ಸಂಪಾದಕೀಯ್:
ಚೆಂಡೆಚ್ಯಾ ನಾದಾಕ್ ಪರ್ಬುಂಗೆಲೊ ಉಡ್ಕಾಣಾಂ ಘಾಲ್ತಾಲೊ
ಹೊ ಗಾಂವ್ ಕಸೊ ಆಸಲ್ಲೊ? ಚೆಂಡೆಚ್ಯಾ ನಾದಾಕ್ ಪರ್ಬುಂಗೆಲೊ ಉಡ್ಕಾಣಾಂ ಘಾಲ್ತಾಲೊ. ಪರ್ಬುಂಚ್ಯಾ ಸಾಂತ್-ಮಾರಿಕ್ ನಾಲ್ಕ್ಯಾಂಚೊ ನಾಚ್ತಾಲೊ, ನಾಯ್ತ್ಯಾಂಚೊ ಬಾಂಗ್ ಜಾತಾನಾ ಸಗ್ಳೆ ತಕ್ಲಿ ಬಾಗಾವ್ನ್ ಮರ್‍ಯಾದ್ ದಿತಾಲೆ. ಪುಣ್ ಆಜ್ ವಾಟೆರ್ ದೊಗ್ ಜಣ್ ಸಾಂಗಾತಾ ವೆಚೆಬರಿ ನಾ; ಬಸ್ಸಾಚೆರ್ ಎಕೆ ಸ್ತ್ರೀಯೆ ಸಾಂಗಾತಾ, ತಿಚೊ ಘೊವಾನ್‌ಯ್ ತರೀ ಬಸ್ಚೆಬರಿ ನಾ. ದಿಷ್ಟಿ ಮೊಸ್ರಾನ್ ಜಳ್ತಾತ್. ಕಾಳ್ಜಾಂ ರಗತ್ ವೊಂಕ್ತಾತ್.
ಮುಕ್ಲೆ ದೀಸ್ ಕಸಲೆ? ಪ್ರಾಣ್ ಸೊಡುಂಕಯ್ ಹ್ಯಾ ಗಾಂವಾಂತ್ ಪರ್ಮಿಟ್ ಘೆಂವ್ಚಿ ಗತ್ ಯೇತ್ ಕೊಣ್ಣಾ. ಮಾಗೀರ್ ವಾರ್‍ಯಾಂತ್ಲೆ ಪ್ರಾಣ್ ಲೆಗುನ್, ತುಜಿ ಜಾತ್- ಮ್ಹಜಿ ಕಾತ್ ಮ್ಹಣೊನ್ ಝಗ್ಡೊಂಕ್ ಪಡ್ಲ್ಯಾರ್ ಜೀವ್ ಆಸಲ್ಲ್ಯಾಂನಿ ಉಸ್ವಾಸ್ ಸೆಂವ್ಕ್ ಧಾ ಪಾವ್ಟಿಂ ಚಿಂತಿಜಾಯ್ ಜಾಲ್ಲಿ ಪರಿಗತ್ ಯೆತಲಿ.
ವಲ್ಲಿ ವಗ್ಗಾನ್ ಕರಾವಳಿ ಗಾಂವ್ಚೆಂ ಸುಂದರ್ ಚಿತ್ರಣ್ ಆಮ್ಚೆ ಮುಕಾರ್ ದವರುನ್, ಸವಾಲಾಂ ಉಡಯ್ಲ್ಯಾಂತ್. ಜಾಪಿ ಆಮಿ ದೀಜಾಯ್ ಜಾಲ್ಯಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಖಂಯ್ ಗೆಲೆ ತೆ ದೀಸ್ ?
ಆದಿಂ ಮಾಗಾ ಆನಿ ಪೊರ್‍ಚ್ಯಾ ದಿಸಾಂನಿ
ಕರ್ನಾಟಕಾಚ್ಯಾ ಕರಾವಳಿ ಲಾಗ್ಶಿಲ್ಯಾ
ಗಾಂವಾಂ ಗಾಂವಾಂನಿ
ಚೆಂಡೆಚ್ಯಾ ನಾದಾಕ್ ಯಕ್ಷಗಾನಾಚಿಂ ಉಡ್ಕಾಣಾಂ
ಸಗ್ಳಿ ರಾತ್ ಗಾಂವ್ಚ್ಯಾ ಲೊಕಾಕ್ ಬಿಲ್ಕುಲ್ ನೀದ್ ನಾ
ತರಿ ಕೊಣೆಂಯಿ ಹಾಂ-ಹುಂ ಕೆಲ್ಲೆಂ ನಾ
ಕಾಲ್ ಆನಿ ಪೋರ್ ಕರಾವಳೆಚ್ಯಾ ಮುಲ್ಯಾ-ಮುಲ್ಯಾಂನಿ
ಪರ್ಬುಂಚ್ಯೊ ಸಾಂತ್ ಮಾರಿ
ಮಾಪ್ಳ್ಯಾಂಚೆ ಪಳ್ಳೆಂನಿ ಲಾಂಬಾಯೆಚೆ ಬಾಂಗ್
ಸಾಣಾಂ-ಗುಡಿಂನಿ ನಾಲ್ಕ್ಯಾಂಚೊ ನಾಚ್
ಭೂತ-ಕೋಲಾಚೊ ಗಲಾಟೊ ಆನಿ ಆರಾಬಾಯೊ
ಪೂಣ್ ಖಂಯ್ಚ್ಯಾಯ್ ಜಾತಿಚ್ಯಾಂನಿ ಪ್ರತಿಭಟನ್ ಕೆಲ್ಲೆಂನಾ
ಪಾಟ್ಲ್ಯಾ ದಿಸಾಂನಿ
ಆಮ್ಚ್ಯಾ ಕರಾವಳಿ ಪೆಂಟೆ ಶಹರಾಂನಿ
ಥಂಯ್ಸರ್ ಕಾಂಬ್ಳಾ ರೆಡ್ಯಾಂಚೊ ರೇಸ್ ಹಾಂಗಾಸರ್ ಕೊಂಬ್ಯಾಕಾಟ್
ಮಿಲಾರ್ ಥಾವ್ನ್ ರುಜಾಯ್ ಸಾಕ್ರಾಮೆಂತಾಚೊ ಪುರ್ಶಾಂವ್
ತರಿಪುಣ್
ಜಾತಿ-ಕಾತಿ ಭಾವ್-ಭಾಂಧವ್ಪಣಾ ಥಂಯ್ ಏರ್ ಆಯಿಲ್ಲಿ ನಾ
ಪೂಣ್ ಆಜ್ ಹೆ ಕರಾವಳಿ ದೆಗೆನ್
ಘಡ್ತಾ ಕಿತೆಂ?
ಆಯ್ಚ್ಯಾ ದಿಸಾ ಹಾಂಗಾಸರ್ ಮೋಗ್ ನಾ, ಮಯ್ಪಾಸ್ ನಾ
ಪೆಲ್ಯಾಚ್ಯಾ ಕರ್ತುಬಾಂ ಥಂಯ್ ಸೊಸ್ಣಿಕಾಯ್ ನಾ
ಭಾವ್-ಭಯ್ಣ್ ಮ್ಹಳ್ಳೊ ಬರೊ ಸಂಬಂಧ್ ನಾ
ಫಾಲ್ಯಾ-ಪೊರ್‍ವಾಂಚ್ಯಾ ಮುಕ್ಲ್ಯಾ ದಿಸಾಂನಿ
ಕೊಣೆಂಯೀ ಬಾವ್ಡ್ಯಾನ್ ಆಪ್ಲ್ಯಾ ಘರಾ ಭಿತರ್ ಹಾಸೊಂಕ್ ನಾ, ರಡೊಂಕ್ ನಾ
ತಿತ್ಲೆಂಚ್ ನ್ಹಯ್
ಸಮಾಧಾನೆನ್ ಆಪ್ಲೊ ಪ್ರಾಣ್ ಸಮೇತ್ ಸೊಡುಂಕ್ ನಾ !
-ವಲ್ಲಿ ವಗ್ಗ