ಸಂಪಾದಕೀಯ್:
ಮಾನ್ ಮರ್ಯಾದೆಚೆಂ ಮಾಪ್ ಮೆಜುಂಕ್ ಕೊಣ್ ಸಕ್ತಾ?
ಮಾನ್ ಮರ್ಯಾದೆಚೆಂ ಮಾಪ್ ಕಿತ್ಲೆಂ? ಕೊಣಯ್ ಸಾಂಗೊಂಕ್ ಸಕ್ತಾ? ಮಾನ್ ಮಾಣ್ಸುಗಿ ಆನಿ ಉಣೆಂ ವಸ್ತುರ್ ಹಾಂಚೆ ಮಧೆಂ ಫರಕ್ ಕಸಲೊ? ಆಮಿ ಒಲಿಂಪಿಕ್ಸ್ ಪಳೆತಾಂವ್. ಹಿಂದಿ ಇಂಗ್ಲಿಷ್ ಪಿಂತುರಾಂ ಧಾರಾಳ್ ಮಾಪಾನ್ ಪಳೆತಾಂವ್. ಕೊಣಯ್ ಕಸಲೋಯ್ ಉದ್ಗಾರ್ ಕಾಡ್ತಾ? ಆಮ್ಚ್ಯಾ ದೆವ್ಳ್ಯಾಂನಿ ಜ್ಯೊ ಕಲಾಕೃತಿಯೊ ಆಸಾತ್, ತ್ಯೊ ಕಿತೆಂ ದಾಕಯ್ತಾತ್?
ಖಂಯ್ಚೇಂಯ್ ಬರೆಂ ಆನಿ ವಾಯ್ಟ್ ಆಮ್ಚ್ಯಾ ಚಿಂತ್ಪಾಚೆರ್, ಆಮಿ ವಾಡಲ್ಲ್ಯಾ ಭೊಂವಾರಾಚೆರ್ ಹೊಂದೊನ್ ಆಸ್ತಾ. ಪುಣ್ ಎಕಾಚ್ ಭೊಂವಾರಾಂತ್ ದೋನ್ ವೆವೆಗ್ಳಿಂ ಚಿಂತ್ಪಾಂ ಆಸಾತ್ ತರ್! ಏಕ್ ಚಿಂತಪ್ ಆಪ್ಣಾಚೆಂ ಸುತ್ ಘಟ್ ದಾಕಂವ್ಕ್ ಅಸಲಿಂ ಅತರ್ವಣಾಂ ಕರುಂಕ್ ವೆತಾ - ಜಿಂ ಆಯ್ಲೆವಾರ್ ಮಂಗ್ಳುರಾಂತ್ ಘಡೊನ್ ಅಸಾತ್ ತಿಂಚ್ ತಿಂ ಅತರ್ವಣಾಂ!
ಮ್ಹಾಲ್ಗಡೊ ಕವಿ ಕಾವ್ಯದಾಸಾನ್ ಮಂಗ್ಳುರ್‍ಚ್ಯಾ ಘಡಿತಾಕ್ ಪ್ರತಿಕ್ರಿಯಾ ಜಾವ್ನ್ ಹಿ ಕವಿತಾ ಬರಯ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅನ್ಯಾಯ್, ಅನೀತ್ ನಾಕಾ
ಮಂಗ್ಳುರ‍್ಚೊ ಲೋಕ್ ಉಡೊನ್ ಪಡ್ಲೊ -
ಆಯ್ಕೊನ್ ವಿಚಿತ್ರ್ ಖಬರ್
"ಸಂಸ್ಕೃತೆಚೆ ರಾಕ್ಣೆ" ತಶೆಂ
"ನೈತಿಕ್ ಪೊಲಿಸ್" ಕಾರ್ಬಾರ್!
ಪಡೀಲಾಂತ್ಲ್ಯಾ ಹೋಮ್ ಸ್ಟೇ ಘರಾಂತ್
ಚಲೆ ಚಲಿಯೊ ಮೆಳ್ಳಿಂ
ಬರ್ಥ್ ಡೇ ಪಾರ್ಟಿ ಆಚರಣಾಂತ್
ದೊನ್ಪಾರ್ ಥಾವ್ನ್ ಸಾಂಜೆ - ಖೆಳ್ಳಿಂ
ಘರಾ ಪಾಟಿಂ ಭಾಯ್ರ್ ಸರ್ತಾನಾ -
ನೈತಿಕ್ ಪೊಲಿಸಾಂ ದಾಢ್ -
ಚಲಿಯಾಂಚೆರ್ ಹಾತ್, ಚಲ್ಯಾಂಕ್ ಥಾಪ್ಡಾಂ
ಚೊರಿ, ಅನೀತ್, ವಿಭಾಡ್
ಪಾರ್ಟಿ, ಸಂಭ್ರಮ್ ಚಲಯ್ತಾನಾ
ಲೈಸನ್ಸ್ ಘೆಂವ್ಚೆಂ ಪಡ್ಲಾಂ?
ಕಾನೂನ್ ಆಪ್ಲ್ಯಾ ಹಾತಾಂತ್ ಘೆಂವ್ಚ್ಯಾಕ್
ಹಾಂಕಾಂ ಕೊಣೆಂ ಸೊಡ್ಲಾಂ?
ಕರ್ನಾಟಕಾಂತ್ ಸರ್ಕಾರ್ ಆಸಾ
ಜಿಲ್ಲ್ಯಾಂತ್ ಪೊಲಿಸ್ ಖಾತೊ -
ಅನ್ಯಾಯ್, ಅತ್ಯಾಚಾರ್ ಚಲ್ತಾನಾ
ಕಿತ್ಯಾಕ್ ವೊಗೊ, ರಿತೊ?
ಮಾಣ್ಸುಗೆ ಚಾಲ್, ಬರೆಂ ನಡ್ತೆಂ
ಸಂಗಿಂ ಸಂಸ್ಕೃತೆ ಘನ್
ಸಕ್ಕಡ್ ಮೆಳೊನ್ ರಾಕ್ಯಾಂ - ನಾಕಾ
ಮಾನ್ ಮರ್ಯಾದ್ ಉಲ್ಲಂಘನ್!
-ಕಾವ್ಯದಾಸ್