ಸಂಪಾದಕೀಯ್:
ವಿಣ್ಗೆಪಣ್ ವಿಣ್ಗೆಂ ಕರ‍್ಚಿ ಎರಿಕ್ ಸೋನ್ಸಾಚಿ ಕವಿತಾ
ವೆವೆಗ್ಳ್ಯಾ ಗರ್ಜಾಂ ಖಾತೀರ್, ವೆವೆಗ್ಳ್ಯಾ ಸಂದರ್ಭಾಂನಿ ಏಕ್ ಸ್ತ್ರೀ ವಿಣ್ಗಿ ಜಾಲ್ಯಾ ಜಾಂವ್ಕ್ ಪುರೊ, ವಿಣ್ಗಿ ಉರ‍್ಲ್ಯಾ ಜಾಂವ್ಕ್ ಪುರೊ. ಎವೆಚ್ಯಾ ಕಾಳಾರ್ ವಿಣ್ಗೆಪಣಾಕ್ ಮಹತ್ವ್ ನಾತಲ್ಲೆಂ. ವಿಣ್ಗೆಪಣ್ ಜಿವಿತಾಚಿ ರೀತ್ ಆಸಲ್ಲಿ. ಬಾಳ್ಶಾಚ್ಯಾ ವಿಣ್ಗೆಪಣಾಂತ್ ಆಮಿ ನಿಸ್ಕಳ್, ನಿರ್ಮಳ್ ಮನ್ಶಾ ರಚ್ಣೆಚೆಂ ಅದ್ಭುತ್ ದೆಖ್ತಾಂವ್. ಆಪ್ಣಾಚೆ ಕುಡಿಚೆರ್ ನಿಯಂತ್ರಣ್ ದವರ‍್ಚೆ ದಿಶೆನ್ ಅಕ್ಕಮಹಾದೇವಿ ತಸಲ್ಯಾಂನಿ ವಿಣ್ಗೆಂ ರಾವೊನ್, ದೆಖ್ಚ್ಯಾ ದೊಳ್ಯಾಂನಿ ಆಸ್ಚೆ ಕಾಮುಕತೆಕ್ ಚಿಲ್ಲುನ್ ಉಡಯ್ಲಾಂ. ಮಾಗೀರ್, ದಾದ್ಲ್ಯಾಚೆ ಕಾಮುಕತೆಕ್ ಬಲಿ ಜಾವ್ನ್ ಬಾಯ್ಲಾಂನಿ ವಿವಸ್ತ್ರ್ ಜಾಂವ್ಚಿಂ ಸನ್ನಿವೆಶಾಂ ಉಣಿಂ ನಾಂತ್.
ಪುಣ್ ಹಾಂಗಾ ಕವಿ ಜ್ಯಾ ವಿಣ್ಗೆಪಣಾಚೊ ಉಲ್ಲೇಕ್ ಕರ‍್ತಾ, ತ್ಯಾ ವಿಣ್ಗೆಪಣಾಂತ್ ಮನ್ಶಾಚ್ಯಾ ಚಿಂತಪ್ ಕಿತ್ಲೆಂ ಪೊಕೊಳ್, ಅರ್ಥಾವೀಣ್, ದಳ್ದಿರೆಂ ಜಾವ್ನ್ ಘುಂವೊನ್ ಆಸಾ ಮ್ಹಳ್ಳೆಂ ಕಳ್ತಾ. ಅಸಲ್ಯಾ ವಿಣ್ಗೆಪಣಾಚೊ ಮಾಧ್ಯಮಾ ದ್ವಾರಿಂ ಸಂಭ್ರಮ್ ಚಲ್ತಾ.
ಅಸಲ್ಯಾ ಎಕಾ ಚಿಂತ್ಪಾಚೆರ್ ಬೋವ್ ಸುಂದರ್ ರಿತಿನ್ ಎರಿಕ್ ಸೋನ್ಸಾನ್ ಸವಾಲ್ ಉಡಯ್ಲಾಂ. ಸರ್ವಾಂನಿ ಚಿಂತಿಶೆಂ ಕರ‍್ಚೆಬರಿ ಕವಿತಾ ವಿಣ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾ ವಿಣ್ಗೆಂ ಜಾಂವ್ಕ್ ಆಸಾ
ಏಕ್ ಮಾಮೂಲಿ ಆಶಾ ಮ್ಹಜಿ
ವಿಣ್ಗೆಂ ಜಾಯ್ಜಾಯ್ ಮ್ಹಾಕಾ
ವಿಣ್ಗೆಂ? ಓಹ್, ಎವೆಬರಿ
ಸಗ್ಳೆಂ ಮುಕ್ತ್ ಮುಕ್ತ್
ಮ್ಹೆಳೆಂ ನಾತಲ್ಲೆಂ, ಆಪುಟ್
ಪಾತ್ಕಾ ಸೈಂಭ್ ನಾತಲ್ಲೆ ದೆವಾರಚ್ನೆಬರಿ
ಪಾಶಾಂವಾ ರಹಿತ್ -ನಿತಳ್, ನಿರ್ಮಳ್
ತಸಲೆಂ ವಿಣ್ಗೆಪಣ್, ನೇಂ?
ಛೇ ಛೇ, ಹಾಂವ್ ಕಿರ್ಕೊಳ್ ಮನೀಸ್
ತಿತ್ಲ್ಯಾ ಪವಿತ್ರಪಣಾಚೆಂ ನ್ಹಯ್
ತಸಲೆಂ ವಿಣ್ಗೆಪಣ್ ನ್ಹಯ್
ಪುಣ್, ವಿಣ್ಗೆಂ ಜಾಯ್ಜಾಯ್ ಮ್ಹಾಕಾ
ಓಹ್, ಕಳ್ಳೆಂ ಕಳ್ಳೆಂ, ಬಾಳ್ಶಾಬರಿ
ಲಜೆಚಿ ಪರ‍್ವಾನಾಸ್ತಾಂ, ಮಾಸೂಮ್
ಕೊಣ್ ಕಿತೆಂ ಚಿಂತಾ ಮ್ಹಳ್ಳಿ ಖಂತ್ ನಾಸ್ತಾಂ
ಆಪ್ಣಾಚ್ಯಾಚ್ ಸಂಸ್ರಾಂತ್ ಲೀನ್-ತಲ್ಲೀನ್
ತಸಲೆಂ ವಿಣ್ಗೆಪಣ್, ವ್ಹಯ್‌ಮೂ?
ಕಿತೆಂ ಉಲಯ್ತಾತ್ ತುಮಿ?
ಬಾಳ್ಶಾಚೆಂ ಚಿಂತಪ್ ಆನಿ ತುಮಿ!
ತಸಲೆಂ ವಿಣ್ಗೆಪಣ್ ನ್ಹಯ್
ತರಯ್ ವಿಣ್ಗೆಂ ಜಾಯ್ಜಾಯ್ ಮ್ಹಾಕಾ
ಆಹಾಂ! ಅಕ್ಕ ಮಹಾದೇವಿಬರಿ
ಸಂಸಾರಚ್ ಸಾಂಡಲ್ಲ್ಯಾಚೊ ಧ್ಯೋತಕ್ ಜಾವ್ನ್
ವಸ್ತ್ರಾಚೊ ತ್ಯಾಗ್ ಕರ‍್ನ್, ಕೇಸ್ ಪಾಂಗರ‍್ಲೆ ತಿಣೆಂ
ಲಬ್ದೊನ್ ರಾಂವ್ಚಿ ವೋಡ್ ಕಾಡ್ನ್ ಉಡೊಂವ್ಕ್
ವಸ್ತ್ರಾಚೊ ತೀರ್ ಸೈತ್ ದವರುಂಕ್ ನಾ ತಿಣೆಂ
ತಸಲೆಂ ವಿಣ್ಗೆಪಣ್? ವ್ಹಾ ...ವ್ಹಾ....
ಅಯ್ಯೋ! ಹೆಂ ತುಮ್ಚೆಂ ಮಹಾನ್ ಚಿಂತಪ್
ತುಮ್ಚೆ ಥಂಯಿಂಚ್ ಆಸೊಂದಿ
ತಸ್ಲೆಂ ನ್ಹಯ್, ಪುಣ್ ವಿಣ್ಗೆಂ ಜಾಯ್ಜಾಯ್ ಮ್ಹಾಕಾ
ಕಳ್ಳೆಂ ಕಳ್ಳೆಂ, ಇಂಡಿಯನ್ ಆರ್ಮಿಕ್ ದಿಲ್ಲ್ಯಾ
ಲೆಕಾವ್ಹರ್ತ್ಯಾ ಅಧಿಕಾರಾ ವಿರೋಧ್ ಝುಜೊಂಕ್
ಆಟ್ ವರ್ಸಾಂ ಆದಿಂ, ವಿಣ್ಗಿಂ ಜಾಲ್ಲ್ಯಾ
ತ್ಯಾ ಮಣಿಪುರಿ ಮದ್ಲೆ ಪ್ರಾಯೆಚ್ಯಾ
ಸ್ತ್ರೀಯಾಂಬರಿ, ಸಾರ್ಕೆಂಮೂ?
ಸಾಮಾಜಿಕ್ ಜಾಗೃತೆ ಪಾಸತ್
ವಿಣ್ಗೆಂ ಜಾಂವ್ಚೆಂ, ವ್ಹಾ ವ್ಹಾ, really great!
ಓಹ್, No..
ಮ್ಹಾಕಾ ವಿಣ್ಗೆಂ ಜಾಂವ್ಕ್ ಜಾಯ್
ತುಮ್ಚೆ ಎವೆಬರಿ, ತುಮ್ಚ್ಯಾ ಬಾಳ್ಶಾಬರಿ ನ್ಹಯ್
ತುಮ್ಚಿ ಅಕ್ಕಮಹಾದೇವಿ, ತುಮ್ಚ್ಯಾ ಮಣಿಪುರಿ ಸ್ತ್ರೀಯಾಂಬರಿ ನ್ಹಯ್
ತಾಂಚೆಂ ವಿಣ್ಗೆಪಣ್‌ಯ್ ಏಕ್ ವಿಣ್ಗೆಪಣ್?
ಕ್ಲಾಸೀ ಆಸೊಂಕ್ ಜಾಯ್, ಸ್ಟೈಲ್ ಆಸೊಂಕ್ ಜಾಯ್
ಮ್ಹಾಕಾ ತರ್ ವಿಣ್ಗೆಂ ಜಾಯ್ಜಾಯ್ ಪೂನಮ್ ಪಾಂಡೇಬರಿ
ಇಂಡಿಯನ್ ಕ್ರಿಕೆಟ್ ಟೀಮ್ ವಿಶ್ವಕಪ್ ಜಿಕತ್ ತರ್
ವಸ್ತುರ್ ದೆಂವಯ್ತಾಂ ಮ್ಹಳ್ಳ್ಯಾ ತಾಚೆಬರಿ
ಕಿತೆಂ ನೇಮ್! ಕಿತೆಂ ಫೇಮ್!
ಸಂಸ್ರಾಂತ್ಲ್ಯಾ ಮುಕೆಲ್ ಕ್ಯಾಲಂಡರಾಂನಿ
ಪರ್ಜಳ್ಚೊ ಆವ್ಕಾಸ್ ದಿಂವ್ಚೆಂ ವಿಣ್ಗೆಪಣ್
ಮಾಧ್ಯಮಾಚ್ಯಾ ಸಂಸ್ರಾಂತ್
ಖಂಯ್ ನಾತಲ್ಲೆಂ ನಾಂವ್ ಜೊಡುಂಕ್ ಕರ‍್ಚೆಂ ವಿಣ್ಗೆಪಣ್
ತುಮಿ ದಿಲ್ಲ್ಯಾ ದಾಕ್ಲ್ಯಾಂಚೆಂ ವಿಣ್ಗೆಪಣ್
ಲೊಕಾಮತಿಂತ್ ಜಾಗೆ ಜಾಂವ್ಕ್ ಸೊಡಿನಾತಲ್ಲೆಬರಿ
ಹಾಂವ್ ವಿಣ್ಗಿಂ ಜಾಂವ್ಕ್ ಆಶೆತಾಂ
ಕೆನ್ನಾಂ ಪೂನಮ್ ಪಾಂಡೇ ಜಾತಾಂ
ಕೆನ್ನಾಂ ಸನ್ನಿ ಲಿಯೋನ್ ಜಾತಾಂ
ಕೆನ್ನಾಂ ಪೂನಮ್ ಪಾಂಡೇ ಜಾತಾಂ
ಕೆನ್ನಾಂ ಸನ್ನಿ ಲಿಯೋನ್ ಜಾತಾಂ,
ಜಾವ್ನಚ್ ಆಸ್ತಾಂ..
-ಎರಿಕ್ ಸೋನ್ಸ್, ಬಾರ್ಕೂರ್
संपादकीय:
विणगेपण विणगें कर्ची एरीक सोन्साची कविता
वेवेगळ्या गर्जां खातीर, वेवेगळ्या संदर्भांनी एक स्त्री विणगी जाल्या जावंक पुरो, विणगी ऊर्ल्या जावंक पुरो. एवेच्या काळार विणगेपणाक महत्व नातल्लें. विणगेपण जिविताची रीत आसल्ली. बाळशाच्या विणगेपणांत आमी निसकळ, निर्मळ मनशा रचणेचें अदभूत देख्तावं. आपणाचे कुडिचेर नियंत्रण दवर्चे दिशेन अक्कमहादेवी तसल्यांनी विणगें रावोन, देखच्या दोळ्यांनी आसचे कामुकतेक चिल्लून उडयलां. मागीर, दादल्याचे कामुकतेक बली जावन बायलांनी विवसत्र जावंचीं सन्निवेशां उणीं नांत.
पूण हांगा कवी ज्या विणगेपणाचो उल्लेक कर्ता, त्या विणगेपणांत मनशाच्या चिंतप कितलें पोकोळ, अर्थावीण, दळदिरें जावन घुंवोन आसा म्हळ्ळें कळता. असल्या विणगेपणाचो माध्यमा द्वारीं संभ्रम चल्ता.
असल्या एका चिंत्पाचेर बोव सुंदर रितीन एरीक सोन्सान सवाल उडयलां. सर्वांनी चिंतिशें कर्चेबरी कविता विणल्या.
-मेलवीन रोड्रिगस
कविता:
म्हाका विणगें जावंक आसा
एक मामूली आशा म्हजी
विणगें जायजाय म्हाका
विणगें? ओह, एवेबरी
सगळें मुक्त मुक्त
म्हेळें नातल्लें, आपूट
पात्का सैंभ नातल्ले देवारचनेबरी
पाशांवा रहीत -नितळ, निर्मळ
तसलें विणगेपण, नें?
छे छे, हावं किर्कोळ मनीस
तितल्या पवित्रपणाचें न्हय
तसलें विणगेपण न्हय
पूण, विणगें जायजाय म्हाका
ओह, कळ्ळें कळ्ळें, बाळशाबरी
लजेची पर्वानासतां, मासूम
कोण कितें चिंता म्हळ्ळी खंत नासतां
आपणाच्याच संस्रांत लीन-तल्लीन
तसलें विणगेपण, व्हयमू?
कितें उलयतात तुमी?
बाळशाचें चिंतप आनी तुमी!
तसलें विणगेपण न्हय
तरय विणगें जायजाय म्हाका
आहां! अक्क महादेविबरी
संसारच सांडल्ल्याचो ध्योतक जावन
वसत्राचो त्याग कर्न, केस पांगर्ले तिणें
लब्दोन रावंची वोड काडन उडोवंक
वसत्राचो तीर सैत दवरुंक ना तिणें
तसलें विणगेपण? व्हा ...व्हा....
अय्यो! हें तुमचें महान चिंतप
तुमचे थंयिंच आसोंदी
तसलें न्हय, पूण विणगें जायजाय म्हाका
कळ्ळें कळ्ळें, इंडियन आर्मीक दिल्ल्या
लेकाव्हर्त्या अधिकारा विरोध झुजोंक
आट वर्सां आदीं, विणगीं जाल्ल्या
त्या मणिपुरी मदले प्रायेच्या
स्त्रीयांबरी, सार्केंमू?
सामाजीक जागृते पासत
विणगें जावंचें, व्हा व्हा,
really great!
ओह, No..
म्हाका विणगें जावंक जाय
तुमचे एवेबरी, तुमच्या बाळशाबरी न्हय
तुमची अक्कमहादेवी, तुमच्या मणिपुरी स्त्रीयांबरी न्हय
तांचें विणगेपणय एक विणगेपण?
क्लासी आसोंक जाय, स्टैल आसोंक जाय
म्हाका तर विणगें जायजाय पूनम पांडेबरी
इंडियन क्रिकेट टीम विश्वकप जिकत तर
वसतूर देंवयतां म्हळ्ळ्या ताचेबरी
कितें नेम! कितें फेम!
संस्रांतल्या मुकेल क्यालंडरांनी
पर्जळचो आवकास दिवंचें विणगेपण
माध्यमाच्या संस्रांत
खंय नातल्लें नावं जोडुंक कर्चें विणगेपण
तुमी दिल्ल्या दाकल्यांचें विणगेपण
लोकामतिंत जागे जावंक सोडिनातल्लेबरी
हावं विणगीं जावंक आशेतां
केन्नां पूनम पांडे जातां
केन्नां सन्नी लियोन जातां
केन्नां पूनम पांडे जातां
केन्नां सन्नी लियोन जातां,
जावनच आसतां..
-एरीक सोन्स, बार्कूर