ನಿಮಾಣಿ ಕವಿತಾ

ಸಂಪಾದಕೀಯ್ / संपादकीय:

ಲಿಲಾಂವಾಕ್ ಉಬಿ ಏಕ್ ಕವಿತಾ, ನಿಮಾಣಿ ಕವಿತಾ!

ಆಮಿ ಹೆಂಚ್ ಉಲೊವ್ನ್ ಆಸಲ್ಲ್ಯಾಂವ್. ಸಮಾಜಾಂತ್ ಕಿತೇಂಯ್ ಅನಾಉತ್ ಘಡ್ತಾನಾ ಕವಿ ಜಾವ್ನ್ ಆಮ್ಚಿ ಜವಾಬ್ದಾರಿ ಕಿತೆಂ? ತ್ಯಾ ದೆಕುನ್ ಆಯ್ಲೆವಾರ್ ಕವಿತಾ ಕುಳಾರಾಂತ್, ಹೋಮ್ ಸ್ಟೇ ಆಕ್ರಮಣಾಕ್ ಸ್ಪಂದನ್ ಕರುನ್ ಮ್ಹಳ್ಳೆಬರಿ ಕವಿತಾಂಚೊ ದಾಳೊಚ್ ಆಯ್ಲೊ. ಪುಣ್ ಸ್ಪಂದನ್ ಕರಿನಾತಲ್ಲೆ ಕಿತ್ಯಾ ಖಾತೀರ್ ತಶೆಂ ಕರ‍್ತಾತ್ ಆನಿ ತಶೆಂ ಕರುನ್ ತಾಂಚಿ ಕವಿತಾ ಕಿತೆಂ ಜಾತಾ ಮ್ಹಳ್ಳೆವಿಶಿಂ ರಾಜಶ್ರೀ ಸೈಲಾನ್ ಆಪುರ್ಬಾಯೆನ್ ಏಕ್ ವಿಚಾರ್ ಹಾಂಗಾಸರ್ ಮಾಂಡ್ಲಾ.

ಜಾಯ್ತೆ ಪಾವ್ಟಿಂ ಆಮಿ ಕವಿ ಮೊನೆ ಕಿತ್ಯಾಕ್? ಆಮಿ ಅಸಹಾಯಕ್ ಕಿತ್ಯಾಕ್ ಜಾತಾಂವ್? ಹ್ಯಾ ಸವಾಲಾಂಕ್ ಆಮಿಂಚ್ ಜಾಪ್ ಸೊಧಿಜಾಯ್ ಜಾಲ್ಯಾ.

ಹೆ ಕವಿತೆಚೊ ನಿಮಾಣೊ ಕಡ್ವೊ ಮಾತ್ರ್ ಹರ‍್ಯೆಕಾ ಮೊನ್ಯಾ ಕವಿಂಕ್ ಜಾಪ್ ದಿತಾ. ಹಾಂಗಾಸರ್ ಕವಿಚಿ ಕವಿತಾ ಲಿಲಾಂವಾಕ್ ಆಯ್ತಿ ಜಾಲ್ಯಾ!

लिलांवाक उबी एक कविता, निमाणी कविता!

आमी हेंच उलोवन आसल्ल्यावं. समाजांत कितेंय अनाऊत घडताना कवी जावन आमची जवाब्दारी कितें? त्या देकून आयलेवार कविता कुळारांत, होम स्टे आक्रमणाक स्पंदन करून म्हळ्ळेबरी कवितांचो दाळोच आयलो. पूण स्पंदन करिनातल्ले कित्या खातीर तशें कर‍्तात आनी तशें करून तांची कविता कितें जाता म्हळ्ळेविशीं राजश्री सैलान आपुरबायेन एक विचार हांगासर मांडला.

जायते पावटीं आमी कवी मोने कित्याक? आमी असहायक कित्याक जातावं? ह्या सवालांक आमिंच जाप सोधिजाय जाल्या.

हे कवितेचो निमाणो कडवो मात्र हर‍्येका मोन्या कविंक जाप दिता. हांगासर कविची कविता लिलांवाक आयती जाल्या!

-ಮೆಲ್ವಿನ್ ರೊಡ್ರಿಗಸ್ / मेलवीन रोड्रिगस

ಕವಿತಾ / कविता:

ನಿಮಾಣಿ ಕವಿತಾ

ಆಕಾಂತ್‌ವಾದ್ ವಿದ್ರೋಹ್ ಸ್ವಾರ್ಥ್ ಅಹಂಕಾರ್
ಹಾಂಚೆ ಮಧಿಂ ಘುಸ್ಮಟತ್
ಅಸಹಾಯ್ಯ್ ದುರ್ಬಳ್ ಅಶಿ
ಉಬಿ ಮ್ಹಜಿ ಕವಿತಾ

ದರ್ ಎಕಾ ನಿಷ್ಪಾಪ್ ರುಪ್ಡ್ಯಾ ಫಾಟ್ಲ್ಯಾನ್
ಏಕ್ ಏಕ್ ಭಯಾನಕ್ ರಾಕೆಸಿ ಚೆರೊ
ತಾಂಚೆ ಮಧಿಂ ಶಾಶ್ವತ್ ನಿರಾಗಸ್ತಾಯ್
ಸೊಧೀತ್ ಧಡ್‌ಪಡತ್...
ಎಕಾ ಕೊನ್ಶಾಕ್ ಉಬಿ ಮ್ಹಜಿ ಕವಿತಾ

ವಾಟೆ ವಾಟೆರ್ ಬಾಜಾರ್
ದರ್ ಎಕಾಚ್ಯಾ ಚೆಹರ‍್ಯಾರ್
ಹಿ ಬಾಜಾರೂ ಗಲ್ಲೆ ಭರು ವೃತ್ತಿ

ಮ್ಹಣಚ್ ಸ್ವತಾಚೆ ಸಂವೇದನ್‍ಶೀಳತೆಚೊ ಮ್ಹೊಂವಾಳ್‌ಪಣಾಚೊ
ಮಾಂಡ್ ಮಾಂಡುನ್ ಯುಗಾಚ್ಯಾ ಅಂತಾಂತ್ಲಿ
ಹಿ ನಿಮ್ಣಿ ಕವಿತಾ ವಿಕುಂಕ್ ಬಸ್ಲ್ಯಾ
ಮ್ಹಜಿ ಕವಿತಾ

-ರಾಜಶ್ರೀ ಸೈಲ್ / राजश्री सैल