ಸೊಬಿತ್ ಗಾಂವ್

ಸಂಪಾದಕೀಯ್:

ಶೆರಾಂತ್ಲಿ ಘಾಣ್ ಸೊಸ್ಯೆತ್, ಗಾಂವ್ಚೆ ಮಾತಿಯೆಚೊ ಪರ್ಮಳ್ ಸೊಸುಂಕ್ ಜಾಯ್ನಾ

ಹೆಂ ಕಿತ್ಲೆಂ ಸಲೀಸ್ ತೊಂಡಾಂತ್ ಉಚಾರುಂಕ್! ಆಮ್ಚೊ ಜಲ್ಮಲ್ಲೊ ಗಾಂವ್, ಜಂಯ್ ಸೈಂಭಾಚಿ ಸೊಬಾಯ್ ಆಸಾ - ತೊ ಸೊಬಿತ್ ಮ್ಹಣೊನ್ ಚ್ಯಾರ್ ಚೊವ್ಗಾಂಕ್ ಆಮಿ ಸಾಂಗ್ತಾಂವ್. ತರೀ ಥಂಯ್ ಆಮಿ ರಾವನಾಂವ್. ರಾವೊಂಕ್ ಆಮ್ಕಾಂ ನಾಕಾ. ಥಂಯ್ಚೆ ಮಾತಿಯೆಂತ್ ಘೊಳುಂಕ್ ಆಮ್ಕಾಂ ನಾಕಾ, ಥಂಯ್ಚೆ ಝರಿಚಿ ತಾನ್ ಆಮ್ಕಾಂ ನಾ. ಆಮ್ಕಾಂ ಆಮ್ಚಿ ಭುಕ್ ಪೊಟ್ ಪೊಕೊರ‍್ತಾನಾ ಶೆರಾಂತ್ಲೆಂ ಎ.ಸಿ. ದಫ್ತರ್ ಆಪಯ್ತಾ, ಬದ್ಲಾ ನಾಂಗ್ರಾಚೆರ್ ಆಮ್ಚೊ ಹಾತ್ ಚರನಾ.

ಕೊಣಾಕ್ ದೋಸ್ ಠರಾಂವ್ಚೆಂ? ಆಮ್ಚೆ ಮಾತಿಯೆಂತ್ ಕಿರ್ಲಲ್ಲೆ ಕಣ್ಶೆಚೊ ಪರ್ಮಳ್ ಕಿತ್ಯಾಕ್ ಆಮ್ಚ್ಯಾ ನಾಕಾಕ್ ಆದಾಳ್ನಾ? ಸವಾಲಾಂ ಜಾಯ್ತಿಂ ಆಸಾತ್. ಹಿಂ ಸವಾಲಾಂ ನಾಟ್ವೊಂಚೆ ರಿತಿನ್ ಹಾಂಗಾಸರ್ ಆಪ್ಲೆ ಕವಿತೆ ಮುಕಾಂತ್ರ್ ಕವಿ ಉದಯ್ ಮ್ಹಾಂಬ್ರೊನ್ ಮಾಂಡ್ಲ್ಯಾಂತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸೊಬಿತ್ ಗಾಂವ್

ಶೆರಾಂತ್ಲ್ಯಾ ಭಾವಾ ಮ್ಹಜ್ಯಾ
ಶೆರಾಂತ್ ರಾವುನ್ ಸಾಂಗ್ತಾ ಆಮ್ಕಾಂ
ಕಿತ್ಲೊ ಸೊಬಿತ್ ಗಾಂವ್ ಪಳಯ್
ಇತ್ಲೊ ಸೊಬಿತ್ ಗಾಂವ್ ಜಾಲ್ಯಾರ್
ಚ್ಯಾರ್ ದೀಸ್ ಹಾಂಗಾ ರಾವುನ್ ಪಳಯ್

ಗಾಂವಾಂತ್ ಮ್ಹಜ್ಯಾ ಮಾಡ್ ಆಸಾ
ಮಾಡಾಚೆರ್ ನಾಲ್ಲ್ ಆಸಾ
ಮಾಡಿಯೆಚೆರ್ ಬೆಡೆ ಆಸಾತ್
ಪಣ್ಸಾಚೆರ್ ಪಣಸ್ ಆಸಾ
ಆಮುಲ್ಲೆಕ್ ಘೊಂಟಾಂ ಆಸಾತ್
ಕಾಣ್ಣಾಂ ಆಸಾತ್, ಚುನ್ನಾಂ ಆಸಾತ್
ಖಾಣಾರಿ ತೊಂಡಾಂ ಆಸಾತ್
ಝಾಡಾರ್ ಚಡ್ಪಿ, ಮಾಡಾರ್ ಚಡ್ಪಿ
ಪಾಡೆಲಿ ಖಂಯ್ ಆಸಾ?

ಮಾನ್ಶೆಂತ್ ಆಮ್ಚ್ಯಾ ಸುಂಗ್ಟಾಂ ಆಸಾತ್
ನ್ಹಂಯೆಂತ್ ಚಣಕ್, ಪಾಲು ಆಸಾ
ಪೊಲ್ವೆ ಆಸಾ, ಶೆಂವ್ಟೆ ಆಸಾ
ರುಚೀಕ್ ಬರೆ ಖುಬೆ ಆಸಾ
ಗರ್ವಣಿ ಆಸಾ
ಕಾಂಟ್ಯಾಳಿ ರಾಂಪಣ್ ಆಸಾ
ಹೊಡಿ ಆಸಾ, ಪನೆಳ್ ಆಸಾ, ತಾರ್ ಆಸಾ
ತಾರಿಯಾಮಾಮಾ ಖಂಯ್ ಆಸಾ?

ಖಂಡ್ ನಾ, ದಂಡ್ ನಾ
ರೊಯ್ತಲ್ಯಾಚೆಂ ಶೆತ್ ಜಾಲಾಂ
ಮರಡ್ ತರ್ ರೊಯಿಚ್ ನಾ
ವಾಂಯ್ಗಣ್ ಲೆಗಿತ್ ನಾಕಾ ಜಾಲಾಂ
ಗಾಂವಾಂತ್ ಆತಾಂ ಶಿತಾಬದ್ಲಾ
ಫ್ರಾಯ್ಡ್ ರಾಯ್ಸ್ ಶಿಜೊಂಕ್ ಲಾಗ್ಲಾಂ
ಶೆತ್ಕಾರಾಚೊ ಪೂತ್ ಆತಾಂ
ನವ್ಯಾ ಕಾಳಾ ಭಾಟ್ಕಾರ್ ಜಾಲಾ
ಭುಂಯ್ ಪೂತ್ ಖಂಯ್ ಗೆಲಾ?

ಗಾಂವಾಂತ್ ಮ್ಹಜ್ಯಾ ಸೈಂಭ್ ಆಸಾ
ನಿತಳ್ ನಿವಳ್ ವಾರೆಂ ಆಸಾ
ವಜ್ರ್ಯಾಚೆಂ ಉದಕ್ ಆಸಾ
ಸುಕ್ಣಿಂ ಆಸಾತ್, ಸಾವ್ಜಾಂ ಆಸಾತ್
ಕುಂಕ್ಡಾಂ ಆಸಾತ್, ವಾಸ್ರಾಂ ಆಸಾತ್
ಜಾಂಚೆ ಪಾಸತ್ ಸಗ್ಳೆಂ ಆಸಾ
ತೆ ಮ್ಹಜೆ ಗಾಂವ್ ಭಾವ್ ಖಂಯ್ ಆಸಾತ್?

ಶೆರಾಂತ್ಲ್ಯಾ ಭಾವಾ ಮ್ಹಜ್ಯಾ
ಶೆರಾಂತ್ ರಾವುನ್ ಸಾಂಗ್ತಾ ಆಮ್ಕಾಂ
ಕಿತ್ಲೊ ಸೊಬಿತ್ ಗಾಂವ್ ಪಳಯ್
ಇತ್ಲೊ ಸೊಬಿತ್ ಗಾಂವ್ ಜಾಲ್ಯಾರ್
ಚ್ಯಾರ್ ದೀಸ್ ಹಾಂಗಾ ರಾವುನ್ ಪಳಯ್

- ಉದಯ್ ಮ್ಹಾಂಬ್ರೊ