ಸಂಪಾದಕೀಯ್:
ಸುಖ್ ದೆಖ್ಚ್ಯೊ ದಿಷ್ಟಿ ವೆಗ್ಳ್ಯೊ ಜಾಲ್ಯಾರ್, ಫಳಾಂ ಚೆಂಚುನ್ ವೆತಾತ್
ಮಾಗೀರ್ ಹರ‍್ಯೆಕ್ಲೊ ಅಸಲೆಂಚ್ ಸುಖ್ ಆಶೆತಾ - ಜಾಂವ್ ತಿಂ ಭುಮಿ ವೈಕುಂಟಾಂತ್ಲಿಂ ಯಾ ರೆಸೊರ್ಟಾಂತ್ಲಿಂ ಆದಾಂವ್ ಆನಿ ಏವ್ ಯಾ ಲಜ್ ಮರ‍್ಯಾದ್ ನಾತಲ್ಲಿಂ ಮಾಂಕ್ಡಾಂ. ಸುಖ್ ಜೊಡ್ಚಿ ರೀತ್, ಸುಖ್ ದೆಖ್ಚಿ ರೀತ್ ಮಾತ್ರ್ ಹರ‍್ಯೆಕ್ಲ್ಯಾಂಚಿ ವೆವೆಗ್ಳಿ ಆಸ್ತಾ. ಥೊಡ್ಯಾಂಕ್ ವಿಂಚ್ಲಲಿಂ ಫಳಾಂ ಜಾಯ್, ಹೆರ್ ಥೊಡ್ಯಾಂಕ್ ಆಪಡ್ಲಲಿಂ ಫಳಾಂ ಜಾಯ್. ಪುಣ್ ಸಕ್ಡಾಂಕಯ್ ಎಕಾಚ್ ನಮುನ್ಯಾಚಿ ಭುಕ್. ಹಿ ಭುಕ್ ರಾವ್ತಾ ಮ್ಹಳ್ಳಿ ನಾ.
ಪೊರ‍್ಚ್ಯಾ ಪೋಯ್ರ್ ಮಂಗ್ಳುರಾಂತ್ ಘಡಲ್ಲೆಂ ಘಡಿತ್ ಲೆಗುನ್ ದಿಷ್ಟಿಂಚೆ ಫರಾಮಸೆನ್ ಘಡಲ್ಲೆಂ ಘಡಿತ್. ಮನ್ಶಾನ್ ಸುಖ್ ದೆಖ್ಚ್ಯೊ ದಿಷ್ಟಿ ವೆವೆಗ್ಳ್ಯೊ ಆಸೊಂಕ್ ಕಿತೆಂ ಕಾರಣ್? ಹ್ಯಾ ಖಾತೀರ್, ಎಕೆಕಾ ವ್ಯಕ್ತಿಚಿ, ಎಕೆಕಾ ಸಮಾಜಾಚಿ, ಎಕೆಕಾ ಸಮುದಾಯಾಚಿ ಚರಿತ್ರಾ ಖೊಲಾಯೆನ್ ಆಮಿ ಸಮ್ಜಜಾಯ್ ಪಡ್ತಾ. ತವಳ್ ಹಿಂ ಖವಂಚಾಂ ನಿಕ್ಳೊನ್, ರುಜ್ವಾತಿ ಭಾಯ್ರ್ ಪಡ್ತಾತ್.
ತಸಲೆಂ ಏಕ್ ಕಾಮ್, ರುಜ್ವಾತಿ ಸಂಸಾರಾಕ್ ದಾಕೊಂವ್ಚೆಂ ಕಾಮ್ ಹೆ ಕವಿತೆದ್ವಾರಿಂ ವಿಲ್ಸನಾನ್ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭುಮಿ ವೈಂಕುಟ್ ಆನಿ ಮಾಂಕ್ಡಾಸೈನ್
ಭುಮಿವಂಯ್ಕುಟ್ ಮ್ಹಳ್ಳ್ಯಾ
ಸೊಭಿತ್ ರೆಸೊರ್ಟಾಂತ್
ಸುಖ್ ಸೊದ್ತಾಲಿಂ
ಆದಾಂವ್ ಆನಿ ಏವ್.
ಫಳಾಕ್ ಘಾಸ್ ಮಾರ್‍ತಾಂ ಮ್ಹಣ್ತಾನಾ
ಧಾಡ್ ಘಾಲಿಚ್ ಮಾಂಕ್ಡಾಸಯ್ನಾನ್
ದೊಗಾಂಯ್ಕಿ ಪೊಪಾಂವ್ಕ್ ಹಾತ್ ಉಬಾರ್‍ತಾನಾ
ದಿಶ್ಟಿಕ್ ಪಡ್ಲೊ ಮಾಂಕ್ಡಾಸಯ್ನಾಕ್
ಫಳ್ ಖಾಂವ್ಕ್ ಪುಸ್ಲಾಂವ್ಚೊ ಸೊರೊಪ್
ಆನಿ ರೂಕ್ ಭರ್ ಫಳಾಂ!
ಖಿಣಾನ್, ರುಕಾಕ್ ಚಡ್‌ಲ್ಲ್ಯಾ ಮಾಂಕ್ಡಾಸಯ್ನಾನ್
ಹಾತಾಕ್ ಮೆಳ್‌ಲ್ಲಿಂ ಫಳಾಂ
ಸರ್‍ಸರಿತ್ ಭೊಕಾಯ್ಲಿಂ
ಥೊಡಿಂ ಆಪ್ಡುನ್ ಸೊಡ್ಲಿಂ!
ಆದಾಂವ್ ಯೇವ್‌ಯಿ ಲಜೆಲಿಂ ಬಿರ್ಮತ್
ಪೆಂಕ್ಡಾಕ್ ಪಾನಾಂ ಖೊವಯ್ಲಿಂ ತಾಣಿಂ
ಪೂಣ್ ಮಾಂಕ್ಡಾಸಯ್ನ್ ಲಜೆಲೆಂ ನಾ,
ತಾಂಚಿ ಭುಕ್‌ಯಿ ಥಾಂಬ್ಲಿನಾ!
ದೆವಾಂ-ದೆವಾಂಚ್ಯಾ ಪಾಟ್ಲಾವ್‌ದಾರಾಂಮದೆಂ
ದೆವಾಂಚ್ಯಾಚ್ ಸಮ್ಜಣೆವೀಣ್
ಘಡ್‌ಲ್ಲಿ ಫರಾಮಸ್ ಹಿ!
ಅಕ್ರೇಕ್ ದಿಶ್ಟಿಕ್ ಪಡ್‌ಲ್ಲ್ಯಾ ದೆವಾನ್
ಮಾಂಕ್ಡಾಸಯ್ನಾಕ್ ಎಕೇಕ್
ಝಾಡ್ ದೀವ್ನ್ ಧಾಡ್ಲೆಂ
ರೋವ್ನ್ ವ್ಹಡ್ ಕರುಂಕ್
ಆನಿ ಲಜ್ ದಿಸ್ಲ್ಯಾರ್ ಪಾನಾಂ ಖುಂಟುನ್
ಪೆಂಕ್ಡಾಕ್ ಖೊವಂವ್ಕ್!
ಪರಿಣಾಮ್ ಆತಾಂ....
ಗಾಂವ್‌ಭರ್ ನಾಗ್‌ಬೊಣಾಂ,
ಫಾತ್ರಾ ಸೊರ್ಪಾಕ್ ದೂಧ್,
ತಾಕಾಯ್ ಭಕ್ತಿಪಣಾನ್ ಪುಜಾ!
ಆನಿ,
ಫಾಂಟ್ಯಾ ಫಾಂಟ್ಯಾಂನಿ ಮಾಂಕ್ಡಾಸಯ್ನ್,
ಫಳಾಂಕ್ ಆಂವ್ಡೆಂವ್ಚಿ ಬೂಧ್,
ಚಿಂತ್ಪಿ ಮನ್ಶಾಂಕ್ ಇಜಾ!!
-ವಿಲ್ಸನ್, ಕಟೀಲ್