ಸಂಪಾದಕೀಯ್:
ಕಾಳ್ಜಾಂ ಕಡಂವ್ಚೊ ರಾಯಾಂಚ್ಯಾ ರಾಯಾಚೊ ಪಾಶಾಂವ್
ಬೈಬಲಾಂತ್ಲೆಂ ಏಕ್ ಘಡಿತ್ ಕವಿನ್ ಸಂಪೂರ್ಣ್ ಸ್ವಾತಂತ್ರ್ಯ್ ಘೆವ್ನ್ ಕವಿತಾ ರುಪಾರ್ ಹಾಂಗಾಸರ್ ಸಾದರ್ ಕೆಲಾಂ. ಸ್ವಾಮಿ ಜೆಜು ನಜರೆನಾಚೊ ಪಾಶಾಂವ್ ಕ್ರಿಸ್ತಾಂವ್ ಲೊಕಾನ್ ಜಾಯ್ತೆಪಾವ್ಟಿಂ ವಾಚ್ಲಾ ಜಾವ್ಯೆತ್. ಪುಣ್ ಜಿತ್ಲೆ ಪಾವ್ಟಿಂ ವಾಚ್‌ಲ್ಲೊ ಆಸೊನ್‌ಯ್, ಪರ್‍ತ್ಯಾನ್ ವಾಚ್ತಾನಾ ಕಸಾಪ್ಪ್ಯಾಚೇಂಯ್ ಕಾಳೀಜ್ ಹೆಂ ಘಡಿತ್ ಚಿಡ್ಡಿತಾ ಆನಿ ಮುಡ್ಡಿತಾ. ಆನಿ ತಶೆಂಚ್ ಜಾತಾ ಕವಿತೆರುಪಾರ್ ವ್ಹಾಳ್‌ಲ್ಲೆಂ ಹೆಂ ಘಡಿತ್ ವಾಚ್ತಾನಾ!
ಕವಿತೆಚೆಂ ಏಕ್ ಪರ್‍ನೆಂ ರೂಪ್, ಕಾಣಿಯೆ-ಕವಿತೆಚೆಂ ರೂಪ್ - ಕವಿ ಓಸ್ಟಿನಾನ್ ಜಿವೆಂ ಕೆಲಾಂ. ಆಯ್ಲೆವಾರ್‍ಚ್ಯಾ ದಿಸಾಂನಿ ಅಸಲ್ಯಾ ಫಾಮಾದ್ ರುಪಾಚ್ಯೊ ಕವಿತಾ ಸಂಪೂರ್ಣ್ ಮಾಯಾಗ್ ಜಾಲ್ಲ್ಯೊ ಝಳ್ಕತಾನಾ ಕವಿನ್ ಅಸಲೆಂ ಏಕ್ ಪ್ರೇತನ್ ಕೆಲ್ಲೆಂ ನಿಜಾಯ್ಕಿ ಹೊಗ್ಳಿಕೆಚೆಂ. ಹ್ಯಾ ಆದೀಂಯ್ ಓಸ್ಟಿನಾನ್ ಅಸಲಿಂ ಕಾಂಯ್ ಥೊಡಿಂ ಪ್ರೇತನಾಂ ಕೆಲ್ಯಾಂತ್.
ಕವಿತೆಚೆಂ ಏಕ್ ಸಾದೆಂ ರೂಪ್ ಘೆವ್ನ್, ಏಕ್ ಬೋವ್ ಉಂಚ್ಲೊ ಲೊಕಾಮೊಗಾಳ್ ವಿಶಯ್ ಎಕಾ ಮ್ಹಾಲ್ಗಡ್ಯಾ ಕವಿನ್ ಹಾಂಗಾಸರ್ ಸಾದರ್ ಕೆಲ್ಲ್ಯಾನ್ ಕವಿತಾ ಖಳಾಂತ್ ಪಯ್ಲೆಚ್ ಪಾವ್ಟಿಂ ಪಾವ್ಲಾಂ ಕಾಡ್ಚ್ಯಾಂಕ್ ವಿಶೇಸ್ ಧೈರಾಚಿಂ ವೊಕ್ತಾಂ ಲಾಭ್ತಲಿಂ ಮ್ಹಣ್ಚ್ಯಾಕ್ ದುಭಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸೊಮ್ಯಾಚೊ ಪಾಶಾಂವ್
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ
ರಾಯಾಂಚೊ ರಾಯ್ ತುಂ, ಜಲ್ಮಲೊಯ್ ಎಕಾ ಗೊಟ್ಯಾಂತ್
ಪರ್ಜಳ್ಳೊಯ್ ಎಕಾ ಥಿಕಾಪರಿ ಗೊರ್ವಾಂಚ್ಯಾ ತ್ಯಾ ಕಾಟ್ಯಾಂತ್
ತೆತ್ತೀಸ್ ವರ್‍ಸಾಂ ಜಿಣಿ ತುಜಿ ಸಾದ್ಯಾಚ್ ಮನ್ಶಾಪರಿ
ಸುತಾರಿಚೊ ಪೂತ್ ತುಂ, ಆವಯ್ ತಿ ಭಾಗೆವಂತ್ ಮರಿ
ಕಾನುನಾಂ ತುಜಿಂ ಆಯ್ಕೊನ್ ಜುದೆವ್ ಸಗ್ಳೆಚ್ ಶೆರ್ಮೆವ್ನ್ ಗೆಲೆ
ತಾಂಚೆಂ ರಾಜ್ವಟ್ ಚುಕ್ತಾ ಮ್ಹಣೊನ್ ಉಚಾಂಬಳ್ ಜಾಲೆ ಕೊಲೆ
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಹಫ್ತ್ಯಾ ಆದಿಂ ತಾಳಿಯೊ ಘೆವುನ್ ಪುರ್‍ಶಾಂವ್ ತಾಂಣಿ ಕಾಡ್ಲೊ
ದೆವಾಚೊ ಪೂತ್ ತುಂಚ್ ಮ್ಹಣೊನ್ ನಮಾನ್ ತಾಂಣಿ ಕೆಲೊ
ತುಜ್ಯಾಚ್ ಶಿಸಾನ್ ಜುದಾಸಾನ್ ತೀನ್ ಕಾಸಾಂಕ್ ತುಕಾ ವಿಕ್ಲೊ
ಪೆದ್ರುನ್ ಪರ್‍ಯಾಂತ್ ಹಾಂವ್ ನೆಣಾಂ ಮ್ಹಣ್ ತೀವ್ರ್ ನೆಗಾರ್ ಹಾಡ್ಲೊ
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಪಿಲಾತ್ ಪರ್‍ಯಾಂತ್ ಚೂಕ್ ಮೆಳನಾಸ್ತಾಂ ಹಾತ್ ಧುಂವ್ಚ್ಯಾಕ್ ಲಾಗ್ಲೊ
ಜುದೆವಾಂ ಆದಿಂ ದಿವುನ್ ತುಕಾ ಆಪ್ಲ್ಯಾ ರಾವ್ಳೆರಾ ಕುಶಿನ್ ಘುಸ್ಲೊ
ಜೆರ್ಬಾಂದಾಚೆ ಮಾರ್ ಖಾವ್ನ್ ತುಂ ಸಗ್ಳೊಚ್ ಕಂಗಾಲ್ ಜಾಲೊಯ್
ಕಾತ್ ಕಾತ್ರುನ್, ಶಿರೊ ಫುಟೊನ್, ರಗ್ತಾನ್ ಸಗ್ಳೊಚ್ ಬುಡ್ಲೊಯ್
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಕಾಂಟ್ಯಾಂ ಮುಕುಟ್ ಧಾಡಾವ್ನ್ ಮಾತ್ಯಾರ್ ಜುದೆವ್ ಬರೆಚ್ ಹಾಸ್ಲೆ
ರಾಯಾಂ ರಾಯ್ ಮ್ಹಣ್ ದಿಂಬಿ ಮಾರುನ್ ಕೊಲಾಂವ್ಕ್ ತುಕಾ ಲಾಗ್ಲೆ
ತೊಂಡಾರ್ ತುಜ್ಯಾ ಥಿಂಪಿ ಉಡವ್ನ್ ನಾಲಿಸಾಯ್ ತಾಂಣಿ ಹಾಡ್ಲಿ
ತುಜ್ಯಾ ದೆವಾಕ್ ಆಪಯ್, ಸುಟ್ಕಾ ಲಾಭಯ್ ಕೊಲಾವ್ಣಿ ತಾಂಣಿ ಕೆಲಿ
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ತರೀ ತುಂವೆಂ ಖುರ್ಸಾರ್ ಥಾವುನ್ ಬಾಪಾಚೆಂ ಭೊಗ್ಸಾಣೆಂ ಮಾಗ್ಲೆಂಯ್
ಖಾಲ್ತ್ಯಾ ಪಯ್ಕಿ ಖಾಲ್ಯ್ತೊ ಜಾವುನ್ ಸರ್‍ವಾಂಕ್ ಏಕ್ ಶಿಕಪ್ ದಿಲೆಂಯ್
ಖಾಂದಿಂ ಖುರಿಸ್ ವ್ಹಾವವ್ನ್ ತುಂ ಕಾಲ್ವಾರ್ ದೊಂಗರ್ ಚಡ್ಲೊಯ್
ತಾಂಕನಾಸ್ತಾಂ ಖರ್ಶೆವ್ನ್ ಖರ್ಶೆವ್ನ್, ತೀನ್ ಪಾವ್ಟಿಂ ಪಡ್ಲೊಯ್
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಮರಿ ಆಪ್ಲ್ಯಾ ಪುತಾಕ್ ಪಳೆವ್ನ್ ಸಗ್ಳಿಚ್ ದೆಧೆಸ್ಪೊರ್ ಜಾಲಿ
ಖುರಿಸ್ ಖಾಂದಾರ್ ಮುಕುಟ್ ಮಾತ್ಯಾರ್, ಧರ್ಣಿರ್ ತಿ ಗಳ್ಳಿ
ವಸ್ತುರ್ ಕಾಡುನ್, ಖಿಳೆ ಮಾರುನ್, ಖುರ್ಸಾರ್ ತಾಂಣಿ ಬಾಂದ್ಲೊ
ಚೊರಾಂ ಮಧೆಂ ದೊಂಗ್ರಾರ್ ಉಬಾರುನ್ ಶಿರ್ಕೊ ಪಿಯೆಂವ್ಕ್ ದಿಲೊ
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ದೆವಾ ಅಧೀನ್ ಜಾಲೊಯ್ ಕಳ್ತಚ್, ತುಕಾ ಖುರ್ಸಾಥಾವ್ನ್ ಕಾಡ್ಲೊ
ಮರಿಯೆಕಡೆನ್ ದಿವುನ್ ತುಕಾ ಜಮೊ ನಪಯಿಂಚ್ ಜಾಲೊ
ಘಡ್ಗಡೊ-ಜಗ್ಳಾಣೆ ಎಕಾಚ್ಚಾಣೆ ಮಳಬ್ ಕಾಳೆಂಚ್ ಜಾಲೆಂ
ಶಿರಾಂಧಾರಿಚೊ ಪಾವ್ಸ್ ಯೆವುನ್ ಸಂಪಯ್ಲೆಂ ತುಜೆಂ ಜಿಣೆಂ
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಮುಖಮಳ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಜುವಾಂವ್ ಎಕ್ಲೊಚ್ ಲಾಗಿಂ ಆಸ್ಲೊ ಮರ್ಯೆಕ್ ಶಾಂತಿ ದಿವುಂಕ್
ಮರ್ಣಾ ಮಾಟ್ಯಾಂತ್ ತುಜಿ ಕೂಡ್ ದವ್ರುನ್ ಘರಾ ತಿಕಾ ಪಾವೊಂಕ್
ರಡ್ಲಲೆ ದೊಳೆ, ಕಡ್ಲಲೆಂ ಕಾಳೀಜ್, ತಿಚೆಂ ದೂಕ್ ಕೊಣ್ ವರ್ಣಿತ್?
ಆಪ್ಲ್ಯಾ ತರ್ನ್ಯಾ ಪುತಾಕ್ ಹೊಗ್ಡಾಯ್ಲಲೊ ಅಘಾತ್ ಮರಿ ಕಶಿ ಸೊಶಿತ್?
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಪಿಂತುರ್ ತೆಂ ಪಳೆತಾನಾ
ಕಿತ್ಯಾಕ್ ಅಶೆಂ ಘಡ್ಲೆಂ ತುಕಾ ಚಿಂತುಂಕ್ ಭಿಲ್ಕುಲ್ ಸಕನಾ!
ಕುರ್ಡ್ಯಾಂಕ್ ದೀಷ್ಟ್, ಕೆಪ್ಪ್ಯಾಂಕ್ ಆಯ್ಕಾಪ್ ಆಜ್ಯಾಪಾನ್ ತುಂವೆಂ ಕೆಲೆಂಯ್
ಲಾಜರಾಸಾಚೆಂ ಮೆಲ್ಲೆಂ ಮೊಡೆಂ ಜಿವ್ಯಾ ರುಪಾಕ್ ತುಂವೆಂ ಹಾಡ್ಲೆಂಯ್
ಮರಿ ಮಾಗ್ದಲೆನಾಕ್ ಜುದೆವಾಂನಿ ಫಾತ್ರಾಂವ್ಚ್ಯಾಂತ್ಲೆಂ ರಾಕ್ಲೆಂಯ್
ಖಂಯ್ಚೆಂ ಬರೆಂ, ಖಂಯ್ಚೆಂ ವಾಯ್ಟ್ ವೊಪಾರಿಂ ಮುಕಾಂತ್ರ್ ಸಾಂಗ್ಲೆಂಯ್
ಕಾಳೀಜ್ ಪೆಟ್ತಾ, ಮನ್ ಕಡ್ತಾ ಜಿಣಿ ತುಜಿ ವಾಚ್ತಾನಾ
ಸಂಸಾರ್ ಸಗ್ಳೊಚ್ ಕುರ್ಡೊ ಜಾಲಾ ತುಜೆಂ ಜಿಣೆಂ ನಾಸ್ತಾನಾ!
- ಓಸ್ಟಿನ್ ಪ್ರಭು, ಚಿಕಾಗೊ