ಮ್ಹಜಿ ಸತ್ರಿ ಶೆಣ್ಲಿ

ಸಂಪಾದಕೀಯ್ / संपादकीय:

ಸತ್ರಿ ಮೆಳನಾಸ್ತಾಂ ಉರಜಾಯ್ ಜಾಲ್ಯಾರ್ ಗರ್ಜ್ ಕೊಣಾಚಿ ತರೀ ಆಸ್ತಲಿ!

ಹಾಂಗಾಸರ್ ಗರ್ಜೆಚಿ ಸತ್ರಿ ಶೆಣ್ಲ್ಯಾ. ಕಿತ್ಲೆಂ ಸೊಧ್ಲ್ಯಾರಯ್ ತಿ ಮೆಳನಾ. ಜಾಯ್ತೆಪಾವ್ಟಿಂ ಶೆಣಿಲ್ಲೆ ಪಯ್ಶೆ, ಮೊಬಾಯ್ಲ್, ದಾಗಿನೆ ಲೆಗುನ್ ಪಾಟಿಂ ಮೆಳ್ತಾತ್. ಪುಣ್ ಹಿ ಸತ್ರಿ ಮಾತ್ರ್ ಪಾಟಿಂ ಮೆಳನಾ. ಕಾರಣ್ ಕಿತೆಂ ಜಾಯ್ತ್?

ಮ್ಹಾಕಾ ಸತ್ರೆಚಿ ಗರ್ಜ್ ಆಸಾ ಜಾಲ್ಯಾರ್; ಪಾವ್ಸಾಕ್ ಮ್ಹಾಕಾ ಭಿಜೊಂವ್ಚಿ, ಮ್ಹಜೆ ಉಗ್ತೆ ಕಾತಿರ್ ಮಿರಂವ್ಚಿ, ಮ್ಹಜೆ ಲಾಗಿಂ ಖೆಳ್ಚಿ, ಎಕಾ ಪಿಶ್ಯಾ ಮೋಗ್ ಕರ‍್ಣಾರಾಕ್ ಜಾಂವ್ಚೆ ತಸಲಿ ಆಶಾ ಉದೆಲ್ಯಾ. ಹಿ ಆಶಾ ಮಾಗೀರ್ ಪಾವ್ಸಾಚಿ ಗರ್ಜೂಚ್ ಮ್ಹಣ್ಯಾಂ. ತ್ಯಾ ದೆಕುನ್ ಹಿ ಸತ್ರಿ ಶೆಣಲ್ಲಿಂ ಮೆಳನಾ.

ಮಾಗೀರ್ ಮ್ಹಾಕಾಯ್ ಹ್ಯಾ ಪಾವ್ಸಾಂತ್ ನ್ಹಾಂವ್ಕ್ ಜಾಯ್ ಮ್ಹಣ್ ದಿಸ್ತಾ. ತ್ಯಾ ದೆಕುನ್ ಕಿತ್ಲೆಂ ಸೊಧ್ಲ್ಯಾರಯ್ ಸತ್ರಿ ಮೆಳನಾ ಆಸ್ತಲಿ!

-ಮೆಲ್ವಿನ್ ರೊಡ್ರಿಗಸ್ / मेलवीन रोड्रिगस

ಕವಿತಾ:

ಮ್ಹಜಿ ಸತ್ರಿ ಶೆಣ್ಲಿ

ಮ್ಹಜಿ ಸತ್ರಿ ಶೆಣ್ಲಿ...
ತಶಿ ನವೀದಾದ್ ಕಾಂಯ್ ನಾ ತಾತುಂತ್,
ದರ್ ವರ್ಸಾ ಪ್ರಮಾಣ್
ತಿಣೆ ಆಪ್ಲಿ ರೀತ್ ಪಾಳ್ಳಿ

ಬಶೀಂತ್, ದುಕಾನಾರ್, ಒಫಿಸಾನ್, ಹೊಟೆಲಾಂತ್,
ತಿ ದರ್ ಫಾವ್ಟ್ ಶೆಣ್ಟಾ,
ಮ್ಹಜೀಚ್ ಕಿತ್ಯಾಕ್,
ತಾಚಿ, ತಿಚಿ, ಸಗ್ಳ್ಯಾಂಚೀಚ್ ಶೆಣ್ಟಾ....

ಹರ್ಶಿಂ ಶೆಣಿಲ್ಲೆ ಪಯ್ಶೆ, ಮೊಬಾಯ್ಲ್,
ದಾಗಿನೆಂ ಲೆಗೀತ್ ಪರತ್ ಮೆಳ್ಟಾ
ಮಾತ್ ಸತ್ರಿ ಮ್ಹಜಿ ಸದಾಂಚ್,
ಹ್ಯಾ ನೆಮಾಕ್ ಅಪ್ವಾದ್ ಥಾರ್ತಾ

ಸತ್ರಿ ಹಾತಾಕ್ ಲಾಗ್ನಾ ಜಾಲ್ಲ್ಯಾನ್
ಹಾಂವೆಂ ಮಳ್ಬಾ ಕಡೆನ್ ಪಳಯ್ಲೆಂ,
ಕಿಟ್ಟ್ ಕಾಳ್ಯಾ ಕುಪಾಂತಲ್ಯಾನ್
ಪಾವ್ಸಾನ್ ಲ್ಹವೂಚ್ ಶಿಟ್ಕಾಯಲೆಂ.

ಸೊದೂನ್ ಕಾಡ್ಲೆಚ್ ಹಾಂವೆಂ
ಸತ್ರಿ ಶೆಣ್ಪಾಚೆ ಗುಪೀತ್
ವೆಂಗೆಂತ್ ಘೆಂವ್ಕ್ ಆತೂರ್ ಜಾಲ್ಲ್ಯಾ ಪಾವ್ಸಾನ್
ಜೆನ್ನಾ ದೊಳ್ಯಾಂನೀಚ್ ಖುಣಯ್ಲೆಂ.

-ಅನ್ವೇಷಾ ಸಿಂಗ್‌ಬಾಳ್

म्हजी सत्री शेणली...

म्हजी सत्री शेणली...
तशी नवीदाद कांय ना तातुंत,
दर वर्सा प्रमाण
तिणे आपली रीत पाळ्ळी

बशींत, दुकानार, ऑफीसान, हॉटेलांत,
ती दर फावट शेणटा,
म्हजीच कित्याक,
ताची, तिची, सगळ्यांचीच शेणटा....

हरशीं शेणील्ले पयशे, मोबायल,
दागिनें लेगीत परत मेळटा
मात सत्री म्हजी सदांच,
ह्या नेमाक अपवाद थारता

सत्री हाताक लागना जाल्ल्यान
हांवे मळबा कडेन पळयलें,
किट्ट काळ्या कुपांतल्यान
पावसान ल्हवूच शिटकायलें.

सोदून काडलेच हांवे
सत्री शेणपाचे गुपीत
वेंगेत घेवंक आतूर जाल्ल्या पावसान
जेन्ना दोळ्यांनीच खूणयलें.

-अन्वेषा सिंगबाळ