ಸಂಪಾದಕೀಯ್:
ಕವಿತಾವಿಣೆಂ ಜಿವಿತ್ ಪೊಕೊಳ್ ಲೆಕ್ಲೆಂ ಜಾಲ್ಯಾರ್...
ಎಕಾ ಭೋವ್ ಮೋವ್ ವಿಶಯಾಕ್, ಶಾಂತ್ ಭೊಂವಾರಾಂತ್ ಸಜವ್ನ್ ಉತ್ರಾಂಚ್ಯಾ ಉರ್ಮಾಲಾಂನಿ ನೆಟಯ್ಲ್ಯಾರ್, ಥಕ್‌ಲ್ಲ್ಯಾ ಕಾಳ್ಜಾಂತ್ ದಾಳ್ಮಾಂ ರೊಸಾಥೆಂಬೆ ಪಡೊನ್, ನವಿ ಹುಮೆದ್ ಭರೊಂಕ್ ಸಾಧ್ಯ್ ಆಸಾ. ತಶೆಂ ಜಾತಾ ಹಿ ಕವಿತಾ ವಾಚ್ತಾನಾ! ಏಕ್ ಆಶಾ ಕಾಳ್ಜಾಚಿ, ಇಡ್ಯಾಂತ್ ದೂಕ್ ಸಾಸ್ಣಾಚಿ! ಹೆ ದುಕಿ ಮಧೇಂಯ್ 'ಲ್ಹಾರಾರ್ ಪುಣಿ ಬಸೊನ್ ಯೇ ಹ್ಯಾ ಖಿಣಾ' ಮ್ಹಣ್ ಆಶೆಂವ್ಚೆಂ ಆನಿ ಸಲ್ವಲ್ಲ್ಯಾ ಜಿವಿತಾಂತ್ ಹುಮೆದಿಚೆ ಪಾರ್‍ವೆ ಉಬಂವ್ಚೆಂ ಪ್ರೇತನ್ ಕವಿಂಕ್ ಮಾತ್ರ್ ಕರುಂಕ್ ಸಾಧ್ಯ್ ಆಸಾ.
ಕವಿತಾ ಖಳಾಂತ್ ಅಸಲೆಂ ಏಕ್ ಪ್ರೇತನ್; ಬಳಾಧಿಕ್ ಪ್ರೇತನ್ ಕರುನ್ ಆಸಾ ಕವಯಿತ್ರಿ ಒಲಿವೇರಾ ಫ್ಲೇವಿಯಾ. ಆಪ್ಲ್ಯಾ ಘರಾಣ್ಯಾಂತ್ ವ್ಹಾಳೊನ್ ಆಸ್ಚ್ಯಾ ಸಾಹಿತೀಕ್ ಸುಗಂಧಾನ್ ತಿಚೆರ್ ಬರೊಚ್ ಪ್ರಭಾವ್ ಘಾಲಾ. ಕುವೈಟ್ ಶೆರಾಂತ್ ಚಲೊನ್ ಆಸ್ಚ್ಯಾ ಜಾಯ್ತ್ಯಾ ಸಾಹಿತೀಕ್ ಕಾಮಾಂನಿ ತಿಚೊ ವಾವ್ರ್ ಆಮಿ ದೆಖೊನ್ ಆಸಾಂವ್.
ಕವಿತೆಂತ್ ತಿಣೆ ಸಾಂಗ್ಚೆಬರಿ 'ಕವಿತಾವಿಣೆಂ ಜಿವಿತ್ ಪೊಕೊಳ್' ಮ್ಹಣ್ ತಿಣೆ ಲೆಕ್ಲೆಂ ಜಾಲ್ಯಾರ್, ಎಕಾ ಲ್ಹಾರಾರ್ ಮಾತ್ರ್ ನ್ಹಯ್ ಲ್ಹಾರಾಂಚ್ಯಾ ಲ್ಹಾರಾಂನಿ ಬಸೊನ್ ಯಶಸ್ವಿ ತಿಕಾ ಪೊಟ್ಲುಂಕ್ ಯೆತಲಿ ಮ್ಹಣ್ಚ್ಯಾಂತ್ ದುಬಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಡಾಸ್
ಸಾಂಜೆಚೆಂ ಥಂಡ್ ವಾರೆಂ ವ್ಹಾಳ್ತಾನಾ
ವಿಶಾಲ್ ದರ್ಯಾಚಿಂ ಲ್ಹಾರಾಂ ದೆಖ್ತಾನಾ
ಸುರ್ಯೊ ತೊ ಕುಪಾಂತ್ ಬುಡೊನ್
ಚಂದ್ರೆಮ್ ತಾಚಿ ಸೊಭಾಯ್ ಸಂಸ್ರಾಕ್ ದಿತಾನಾ
ತುಜೊ ಮೊಗಾ ಉಡಾಸ್ ಧೊಸ್ತಾ
ಮತ್ ವಿರಾರಾಯೆನ್ ಶಿಜ್ತಾ
ಕೆದಿಂಚ್ ತುಂ ಮೆಳ್ಚೊನಾಂಯ್ ಚಿಂತಾನಾ
ದೆಂವ್ತಾತ್ ದೊಳ್ಯಾಂ ದುಕಾಂ ಸೊಸುಂಕ್ ಜಾಯ್ನಾಸ್ತಾನಾ
ಉಡಾಸ್ ತುಜೊ ಆಜ್ ಖಿಣಾ ಖಿಣಾಂನಿ
ವ್ಹಾಳೊನ್ ಯೆತಾ ಜಶೆಂ ದರ್ಯಾ ಲ್ಹಾರಾಂನಿ
ಜಿವಿತ್ ಹೆಂ ಪೊಕೊಳ್ ತುಜ್ಯಾ ಬಗರ್
ಘಡ್ಯೆಕ್ ತರಿ ಬಸೊನ್ ಯೇ ಎಕಾ ಲ್ಹಾರಾರ್!
-ಒಲಿವೇರಾ ಪ್ಲೇವಿಯಾ, ತ್ರಾಸಿ/ಕುವೈಟ್