ಸಂಪಾದಕೀಯ್:
ಮಾಜ್ವೊನ್ ವೆಚಿನಾ ತಸಲಿ ಮಾವ್ ಕಾಳ್ಜಾಚೆರ್!
ಘಾಯ್ ತರೀ ಮಾಜ್ವತ್, ಪುಣ್ ಮಾವ್ ಕೊಣೆಂ ಪುಸುನ್ ಕಾಡ್ಚಿ? ಹೊ ಆಘಾತ್ ತಸಲೊ! ಮಾಜ್ವೊನ್ ವಚನಾ ತಸಲೊ.
ಹಾಂವೆಂ ತುಮ್ಕಾಂ ಕವಿಂಕ್ ಮಂಗ್ಳುರ‍್ಚ್ಯಾ ಸಂಸ್ಕೃತೆ ರಾಕಣ್‍ದಾರಾಂನಿ ಚಲಯಿಲ್ಲ್ಯಾ ಹಲ್ಲ್ಯಾಚೆರ್ ಪ್ರತಿಕ್ರಿಯಾ ಮಾಗಲ್ಲಿ. ಗುರು ಬಾಳಿಗಾನ್ ತುರ್ತಾನ್, ತಾಚೆಚ್ ಶೈಲೆನ್, ಸೊಭಿತ್ ಕರುನ್ (ಸೊಭಿತ್ ತರೀ, ಬೋವ್ ದುಖಾನ್) ಹಿ ಕವಿತಾ ಬರಯ್ಲ್ಯಾ.
ಫಾತರ್ ಉಡೊಂವ್ಕ್ ಜಾಯ್ನಾತಲ್ಲ್ಯಾಂನಿ, ರಗತ್ ಕಾಡುಂಕ್ ಚಿಂತಿನಾತಲ್ಲ್ಯಾಂನಿ ಪೆನ್ನ್ ತರೀ ಉಕ್ಲುಂಕ್ ಭಿಯೆಂವ್ಚೆಂ ನ್ಹಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಖಂಡ್ ಅಸ್ವಸ್ತಕಾಯ್
ನಾ ಹ್ಯಾ ಫಾವಟಿ
ಹಾಂವ್ ಹೆ ಅಸ್ವಸ್ತಕಾಯೇಂತಲ್ಯಾನ್
ಭಾಯ್ರ್ ಯೇನಾ.
ಹ್ಯಾ ಫಾವಟಿ
"ತುಕಾ ಗೊತ್ನಾ
ಅಣ್ಣಾ ಹಜಾರೇಚೆ ಆಂದೋಲನ್
ನಿಶ್ಫಲ್ ಕರೂಂಕ್ ಘಡಿಲ್ಲೊ
ಉಂಚ್ಲೋ ಖೇಳ್ ಹೋ"
ಮ್ಹಣೂನ್ ಮಿತ್ರಾನ್ ಸಾಂಗಿಲ್ಲೆ
ಆಯ್ಕೂನ್ ಹೆ
ಅಸ್ವಸ್ತಕಾಯೇಂತಲ್ಯಾನ್
ಭಾಯ್ರ್ ಯೇನಾ.
ಹ್ಯಾ ಫಾವಟಿ
"ಮಾರಚೆ ಚೂಕ್ ಖರೆಂ,
ಪುಣ್ ಚಲ್ಯಾನ್ ನಾಗಡೆ
ವಸ್ತ್ರ್ ಘಾಲಚೆ ಚೂಕ್ ನ್ಹಯವೇ?"
ಮ್ಹಣಚೆ ಸೆಜಾರ‍್ಯಾಚೆ
ವಿತಂಡವಾದಾನ್
ಗದಳೇವ್ನ್ ಹೆ
ಅಸ್ವಸ್ತಕಾಯೇಂತಲ್ಯಾನ್
ಭಾಯ್ರ್ ಯೇನಾ.
ಹ್ಯಾ ಫಾವಟಿ
"ಹೆ ಸಕಡ್
ಮಿಡಿಯಾಚೆ ಖೇಳ್
ಟಿಆರ್ಪಿ ವಾಡೋವ್ಚೊ
ಮಾಂಡ್ ಆನಿ ಮೇಳ್"
ಮ್ಹಣೂನ್ ಸಾಂಗಿಲ್ಲೆ
ಆಯಕೂನ್
ಹೆ ಅಸ್ವಸ್ತಕಾಯೇಂತಲ್ಯಾನ್
ಸುಟ್ಕಾ ಘೆನಾ.
ಹ್ಯಾ ಫಾವಟಿ
"ಪೊಲಿಸಾಂಚೋಯ್ ಹಾತ್
ಆಸಾಬಾ, ಫುಡಾರೀಯ್ ಆಸಾತ್
ಶಾಮೀಲ್, ಆಮಿ
ಯಕಶ್ಚಿತ್ ಮನ್ಶಾಂನಿ, ಕಿತೆಂ
ಕರೂಂಕ್ ಜಾತಾ"
ಮ್ಹಣೂನ್ ನಿರಾಶ್ ಜಾವ್ನ್
ಹೆ ಅಸ್ವಸ್ತಕಾಯೇಂತಲ್ಯಾನ್
ವಿಮುಖ್ ಜಾಯ್ನಾ
ಹ್ಯಾ ಫಾವಟಿ
"ಮಂಗಳೂರಚೆಂ ನಾಂವ್
ಪಾಡ್ ಜಾತೇ ಆಸಾ!
ಇಕೋನೊಮಿ ಕೊಸಾಳ್ತಾ.
ಕಿತೇಂಯ್ ಪುಣಿ ಕರಕಾ"
ಮ್ಹಣಚೆ ಕಾರ್ಪೋರೇಟ್
ಗ್ಯಾನ್ ಆಯಕೂನ್
ಹೆ ಅಸ್ವಸ್ತಕಾಯೇಕ್
ವಿರಾಮ್ ದೀನಾ.
ಹ್ಯಾ ಫಾವಟಿ
ಫುಕಟ್ ಯೇಕ್
ನಿರುಪದ್ರವಿ, ಉಪಕಾರ್ನಾತಿಲಿ
ಎಕ್ಸುರೆಪಣಾಚಿ
ಕವಿತಾ ಬರೋವ್ನ್
ಹೆ ಅಸ್ವಸ್ತಕಾಯೇಂತಲ್ಯಾನ್
ಮುಕ್ತಿ ಪಾವ್ನಾ
ಹ್ಯಾ ಫಾವಟಿ
ಹಾಂವ್ ಪರತ್ ಪರತ್,
ತೊ ವಿಡಿಯೋ ಪಳಯತಾ,
ಕಶೆಂ ತೆ ದುಶ್ಶಾಸನಾಂನಿ ಚಲಿಯಾಂಚೆ
ಕಾನಸಾಳೇರ್ ಮಾರ್ಲೆ,
ಕಶೇಂ ತಾಂಚೆ ಅಂಗೋಪಾಂಗಾರ್
ತಾಂಡವ್ ಕೆಲ್ಲೆಂ,
ಕಶೆಂ ಚಲಿಯಾಂಚೆ ಕೆಶ್ಟ್
ತಾಂಡೂನ್ ತಾಂಚೊ ಮಾನ್
ಉಗಡಾಯೆಲೆಂ,
ಕಶೆಂ ತಾಂಚೆಂ ಮುಖಮಳ್
ವಿಡಿಯೋಚೆರ್ ಉಗತೆ ಕರೂಂಕ್
ಬಲಾತ್ಕಾರ್ ಕೆಲೆಂ,
ಹೆಂ ಸಕಡ್ ಪರತ್ ಪರತ್,
ಪರತ್ ಪರತ್,
ಪಳೋವ್ನ್,
ಮೆಗೆಲೆ ಮನಾಚೆ ಉಚಾಂಬಳ್,
ಆಕ್ರೋಶ್, ಕೋಪ್, ರೋಶ್,
ವಳವಳಾಯತಾ,
ಆನಿ
ದ್ರೌಪದೀಕ್
ಜುಗಾರಾಂತ್ ಹಾರಲ್ಲೋ
ನಪುಂಸಕ್
ಧರ್ಮರಾಯಾಚೊ ಭಾವ್
ಭೀಮಸೇನಾ ವರಿ
ಕೆನ್ನಾಯ್ ಸಂತ್ ಜಾಯ್ನಾತಿಲ್ಲಿ
ಏಕ್ ಅಖಂಡ್
ಅಸ್ವಸ್ತಕಾಯ್ ವಾಡೋವ್ನ್ ಘೆತಾ.
ಕೆನ್ನಾಯ್ ಸಂತ್ ಜಾಯ್ನಾತಲಿ
ಏಕ್ ಅಖಂಡ್
ಅಸ್ವಸ್ತಕಾಯ್..
-ಗುರು ಬಾಳಿಗಾ