ಸಂಪಾದಕೀಯ್:
ಹಾತಾಂತ್ ತಲ್ವಾರ್, ಸೊಂಟೊ ಯಾ ಕೊಯ್ತೊ ಘೆಜಾಯ್ ಪಡ್ಲಾಂ
ದ್ರೌಪದಿಚೆಂ ಕಾಪಡ್ ವೊಡ್ತಾನಾ ಖಂಯ್ ಆಸಾ ಕೃಷ್ಣ ಆಜ್? ಕೃಷ್ಣ ಜಾವ್ನ್ ಚಲಿಯಾಂಚೊ ಮಾನ್ ಸಾಂಬಾಳಿಜೆ ಜಾಲ್ಲೆಚ್, ಮಾನ್ ಲುಟೊಂಕ್ ಭಾಯ್ರ್ ಸರ್‍ಲ್ಯಾತ್ ಆಜ್. ಕಸಲೆಂ ರಕ್ಷಾ ಬಂಧನ್ ಹೆಂ ಮ್ಹಣ್ಚೆಂ! ಆಯ್ಚೆ ದ್ರೌಪದಿನ್ ಕೃಷ್ಣಾಕ್ ರಾಕೊಂಕ್ ಜಾಯ್ನಾ. ತಾಕಾ ಪಾತ್ಯೆಂವ್ಕಯ್ ಜಾಯ್ನಾ. ಆಯ್ಚೆ ದುಷ್ಶಾಸನ್ ಸಗ್ಳೆ ಕೃಷ್ಣಾಚೊ ವೇಸ್ ಘಾಲ್ನ್ ಭೊಂವ್ತಾತ್.
ಆಯ್ಚೆ ಚಲಿಯೆನ್ ಅಬ್ಬಕ್ಕಾಚಿ, ಒನಕೆ ಓಬವ್ವಾಚಿ, ಕಿತ್ತೂರು ರಾಣಿ ಚೆನ್ನಮ್ಮಾ ಥಾವ್ನ್ ಶಿಕಜಾಯ್ ಜಾಲಾಂ. ಹಾತಾಂತ್ ತಲ್ವಾರ್, ಸೊಂಟೊ ಯಾ ಕೊಯ್ತೊ ಘೆಜಾಯ್ ಜಾಲಾಂ. ನಾಂತರ್ ತಾಂಕಾಂ ಬಚಾವಿ ನಾ.
ಎಡ್ಡಿ ಶಿಕೆರಿನ್ ಪಯ್ಶಿಲ್ಯಾ ದೋಹಾಂತ್ ರಾವೊನ್ ಸೈತ್ ಮಂಗ್ಳುರ್‍ಚ್ಯಾ ಘಡಿತಾಕ್ ಸ್ಪಂದನ್ ಜಾಲ್ಲಿ ರೀತ್ ಪಳೆತಾನಾ, ಧುವೊ ಆಸ್ಚ್ಯಾ ಬಾಪಾಯ್ಚೆಂ ಕಾಳೀಜ್ ಕಶೆಂ ಪೆಟೊನ್ ಆಸಾ ಮ್ಹಳ್ಳೆಂ ಕಳ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಕ್ಷಾ ಬಂಧನ್
ಆದಿಂ ಮಾಗಾ ಮಹಾಭಾರತಾಂತ್ಲೆ ದ್ರೌಪದಿನ್
ನ್ಹೆಸಲ್ಲ್ಯಾ ಕಾಪ್ಡಾಚೊ ಏಕ್ ತೀರ್ ಪಿಂಜುನ್
ಕೃಷ್ಣಾಚ್ಯಾ ಚಿರಲ್ಲ್ಯಾ ಹಾತಾಕ್ ಜೆದ್ನಾಂ ಬಾಂದ್ಲೊ
ತಾಣೆಂ ತೆ ಪರ್ಕಿ ಸ್ತ್ರೀಯೆಕ್ ಆಪ್ಲಿ ಭಯ್ಣ್ ಮಾಂದ್ಲಿ
ಜಿಣಿಭರ್ ತುಕಾ ರಾಕೊನ್ ವ್ಹರ್‍ತಾಂ ಅಶಿ ಭಾಸ್ ದಿಲಿ
ಫುಡೆಂ ಕೌರವಾಂ ಮದ್ಲ್ಯಾ ಎಕ್ಲ್ಯಾ ದುಷ್ಶಾಸನಾನ್
ಮಹಾಜಣಾಸಭೆ ಮುಕಾರ್ ದ್ರೌಪದಿಕ್ ವಿಣ್ಗಿ ಕರ್‍ತಾನಾ
ತಿಣೆಂ ನ್ಹೆಸಲ್ಲೆಂ ತೆಂ ಕಾಪಡ್ ನಿರಂತರಿ ಲಾಂಬವ್ನ್
ತಿಚೊ ಮಾನ್ ರಾಕಲ್ಲೊ ಮಾಯಾವಿ ಕೃಷ್ಣಾನ್
ಆಪ್ಣೆಂ ದಿಲ್ಲಿ ಭಾಸ್ ಪಾಳುನ್, ಆಪ್ಲೊ ಧರ್ಮ್ ಮಾಂದುನ್
ಅಶಿ ಜಾಲ್ಲಿ ಸುರ್ವಾತ್ ರಕ್ಷಾ ಬಂಧನ್ ಪರ್ಬೆಚಿ
ಭಯ್ಣಿನ್ ಭಾವಾಚ್ಯಾ ಬರ್‍ಯಾ ಫಾಲ್ಯಾಚಿ ಆರತಿ ಕರ್‍ಚಿ
ಭಾವಾನ್ ಭಯ್ಣಿಕ್ ಮಾನ್ ದೀವ್ನ್ ಸದಾಂ ತಾಚಿ ರಾಕ್ವಣ್ ಕರ್‍ಚಿ
ಆಪುರ್ಬಾಯೆಚಿ ಆಪುಟ್ ಭಾರತೀಯ್ ಸಂಸ್ಕೃತಿ ಆಮ್ಚಿ
ತಿಚ್ ಸಂಸ್ಕೃತಿ ಉರೊಂವ್ಕ್, ಮಾನ್ ಮಾಣ್ಸುಗಿ ರಾಕೊಂಕ್
ದೇಶ್‌ಭರ್ ಆಜ್ ಉಟ್ಲ್ಯಾತ್ ಪಂಗಡ್, ಪರ್ಜೆಕ್ ಜಾಗೊಂವ್ಕ್
ದಿಲ್ಯಾಂತ್ ನಾಂವಾಂ ವಿಂಗಡ್ ವಿಂಗಡ್, ರಂಗ್ ಮಾತ್ರ್ ಏಕಚ್
ಪೊಪ್ಸಾಂ ಫುಲೊವ್ನ್ ತಾಳೊ ಪಿಂದುನ್ ಸಗ್ಳೆ ಬೊಬಾಟ್ತಾತ್ ತೆಂಚ್
ದಾದ್ಲ್ಯಾಂಕ್ ಉದ್ರೇಕ್ ಕರ್‍ಚಿ ಅರ್ಧಿ ವಿಣ್ಗಿ
ಪಾಶ್ಚಾತ್ಯ್ ಸಂಸ್ಕೃತಿ ನಾಕಾ ತುಮ್ಕಾಂ
ಭಿತರ್ ಭಾಯ್ರ್ ಆಂಗ್‍ಭರ್ ನ್ಹೆಸ್ಚಿ
ಭಾರತೀಯ್ ಸಂಸ್ಕಾರ್ ಆಸೊಂ ಆಮ್ಕಾಂ
ಆಜ್ ಹಾಂಚೆ ಮಧೆಂಚ್ ಆಸಾತ್ ದುಷ್ಶಾಸನ್ ಸಭಾರ್
ರಾನ್ವಟ್ ಪಿಶ್ಯಾ ಸುಣ್ಯಾಂಬರಿ ತೆ ಭೊಂವ್ತಾತ್ ಗಾಂವಾರ್
ಸಂಸ್ಕೃತಿ ಉರೊಂವ್ಕ್, ದೇಶಾಚೊ ಮಾನ್ ರಾಕೊಂಕ್
ಉಗ್ತ್ಯಾ ರಸ್ತ್ಯಾಂನಿ ಅಬಲ್ ಚಲಿಯಾಂಕ್ ಧರ್‍ತಾತ್
ಚಿರ್ಡುನ್, ಮಸ್ತುನ್, ತಾಂಚಿಂ ವಸ್ತ್ರಾಂ ಪಿಂಜುನ್ ವಿಣ್ಗಿಂ ಕರ್‍ತಾತ್
ತೊಂಡಾಂ ರುಂದಾವ್ನ್ ಕ್ಯಾಮರಾ ಮುಕಾರ್ ಧೈರಾನ್ ವೆತಾತ್
ಉಪ್ರಾಂತ್ ಹಳ್ದಿ ರಂಗಾಚ್ಯಾ ಪಾಲ್ವಾ ಪಾಟ್ಲ್ಯಾನ್ ಲಿಪ್ತಾತ್
ಆಜ್ ರಕ್ಷಾ ಬಂಧನಾಚೊ ಉಗ್ಡಾಸ್ ಕರಾ, ಭಾವಾಂಣೊ ತುಮ್ಚೊ ಧರ್ಮ್ ಪಾಳಾ
ಹ್ಯಾ ದುಷ್ಶಾಸನಾಂ ಥಾವ್ನ್ ರಾಕೊಂಕ್ ತಾಂಕಾಂ ಮಾಯಾವಿ ಕೃಷ್ಣ ಯೆಂವ್ಚೊ ನಾ
ಹರ್ಧೆಂ ಚಿರುನ್ ಕಾಳೀಜ್ ಪಾಪ್ಸುನ್ ರಗತ್ ಪಿಯೆಂವ್ಚೊ ಭೀಮಯ್ ನಾ
ಭಾವಾಂನಿ ಜಾಗೆ ಜಾಯಾ, ನಾ ತರ್ ಭಯ್ಣಿಂನೊ ತುಮಿಂಚ್ ಉಟಾ
ಉಳ್ಳಾಳ್ಚೆ ರಾಣಿ ಅಬ್ಬಕ್ಕಾಬರಿ, ಕಿತ್ತೂರ್ ಚೆನ್ನಮ್ಮ
ವ ಒನಕೆ ಓಬವ್ವಬರಿ ಧೈರಾಚೆಂ ಮೇಟ್ ಕಾಡಾ
ತ್ಯಾ ದುಷ್ಶಾಸನಾಂಕ್ ಧರಾ, ಬಾಂದುನ್ ಘಾಲ್ನ್ ಕಾಪತ್ ಕರಾ
ತ್ಯಾ ದುಷ್ಶಸನಾಂಕ್ ನಪುಂಸಕ್ ಕರಾ.
-ಎಡ್ಡಿ ಸಿಕೇರ್