ಸಂಪಾದಕೀಯ್:

ಬಸ್ಸಾಚ್ಯಾ ಕ್ಲೀನರಾಕ್ ಬಸ್ಸಾ ಭಿತರ್ ಹರ‍್ಯೆಕ್ಲೊ ಮನೀಸ್ ಪ್ರವಾಸಿ ಮಾತ್ರ್

ಅಧಿಕಾರ್, ನಾಂವ್, ದುಡು, ಬಿರುದಾಂ, ಹುದ್ದೊ - ಮನ್ಶಾಕ್ ಕಿತ್ಲೆ ವೆಗ್ಗಿಂ ಭೃಷ್ಟ್ ಕರ್ನ್ ಸೊಡ್ತಾ ಸಾಂಗೊಂಕ್ ಜಾಯ್ನಾ. ಥೊಡೆಂ ನಾಂವ್ ಕಮಾಯ್ತಾನಾ, ಹಂಕಾರಾಚಿಂ ಜಬ್ಬೊರ್ ಶಿಂಗಾಂ ಫುಟ್ಟಾತ್ ಪಳೆಯಾ, ತಾಂತುಂ ಮನೀಸ್ ವಾರ‍್ಯಾರ್ ಉಬೊಂಕ್ ಲಾಗ್ತಾ. ತಾಚೆ ಪಾಂವೆಂ ಧರ್ಣಿರ್ ಉರನಾಂತ್. ಮಾಗೀರ್ ಸರಾಗ್ ಉಬೊಂಕ್ ತಾಕಾ ಜಾಲೆಂ ತರ್, ಜಾಲಿ ಗತ್ ! ತಾಣೆಂ ಉಚಾರ‍್ಚ್ಯಾ ಉತ್ರಾಂಕ್ ಲೆಗುನ್ ಘಮಂಡೆಚಿ ಚರಬ್ ಮಾಂಡ್ತಾ.

ಪುಣ್ ಜಾಯ್ತೆ ಪಾವ್ಟಿಂ ಹೊ ಪೊಕೊಳ್ ಹಂಕಾರ್ ಚಡಿತ್ ಕಾಳ್ ಉರನಾ. ಮನೀಸ್ ಖಿಣಾಕ್ ಧರ್ಣಿಕ್ ಶೆವ್ಟತಾ. ತಶೆಂ ಧರ‍್ತೆಕ್ ಶೆವ್ಟೊಂಚ್ಯಾ ಮನ್ಶಾವಿಶಿಂ ಸಂಜೀವ್ ವೆರೆಂಕಾರಾನ್ ಎಕಾ ಆಪುರ್ಬಾಯೆಚೆ ಪ್ರತಿಮಾದ್ವಾರಿಂ ಕವಿತಾ ಲಿಖ್ಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಪ್ರವಾಸಿ

ಕೊಣಾಚಿ ತರೀ ಲಿಫ್ಟ್ ಮೆಳತ್
ಹೆ ಆಶೆನ್
ತೆ ದಿಸಾ ರಾತಿಕಡೆನ್
ನಾಮ್ಣೆಚೊ ಕವಿ, ಲೇಖಕ್, ಸುಟ್ಕೆ ಝುಜಾರಿ
ಖಡೆಗಾಂಠ್ ಪತ್ರಕಾರ್, ಅಶಿಂ ಸಭಾರ್ ಬಿರುದಾಂ ಆಶಿಲ್ಲೊ
ಹಾಂವ್ ಕೊಣ್ ತರೀ
ಯೆತಲ್ಯಾ ವೆತಲ್ಯಾ ಗಾಡಿಯಾಂಕ್ ಹಾತ್ ದಾಖಯ್ತ್
ವೊರಾಂಚಿಂ ವೊರಾಂ ರಸ್ತ್ಯಾರ್ ಉಬೊ.

ದೋನ್ ರೊದಾಂಚಿಂ
ಚ್ಯಾರ್ ರೊದಾಂಚಿಂ
ಕಿತ್ಲಿಂ ವಾಹನಾಂ ಆಯ್ಲಿಂ
ಆನಿ ಮಟ್ಕೆಕಾರ್, ಸೌರ್ತಿಕಾರ್, ಆಡ್ಸರಾಂಕಾರ್
ಸಗ್ಳ್ಯಾಂಕ್ ಘೆವ್ನ್ ಗೆಲಿಂ
ಮ್ಹಜೆ ಖಾತೀರ್ ಕೊಣಾಚೋಚ್ ಬ್ರೇಕ್ ಲಾಗ್ಲೊನಾ
ಹಾಂವ್ ಕೊಣ್?
ಹ್ಯಾ ಎಕಾಚ್ ಪ್ರಸ್ನಾಚಿ ಜಾಪ್
ಸೊದ್ಪಾಚೆ ತಂದ್ರೆಂತ್ ಆಸ್ತನಾಂಚ್
ನಿಮಾಣ್ಯಾ ವೊರಾಚಿ ಬಸ್ಸ್ ಯೆವ್ನ್ ಥಾರ‍್ಲಿ
ಮಾರ್ ಖೊಟ್ ಘಾಲ್ ಭಿತರ್
ಅಶೆಂ ಮ್ಹಣ್ ಕಿಲಿಂಡರಾನ್
ಹುಂದ್ರಾಚ್ಯಾ ಬುರಾಕಾಕ್ ಗುಡ್ಡೊ ಮಾರ‍್ಚೊ
ತಸೊ ಮ್ಹಾಕಾ ಬಶಿಂತ್ ಧೊಂಗ್ಶಿಲೊ

ತೆನ್ನಾಂ ಜಾತ್ರೆಂತ್ಲೊ ಬೊಮಾಡೊ ಫುಟ್ಚೊ
ತಸೊ ಮ್ಹಜ್ಯಾಂತ್ಲೊ ಹಾಂವ್ ಠುಸ್ ಕರುನ್ ಫುಟ್ಲೊಂ
ಮ್ಹಜೆಂ ಏಕ್ ಏಕ್ ಬಿರುದ್ ಶೆಣತ್ ರಾವ್ಲೆಂ
ಹಾಂವ್ ಕೊಣ್ ನಾಸ್ಲೊಂ!
ಹಾಂವ್ ಆಸ್ಲೊಂ ಫಕತ್
ವೆಂತ್‌ಭರ್ ಪೊಟಾಚೆ ಭರಿ ಖಾತೀರ್
ದೀಸ್‌ಭರ್ ಘಾಮ್ ಗಳೊವ್ನ್
ಬಶಿಚೆ ದಾಣ್ಯೆಕ್ ಗಳೊ ಮಾರುನ್
ರಾತ್ಚೆವೆಳಾರ್ ಘರಾ ಪರ್ತುಪಿ
ಏಕ್ ಸರ್ವ್‌ಸಾಮಾನ್ಯ್ ಪ್ರವಾಸಿ...

-ಸಂಜೀವ್ ವೆರೆಂಕಾರ್