ಸಂಪಾದಕೀಯ್:
ಸಂಸಾರಾಂತ್ಲೆಂ ಕೊಂಕ್ಣೆಚೆಂ ದಾಯ್ಜ್ ಸರ್ಗಾರಾಜಾಕ್ ವರ್ಗಾವಣ್ ಜಾಂವ್ಚೆ ವಾಟೆರ್!
ಕೊಂಕ್ಣಿ ಶೆತಾಂತ್ ಖಳ್ಮಿತ್ ನಾತಲ್ಲೊ ವಾವ್ರ್ ಕೆಲ್ಲ್ಯಾ, ಮೊರಾ ಪಾಸುನ್ ಕೊಂಕ್ಣೆ ಖಾತೀರ್ ಜೀವ್ ದಿಲ್ಲ್ಯಾ ಸಾಹಿತಿಂಚೊ ಉಡಾಸ್ ಕಾಡುನ್ ಹಿ ಕವಿತಾ ಬರಯ್ಲ್ಯಾ ಜೊಸ್ಸಿ ಬಜ್ಜೋಡಿನ್. ಕಾಂಯ್ ಪಾಟ್ಲ್ಯಾ ದೋನ್-ತೀನ್ ವರ್ಸಾಂನಿ ಆಮ್ಕಾಂ ಸಾಂಡುನ್ ಗೆಲ್ಲೆ ಕೊಂಕ್ಣಿ ನಾಟಕ್ ಬರಯ್ಣಾರ್, ಲೇಖಕ್, ಕವಿ, ಕಾದಂಬರಿಕಾರ್, ಸಂಗೀತ್ಗಾರ್ ಜಾಯ್ತೆ! ತಾಂಣಿ ಮಾಗಲ್ಲ್ಯಾ ಆದೇವ್ಸಾವರ್ವಿಂ ಹಾಂಗಾಚೊ ಕವಿ ದುಕಾಂತ್ ಬುಡ್ಲಾ.
ನಿಮಾಣ್ಯಾ ಕಡ್ವ್ಯಾಂತ್ ರಚ್ನಾರಾಕಚ್ ಸವಾಲ್ ಉಡಯ್ತಾ ಹಾಂಗಾಚೊ ಕವಿ. ಸರ್ಗಾರಾಜಾಂತ್ ಕಾಂಯ್ ಕೊಂಕ್ಣೆಚೆಂ ದಾಯ್ಜ್ ಉಗಡ್ತಾಯ್ ಕಾಂಯ್ ಮ್ಹಣೊನ್ ತೊ ವಿಚಾರ‍್ತಾ. ಭೋವ್ಶಾ ಸಂಸಾರಾಂತ್ಲ್ಯಾ ಕೊಂಕ್ಣೆಚ್ಯಾ ದಾಯ್ಜಾಚೆರ್ ಕಸಲೊ ತರೀ ಪೇಟ್ ಪಡ್ಲಾ ಆಸ್ತಲೊ, ಹಾಂಗಾಚೆಂ ದಾಯ್ಜ್ ಸಂಪೊನ್ ವೆಚ್ಯಾರ್ ಆಸಾ ಜಾಯ್ಜಾಯ್. ನಾಂತರ್ ಹ್ಯಾ ಕವಿಕ್ ತಸಲ್ಯಾ ಹುಸ್ಕ್ಯಾಚೆಂ ಚಿಂತಪ್ ಯೆಂವ್ಚಿ ಗರ್ಜ್ ತರೀ ಕಿತೆಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಮರ್
ಆಕಾಸಾ ವಯ್ಲಿಂ ಮೊಡಾಂ ಪಾಸುನ್
ಧರ್ತೆರ್ ದುಕಾಂ ಗಳಯ್ತಾತ್
ಹಿಂ ದುಕಾಂ ಕೊಂಕ್ಣೆಚ್ಯಾ ಕುಂವರಾಂಕ್
ಪಶ್ಚಾತ್ತಾಪಾಚೆ ಖಂತಿನ್ ಭಿಜಯ್ತಾತ್
ಲಿಖ್ಣೆ ನಾಂಗೊರ್ ಬೊಟಾಂನಿ ಖೊವವ್ನ್
ಕೊಂಕ್ಣಿ ಶೆತಾಂ ಕೊಸಲ್ಲೆ
ಕೊಂಕ್ಣೆಚೊ ಬಿಯಾಳೊ ವೊಂಪುನ್
ಭಾಶೆಚೆ ಮುಡೆ ಬಾಂಧಲ್ಲೆ
ಜಾಯ್ತೆ ಶೆತ್ಕಾರಚ್ ಅಂತರ‍್ಲೆ
ಆಮ್ಚಿ ಭಾಸ್‌ಚ್ ಗ್ರಾಸ್ ಮ್ಹಣ್
ತಿಚಿಚ್ ರೂಚ್ ಚಾಕಲ್ಲೆ
ಅಬ್ಳೆ ಮರ್ಣಾಕಚ್ ಭುಕ್ ಲಾಗ್ತಾನಾ
ತಾಚ್ಯಾ ಗ್ರಾಸಾಕ್ ಸಾಂಪಡ್ಲೆ
ಉತ್ರಾಂಚ್ಯಾ ಕುಡ್ಕಾಂಕ್ ವೋಪ್ ಪುಸಲ್ಲೆ
ಸೊನಾರಚ್ ಮಾತಿಯೆಂತ್ ಧಾಂಪ್ಲೆ
ಮ್ಹಾನ್ ಬರಯ್ಣಾರಾಂಚೆ ಕಂಠೆಂತ್ಲೆ
ಎಕೇಕಚ್ ಆಂಕ್ಡೆ ತುಟ್ಲೆ
ಹಾಸ್ಯಾ ನಾಟ್ಕುಳೆ, ಕಾಣಿಯೊಂ, ಕವಿತಾ
ಪರ್ಜೆಕ್ ಚಾಕವ್ನ್ ಚಲ್ಲೆ
ಚರಿತ್ರೆಚ್ಯಾ ಪಾನಾಂನಿ ಪರ್ಜೆಚ್ಯಾ ಮನಾಂನಿ
ಮಾತ್ರ್ ಅಮರ್ ಉರ‍್ಲೆ
ಮ್ಹಜ್ಯಾ ರಚ್ನಾರಾ ಎಕೆಕಚ್ ಬರಯ್ಣಾರಾಂಕ್
ತುಜ್ಯಾ ರಾಜಾಕ್ ವೊಡ್ತಾಯ್
ಮ್ಹಾಕಾ ಸಮ್ಜನಾ, ಥಂಯ್ ಕಾಂಯ್
ಕೊಂಕ್ಣೆಚೆಂ ದಾಯ್ಜ್ ಉಗಡ್ತಾಯ್?
-ಜೊಸ್ಸಿ ಬಜ್ಜೋಡಿ
संपादकीय:
संसारांतलें कोंकणेचें दायज सर्गाराजाक वर्गावण जांवचे वाटेर!
कोंकणी शेतांत खळमीत नातल्लो वावर केल्ल्या, मोरा पासून कोंकणे खातीर जीव दिल्ल्या साहितिंचो उडास काडून ही कविता बरयल्या जोस्सी बज्जोडीन. कांय पाटल्या दोन-तीन वर्सांनी आमकां सांडून गेल्ले कोंकणी नाटक बरयणार, लेखक, कवी, कादंबरिकार, संगीतगार जायते! तांणी मागल्ल्या आदेवसावर्वीं हांगाचो कवी दुकांत बुडला.
निमाण्या कडव्यांत रचनाराकच सवाल उडयता हांगाचो कवी. सर्गाराजांत कांय कोंकणेचें दायज उगडताय कांय म्हणोन तो विचार्ता. भोवशा संसारांतल्या कोंकणेच्या दायजाचेर कसलो तरी पेट पडला आसतलो, हांगाचें दायज संपोन वेच्यार आसा जायजाय. नांतर ह्या कवीक तसल्या हुसक्याचें चिंतप येंवची गर्ज तरी कितें?
-मेलवीन रोड्रिगस
कविता:
अमर
आकासा वयलीं मोडां पासून
धर्तेर दुकां गळयतात
हीं दुकां कोंकणेच्या कुंवरांक
पश्चात्तापाचे खंतीन भिजयतात
लिखणे नांगोर बोटांनी खोववन
कोंकणी शेतां कोसल्ले
कोंकणेचो बियाळो वोंपून
भाशेचे मुडे बांधल्ले
जायते शेत्कारच अंतर्ले
आमची भासच ग्रास म्हण
तिचीच रूच चाकल्ले
अबळे मर्णाकच भूक लाग्ताना
ताच्या ग्रासाक सांपडले
उत्रांच्या कुडकांक वोप पुसल्ले
सोनारच मातियेंत धांपले
म्हान बरयणारांचे कंठेंतले
एकेकच आंकडे तुटले
हास्या नाटकुळे, काणियों, कविता
पर्जेक चाकवन चल्ले
चरित्रेच्या पानांनी पर्जेच्या मनांनी
मात्र अमर ऊर्ले
म्हज्या रचनारा एकेकच बरयणारांक
तुज्या राजाक वोडताय
म्हाका समजना, थंय कांय
कोंकणेचें दायज उगडताय?
-जोस्सी बज्जोडी