ಸಂಪಾದಕೀಯ್:
ದೆವಾಚೆ ಚಾಳ್ಣೆಕ್ ಬುರಾಕ್ ಆಸ್ಲ್ಯಾರ್ ಕಿತೆಂ ಜಾತಾ?
ಬೋವ್ಶಾ ರಚ್ಣಾರಾನ್ ಮನ್ಶಾಕ್ ರಚ್ತಾಂ, ಕಿತೆಂಕಿ ಅನಾಉತ್ ಘಡ್ಲಾಂ. ನಾಂತರ್ ಹೆ ಬೊಲ್ಪ್ಯಾ ವೆಸಾಚೆ ಕೊಲೆ ಹೆ ಧರ್ತೆರ್ ಕಶೆ ಜಲ್ಮಾಕ್ ಆಯ್ಲೆ? ಮಂಗ್ಳುರಾಂತ್ಲ್ಯಾ ಅನಾಉತಾ ಉಪ್ರಾಂತ್ ಕವಿಕ್ ಸವಾಲ್ ಉದೆಲಾಂ ಆನಿ ತೊ ಸ್ವತಾ ಹಾಚಿ ಜಾಪ್ ಸೊದೀತ್ ಆಸಾ. ಕಾಂಯ್ ದೆವಾಚೆ ಚಾಳ್ಣೆಕ್ ಬುರಾಕ್ ಆಸಲ್ಲೆ ಆಸ್ತಲೆ ಮ್ಹಳ್ಳೊ ದುಬಾವ್ ತಾಕಾ ಜಾಲಾ.
ಪ್ರೀತಮ್ ಕಿರೆಂ ಸುಕ್ಷೀಮ್ ಸಂವೇದನಾಚೊ ಕವಿ. ಸಬಾರ್ ತೆಂಪಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲಾ. ತಾಕಾ ಯೆವ್ಕಾರ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬೊಲ್ಫ್ಯಾ ವೆಸಾಚೆ ಕೊಲೆ
ಬೊಟಾಂನಿ ಕೊರಾಟ್ಟೊನ್
ಹಾತಾಂನಿ ಮೊಳುನ್
ರಚ್ಲೆಲಿ ಜೀವಿ
ಆಜ್ ಬೊಲ್ಪೊ ಜಾಲಿ
ಕಶಿ?
ಆವಯ್ಚ್ಯಾ ಪಾನ್ಯಾನ್
ಬಾಪಾಯ್ಚ್ಯಾ ಪೊಶೆವ್ಣೆನ್
ಪೊಸಲ್ಲಿ ಜೀವಿ
ಆಜ್ ಬೊಲ್ಪೊ ಜಾಲಿ
ಕಶಿ?
ವ್ಹಡಾಂಚ್ಯಾ ಹಾತಾಂತ್
ಮಾನಾಂಚೆ ಪಕ್ಷೇನ್
ವೇಂಗ್ ಮಾರ್‌ಲ್ಲಿ
ಜೀವಿ
ಆಜ್ ಬೊಲ್ಪೊ ಜಾಲಿ
ಕಶಿ?
ಧರ್ಮಾಚ್ಯ ನಾಂವಾನ್
ಅಂದ್ಕಾರಾಂಚ್ಯಾ ಖಂದ್ಕಾಂತ್ ಬುಡೊನ್
ಬಾವ್ಟೊ ಉಬಂವ್ಚಿ ಜೀವಿ
ಬೊಲ್ಪೊ ನ್ಹಯ್
ಆಜ್
ಕೊಲೊ ಜಾವ್ನ್ ಪೊಳ್ಳಿ
ಆಜ್
ಕೊರಾಟ್ಟಿಲಿಂ ಬೊಟಾಂ
ಮುಡ್ಡಾಯ್ಲೆಲಿ ಮಾತಿ
ರಚ್ನಾರಾಕಚ್ ಸವಾಲ್ ಕರಿಂ
ತುಜೆ ಚಾಳ್ಣೆಕ್
ಬುರಾಕ್ ತರೀ ನಾತ್ಲೆ?
ನಾಂ ತರ್, ಶಿಮ್ಟಿ ನಾತ್ಲೆಲಿಂ
ಬೊಲ್ಫ್ಯಾ ಪಿಲಾಂ
ಖಂಯ್ ಥಾವ್ನ್ ಘುಸ್ಲಿಂ?
-ಪ್ರೀತಮ್ ಕಿರೆಂ, ಶಾರ್ಜಾ