ಮಾಂಯ್

ಸಂಪಾದಕೀಯ್:

ಆವಯ್ಚ್ಯಾ ಮೊಗಾನ್ ಖತ್ಕತ್ಚೆಂ ಕಾಳೀಜ್

ಆವಯ್ಚ್ಯಾ ಉಡಾಸಾಚಿ ಏಕ್ ಕವಿತಾ ಹಾಂಗಾಸರ್ ಆಸಾ. ಕವಿತಾ ಸಾದಿ ತರೀ ಹಾಂಗಾಚೊ ವಿಶಯ್ ತೊ ಸಾದೊ ನ್ಹಯ್.

ಕವಿ ಆಪ್ಲೊ ಗಾಂವ್ ಸಾಂಡುನ್ ಪಯ್ಸ್ ಪರ್ಗಾವಾಂತ್ ಆಸಾ. ಆನಿ ತಾಕಾ ಸಹಜ್ ಜಾವ್ನ್ ಆವಯ್ಚೊ ಉಡಾಸ್ ಯೆತಾ. ಲಾಗಿಂ ಆಸ್ತಾನಾ ಆವಯ್ಚ್ಯಾ ಸಾಕ್ರಿಫಿಸಾಚಿ ಸಮ್ಜಣಿ ತಾಕಾ ನಾತಲ್ಲಿ. ಆತಾಂ ತ್ಯೊ ಯಾದಿ ತಾಚೆಂ ಕಾಳೀಜ್ ಕಾಂತಯ್ತಾನಾ ತಿಚೊ ಉಡಾಸ್ ಉತ್ರಾಂಚ್ಯಾ ರುಪಾರ್ ಕವಿತಾ ಜಾವ್ನ್ ವ್ಹಾಳೊಂಕ್ ಲಾಗ್ತಾ.

ಆವಯ್ ಮುಖಾರ್ ಆಪ್ಣಾಚ್ಯೊ ಚುಕಿ ವೊಳ್ಕುನ್ ಘೆಂವ್ಕ್ ತಾಕಾ ಲ್ಹಾನ್‌ಪಣ್ ಭೊಗನಾ. ಹೆಂಚ್ ಏಕ್ ವ್ಯಕ್ತಿ ಜಾವ್ನ್ ಕೊಣಾಯ್ಕಿ ಆಸ್ಯೆತ್ ಜಾಲ್ಲೆಂ ವ್ಹಡ್‌ಪಣ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮಾಂಯ್

ಫಾಯ್ದೊ ನಾ ಕಾಂಯ್, ಮಾಂಯ್
     ವರ್ಣುನ್ ತುಕಾ, ಸಂಸಾರ್ ತುಂವೆಂ ಸಾಂಡ್ಲ್ಯಾ ನಂತರ್,
ಫುಡಾರಾಕ್ ಲಾಗೊನ್ ಪಯ್ಸ್ ಪಾವ್ಲೊಂ, ಮಾಂಯ್
     ಆಮ್ಚೆ ಮಧೆಂ ಫಕತ್ ಆಸಾ, ಸಾತ್ ದರ್ಯಾಂಚೊ ಅಂತರ್

ಸಾಕ್ರಿಫಿಸ್ ತುಂವೆಂ ಕೆಲೊಯ್ ಗೆ ಮಾಂಯ್,
     ಆಮ್ಕಾಂ ಕಷ್ಟಾಂನಿ ವಾಗೊಂವ್ಚ್ಯಾ ವಗ್ತಾ,
ಕಿತ್ಲೊ ಅನ್ಮೋಲ್ ತುಜೊ ಮೋಗ್‍ಗೆ ಮಾಂಯ್,
     ಹಾಂವ್ ಮಾತ್ರ್ ಆಜ್, ಪಯ್ಶಾಂನಿ ಫಾರಿಕ್ ಕರ‍್ತಾಂ

ಪೊಟ್ಲುನ್, ತುಜೆ ವೆಂಗೆಂತ್ ಆರಾವ್ನಗೆ ಮಾಂಯ್
     ಸಾಂಗ್ತಾಲಿಯ್ ತುಂ, ರಾಯ್ ರಾಣಿಯಾಂಚಿ ಕಾಣಿ
ಸಭಾರ್ ಜಣಾಂ, ಭುರ್ಗಿಂ ಆಮಿ ತುಕಾ ತರೀ,
     ಜಿಯೆತಾಯ್ ಮಾಂಯ್ ತುಂ ಎಕ್ಸುರಿ, ಅನಾಥ್ ಜಿಣಿ,

ಸಂಸಾರಾಚ್ಯಾ ಆಟ್‌ನೆಟಾಂಕ್ ಭುಲೊನ್‌ಗೆ ಮಾಂಯ್,
     ಕುಟ್ಮಾಂ ಸಾಂದ್ಯಾಂಕ್, ಆಜ್ ಹಾಂವ್ ವಿಸ್ರಲಾಂ,
ಜಾತಾ ಜಾಲ್ಯಾರ್ ಮಾಫ್ ತುಂ ಕರ್‌ಗೆ ಮಾಂಯ್
     ಖಾಲ್ತೆಪಣಿಂ ಚೂಕ್ ಮಾಗೊಂಕ್ ಹಾಂವ್ ಆಯ್ಲಾಂ

ತುಜ್ಯಾ ನಂತರ್ ತುಜಿ ವ್ಹಡ್ವಿಕ್ ಗಾಂವ್ಕಗೆ ಮಾಂಯ್,
     ಖಂಡಿತ್ ನಾ-ಗೆ ಮನ್ ಮ್ಹಾಕಾ,
ಫುಡ್ಲ್ಯಾ ಜಲ್ಮಾಂತ್ ತರೀ ತುಜಿ ಸೆವಾ ಕರುಂಕ್‌ಗೆ ಮಾಂಯ್
     ತುಂ ಮೊರ‍್ಚ್ಯಾ ವಗ್ತಾ, ತುಜೆ ಸಂಗಿಂ ತುಂ ವ್ಹರ್ ಮಾಕಾ.

-ರೆಮ್ಸಿ ಫೆರ್ನಾಂಡಿಸ್