ರಾಧೆಕ್ ಮತ್ಸರ್ ಮುರಲಿಚೊ

ಸಂಪಾದಕೀಯ್:

ರಾಧಾಚ್ಯಾ ಕಾಳ್ಜಾಚೆ ತಳ್ಮಳೆ ಪಿರ‍್ಲುಕ್ ಫುಂಕ್ಚ್ಯಾ ಕೃಷ್ಣಾಕ್ ಖಂಯ್ ಸಮ್ಜತಾತ್?

ಭೋವ್ ಸುರಸ್ ಸುಂದರ್ ಕವಿತಾ ಹಾಂಗಾಸರ್ ಆಸಾ - ಗೊಂಯ್ಚೊ ಗೀತಕಾರ್ ಉದಯ್ ಭೆಂಬ್ರೆ ಥಾವ್ನ್. ಹೆ ಕವಿತೆಕ್ ಕಾಂಯ್ ಪಾಂತ್ತೀಸ್ ವರ್ಸಾಂ ಜಾಲಿಂ. ಗೀತಕಾರ್, ಕವಿ ಜಾವ್ನ್ ನಾಂವ್ ಕೆಲ್ಲ್ಯಾ ಉದಯ್ ಭೆಂಬ್ರೆನ್, ವಕಾಲತ್ ಚಾಲು ಕೆಲ್ಯಾ ಉಪ್ರಾಂತ್ ಅಸಲಿಂ ಸುಂದರ್ ಗಿತಾಂ ಬರೊಂವ್ಚಿಂ ರಾವಯ್ಲಿಂ. ಆಜ್ ತೆ ಏಕ್ ಚಳುವಳೆಗಾರ್ ತಶೆಂ ಲೇಖಕ್ ಜಾವ್ನ್ ಆಸಾತ್.

ಕೃಷ್ಣ ಖಾತೀರ್ ರಾಧೆಚೊ ಮೋಗ್ ಖತ್ಕತೊನ್ ಉಮಾಳ್ತಾ ಹಾಂಗಾಸರ್. ಪಿರ‍್ಲುಕ್ ಫುಂಕಲ್ಲಿ ಪುರೊ, ರಾವಯ್ - ತುಜ್ಯಾ ವೊಂಟಾಂಚೆಂ ಅಮೃತ್ ತೆ ಪಿರ‍್ಲುಕೆಕ್ ದೀನಾಕಾ ಮ್ಹಣ್ತಾನಾ ಆನ್ಯೇಕೆ ವಾಟೆನ್ ಮನಾಂತ್ಲ್ಯಾ ಮನಾಂತ್ ಆಪ್ಣಾಚ್ಯಾ ವೊಂಟಾಂಕ್ ದೀ ಮ್ಹಣೊನ್ ಹಿ ರಾಧಾ ಸಾಂಗ್ತಾ ಆಸ್ತಲಿ.

ಮೊಗಾಚಿ ಕವಿತಾ ಹಿ. ಮೊಗಾನ್ ಜಳಲ್ಲ್ಯಾಚಿ ಕವಿತಾ ಹಿ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ರಾಧೆಕ್ ಮತ್ಸರ್ ಮುರಲಿಚೊ

ಕೃಷ್ಣಾ ನಾಕಾ, ಮುರಲಿ ನಾಕಾ...
ತಾನ್ ಮುರಲಿಚಿ ಕೃಷ್ಣಾ ನಾಕಾ
ತಿಜೆ ಜಿಣೆಚೊ ಮತ್ಸರ್ ಮ್ಹಾಕಾ

ಸಕಾಳ್-ಸಾಂಜ್ ಏಕ್ ತಿಜೋಚ್ ನಾದ್
ಮ್ಹಜೊ ಆಯ್ಕುಶಿ ಕೆನ್ನಾ ಸಾದ್
ನಾಕಾ ದೀಂವ್ ನಾಕಾ, ತುಜ್ಯಾ ವೊಂಠಾಂಚೆಂ
        ಅಮೃತ್ ಪೀಂವ್ಕ್ ತಿಕಾ!

ಲಾಗಿಂ ಆಸ್ತಾನಾ ತುಜಿ ಹಿ ಮುರಲಿ
ರಾಧಾ ಕಶಿ ರೆ ತುಕಾ ಸುಚ್ತಲಿ
ಹಾಂಸ್ ಹಾಂಸ್ ತುಂ, ತುಜೊ ಖೆಳ್ ಹೊ
        ಲಾಯ್ತಾ ಕಾಂಟಿ ಸುಖಾ!

ಕಿತೆಂ ಉಣೆ-ರೆ ಮ್ಹಜ್ಯಾಂತ್ ಆಶಿಲ್ಲೆಂ
ತನ್ ಮನ್ ತುಕಾ ವೊಂಪುನ್ ಬಶಿಲ್ಲೆಂ
ತುಜೆ ಸಂಗ್ತಿಚಿ ಭಾಗಯ್ ತಾನ್-ರೆ
        ಘಾಲ್ತಾ ಸಪೂತ್ ತುಕಾ!

-ಉದಯ್ ಭೆಂಬ್ರೊ