ಆದೇವ್ಸ್

ಸಂಪಾದಕೀಯ್:

ಕವಿತೆಂತ್ಲಿಂ ಉತ್ರಾಂ ಲೆಗುನ್ ಅಪ್ರಾಧ್ಯಾಂಕ್ ಥಾಪ್ಡಾಂವ್ಕ್ ಕಮೀ ಪಡ್ತಾತ್

ಹಾಂಗಾಚ್ಯಾ ಕವಿಕ್ ಹೋಮ್ ಸ್ಟೇ ಘಡಿತಾನ್ ಸಂಪೂರ್ಣ್ ಉಚಾಂಬಳ್ ಕೆಲಾ. ತಾಚೆಂ ರಗತ್ ಹುನ್ ಜಾಲಾಂ, ಖತ್ಕತ್ತಾ. ತವಳ್ ತಾಚ್ಯಾ ತೊಂಡಾಂತ್ಲ್ಯಾನ್ ಉಚಾಂಬಳಿ, ಹುನೊವಿ ಉತ್ರಾಂ ಸರಾಗ್ ಭುಂಯ್ ಪಡ್ತಾತ್. ಮಾಗೀರ್ ಹ್ಯಾ ಉತ್ರಾಂಕ್ ಗಾಳಿ-ಸೊವೆ ಮ್ಹಳ್ಯಾರಿ ಜಾತಾ! ತೊ ಚಿಂತಾ, ಹಿ ಉತ್ರಾಂ ಲೆಗುನ್ ತಾಂಕಾಂ ಶಿಕ್ಷಾ ದೀಂವ್ಕ್ ಕಮೀ ಪಡ್ತಿತ್. 

ರಿಚ್ಚಿ ಜೊನ್ ಪಾಯ್ಸ್ ಅಂಕಣ್‌ಕಾರ್. ಕಾಂಯ್ ಅಪ್ರೂಪಾನ್ ಕವಿತಾ ಬರಯ್ತಾ. ಹೋಮ್ ಸ್ಟೇ ಘಡಿತಾಕ್ ಪ್ರತಿಕ್ರಿಯಾ ದಿಂವ್ಚಿ ತಾಚಿ ಹಿ ಶೈಲಿ ಕಸಲೊಚ್ ಮುಲಾಜೊ ನಾಸ್ತಾಂ ಹಾಂಗಾಸರ್ ಪರ್ಗಟ್ ಜಾಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಆದೇವ್ಸ್

ಬೇವರ್ಶ್ಯಾ..
ತುಂ ಹ್ಯಾ ನಾಂವಾಂ ಪ್ರಾಸ್ ವ್ಹರ್ತೊ
ಹೆಂ ನಾಂವ್ ತುಕಾ ಎಕ್ದಮ್ ಸಾರ್ಕೆಂ ಸೊಭನಾ
ಹಾಚೆ ಪ್ರಾಸ್ ವ್ಹರ್ತಿಂ ನಾಂವಾಂ ಆಸಾತ್
ಪುಣ್ ತುಜೆ ತಿತ್ಲ್ಯಾ ಕೀಳ್ ಮಟ್ಟಾಕ್ ದೆಂವೊಂಕ್ ಜಾಯ್ನಾ
ದೆಕುನ್ ಹಳ್ತ್ ನಾಂವ್ ತುಕಾ ದಿಲಾಂ
ಪಿಯೆಲ್ಯಾರ್ ಮಾತ್ರ್ ಧೈರ್
ನಾ ಜಾಲ್ಯಾರ್ ಭಿಂವ್ಕುರೆ ತುಮಿ
ಶಸ್ತ್ರಾವೀಣ್ ಸ್ರೀಯಾಂಕ್ ಆಪ್ಡುಂಕ್ ಅಧಿಕಾರ್ ಕೊಣೆ ದಿಲ್ಲೊ
ಖಂಯ್ಚೆಂ ಶಾಸ್ತ್ರ್ ತರೀ ಅಶೆಂ ಕರುಂಕ್ ಶಿಕಯ್ನಾ
ತಾಂಣಿ ತುಕಾ ಪಾಡ್ ಕಿತೆಂಯ್ ಕೆಲ್ಲೆಂನಾ
ತುಕಾ ಥಂಯ್ ಆಮಂತ್ರಣ್ ನಾತ್‌ಲ್ಲೆಂ
ಲಜ್ ನಾಸ್ತಾನಾ ಅಪಯ್ನಾತ್‌ಲ್ಲ್ಯಾಕಡೆನ್ ಗೆಲ್ಲೊಯ್
ತುಂ ಅತಿಕ್ರಮಿ
ತುಂವೆಂ ತಾಂಚಿ ಸ್ವತಂತ್ರತಾ ಪಿಡ್ಡ್ಯಾರ್ ಕೆಲಿಯ್

ಲಜ್ಮಡ್ಯಾ
ಸಂಸ್ಕೃತಿ ತುಕಾ ಕೆದಿಂಚ್ ಕಳ್ಚಿನಾ
ತುಜೆ ಆವಯ್ಕ್ ಆನಿ ಭಯ್ಣಿಂಕ್
ಹ್ಯಾ ಝಗ್ಡ್ಯಾಕ್ ಹಾಡಿನಾಂವ್
ತುಜ್ಯಾ ಬಾಪುಯ್ ಆನಿ ಭಾವಾಂಕಯ್
ತುಜೆ ಬಲಿಯೆ ತಿತ್ಲಿಂಚ್
ನಿರಾಪ್ರಾಧಿ ತಿಂ ಆಸೊಂಕ್ ಪುರೊ

ತುಂ ಬೇವರ್ಶ್ಯಾ..
ಆತಾಂ ತುಂ ಬಂಧಿ
ತುಜ್ಯಾ ಸ್ವಾತಂತ್ರ್ಯಾಕ್ ನಿರ್ಭಂದ್ ಘಾಲಾ
ಬಾರಾಂತ್ ಬಸೊನ್ ಘೊಟ್ಚ್ಯಾ ತುಜೆ
ಬಾರಾ ಬ್ರೇಸ್ತಾರ್ ಜಾಲ್ಯಾತ್
ಜಾಣಾಂವ್ ತುಜಿಂ ಹಾಡಾಂ ಮೊಡ್ಲ್ಯಾಂತ್
ಆತಾಂ ತಿಂ ಪಿಟೊ ಕರ್ತಿತ್ ತೆ
ತುಜಿ ಜಾಕೆಟ್ ಕಾಡ್ನ್
ತುಜ್ಯಾ ಹರ್ದ್ಯಾಕ್ ಪಿಂದುಂಕ್ ಪುರೊ
ತುಕಾ ಶಿಜಯಿಲ್ಲೆಂ ಪಿಯೆಂವ್ಕ್ ದಿಲೆಂ
ಭಾಜ್‌ಲ್ಲೆಂ ಖಾಂವ್ಕ್ ದಿಲೆಂ
ತುಕಾ ಥಂಯ್ ಧಾಡಲ್ಲ್ಯಾಂನಿ
ತುಜೆಂ ಪೋಟ್ ಆನಿ ಬೊಲ್ಸಾಂ ದೊನೀ ಭರ್ಲಿಂ
ಥಯಿಂಚ್ ಸುರಕ್ಶಿತ್ ರಾವ್
ಆಮಿ ಪಾತ್ಕಾಂ ಕರ್ಚಿಂ ನಾಕಾತ್
ಆಮಿ ತುಂ ನ್ಹಯ್
ದಯಾಕರುನ್ ಪಾಟಿಂ ಯೇನಾಕಾ
ಥಯಿಂಚ್ ರಾವ್|
ಕುಸೊನ್ ವಚ್
ಸೊಂಡಿ ತುಜಿ ಪಳೆಂವ್ಕ್ ಆಮ್ಕಾಂ ನಾಕಾ
ಆದೇವ್ಸ್...

-ರಿಚ್ಚಿ ಜೊನ್ ಪಾಯ್ಸ್