಂಚ್ ಭರ್‍ಯೆತ್
ತೊಂಡಾ ದಾಂತಾ ಪಯ್ಲೆಂ
ಮತಿ ದಾಂತಾಕ್ ಕೊಚಾಯ್ತಾಂ
ಆತಾಂ ಧೊಸ್ತಾತ್ ಥೊಡೆಚ್ ದಾಂತ್
ಪರತ್ ದಾಂತಾ ಹುಸ್ಕೊಚ್ ನಾಕಾ
ಸಗ್ಳೆ ಹುಮ್ಟಿತಾಂ ನವೆಚ್ ಬಸಯ್ತಾಂ
ಥರ್ಥರೊ, ಕುಲ್ಕುಲೊ ರೆಂವಡ್ಲಲೊ ಪಿಂರ್ಗಣೆ ತಾಳೊ
ಮ್ಹಜೆ ಬರೆ ಖಾಶೆಲೆ ದಾಂತ್ ಹುಮ್ಟಿತಾಯ್?
ದುಬ್ಳ್ಯಾಚೆಂ ಪಾಕೆಂ ವಿಭಾಡ್ತಾನಾ ಕಿತೆಂಚ್ ಭೊಗನಾ?
-ಡೇವಿಡ್ ಡಿ'ಸೋಜಾ, ಧರ್ಮಗಿರಿ