ಭಿತರಲೊ ಸುಧಿರ್　

ಸಂಪಾದಕೀಯ್:

ದೆವಾಕ್ ಸೊಧುನ್ ಭಾಯ್ಲೊ ಭಿತರ್ ವೆತಾ ಆನಿ ಭಿತರ‍್ಲೊ ಭಾಯ್ರ್ ಯೆತಾ

ಹೊ ಬಾಮುಣ್. ಜಾನ್ವೆಂ ಆಸೊನ್ ನ್ಹೆಸನಾ. ಮಾಸ್ ಖಾಂವ್ಕ್ ನಜೊ, ಸೊರೊ ಪಿಯೆಂವ್ಕ್ ನಜೊ ತರೀ ಮಾಸ್ ಖಾತಾ, ಸೊರೊ ಪಿಯೆತಾ. ಸುದ್ರಾಂಚ್ಯಾ ಘರಾ ಕೆದಳಾಯ್ ಭೆಟ್ ದಿತಾ ಆನಿ ತಾಂಚ್ಯಾ ಘರಾ ಜೆವ್ಣಾಕ್ ಬಸ್ತಾ. ಬಾಮುಣ್ ಜಾವ್ನಯ್ ಭಾಯ್ಲ್ಯಾ ಸುಧಿರಾಬರಿ. ಹೊ ಮಾತ್ರ್ ಭಿತರ‍್ಲೊ ಸುಧಿರ್.

ಆನ್ಯೇಕೆ ವಾಟೆನ್ ಸುಧಿರ್ ಆಸಾ. ತಾಚೊ ಧರ್ಮ್ ತಾಕಾ ಮಾಸ್ ಖಾಂವ್ಕ್, ಸೊರೊ ಪಿಯೆಂವ್ಕ್ ಆಡ್ವಾರ್ನಾ. ತರೀ ತೊ ಮಾಸ್ ಖಾಯ್ನಾ. ಸೊರೊ ಪಿಯೆನಾ. ಬಾಮುಣ್ ತಾಚ್ಯಾ ಘರಾಂತ್ ರಿಗಲ್ಲ್ಯಾವೆಳಾ ‘ಯೇನಾಕಾ ಸಾಯ್ಬಾ’ಮ್ಹಣೊನ್ ಆಡ್ದೊಸ್ ಮಾಗ್ತಾ. ತಾಚ್ಯಾ ಘರಾಂತ್ ಸತ್ಯನಾರಾಯಣ್ ಪುಜಾಯ್ ಚಲ್ತಾ. ಹೊ ಭಾಯ್ಲೊ ಬಾಮುಣ್.

ಎಕ್ಲೊ ಭಿತರ‍್ಲೊ, ಭಾಯ್ಲೊ ಜಾಂವ್ಕ್ ಚಿಂತ್ತಾ. ಆನ್ಯೇಕ್ಲೊ ಭಾಯ್ಲೊ, ಭಿತರ‍್ಲೊ ಜಾಂವ್ಕ್ ಚಿಂತ್ತಾ. ಹೆಂ ಕಿತ್ಯಾಕ್ ಅಶೆಂ? ಖಂಯ್ಚೆಂ ಸಾರ್ಕೆಂ ಆನಿ ಖಂಯ್ಚೆಂ ಖೊಟೆಂ? ಸವಾಲಾಂಚ್ಯಾ ಝಾಂಟಾಂನಿ ಹಾಂಗಾಚೊ ಕವಿ ಗೊಂದೊಳ್ಳಾ. ಭಿತರ‍್ಲ್ಯಾಕ್, ದೇವ್ ಭಾಯ್ರ್ ಕಿತ್ಯಾಕ್ ದಿಸ್ತಾ ಆನಿ ಭಾಯ್ಲ್ಯಾಕ್, ದೇವ್ ಭಿತರ್ ಕಿತ್ಯಾಕ್ ದಿಸ್ತಾ?

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಭಿತರಲೊ ಸುಧಿರ್　

ಹಾಂವ್ ಭಿತರಲೊ ಸುಧಿರ್
ಆನಿ ತೋ
ಭಾಯಲೊ ಬಾಮುಣ್

ಮ್ಹಾಕಾ ಜಾನವೆ ಆಸಲ್ಯಾರೀಯ್
ಹಾಂವ್ ನ್ಹೆಸನಾ
ತಾಕಾ ಜಾನವೆ ನಾ..
ದೆಕೂನ್ ತೋ ಮೆಕಳೊ

ಮ್ಹಜೆ ಮ್ಹಾಲಗಡ್ಯಾನ್
ಝಳಕೆ ಖಾವಯಲೆಂ
ಹಾಂವ್ ಆತಾ ಮಾಸ್ ಖಾತಾ
ಆನಿ ಕೆನ್ನಾ ಕೆನ್ನಾ
ಸೊರೋಯ್ ಪಿತಾ

ತಾಕಾ ಮಾಸ್ ಜಶೆಂ
ಆಮಕಾ ದಾಳಿತೋಯ್
ಪುಣ್ ತೋ ಮಾಸ್ ಖಾಯನಾ
ಆತಾಂ ತೋ
ದಾಳಿತೋಯ್ ಖಾತಾ.

ಆಮಚೆ ಘರಾಂತ್
ಪಯಲೆಂ ತಾಕಾ
ಜೆವಣಾಕ್ ದೀನಾಶಿಲೆಂ
ಆತಾ ಹಾಂವ್ ತಾಜೆ ಘರಾ
ಗೆಲ್ಯಾರ್
ತೋ ಸಾಂಗತಾ
ನಾಕಾ ಸಾಯಬಾ
ತೂಂ ಆಮಗೆರ್ ಜೇವನಾಕಾ

ಆಮಚೆಂ ಚೆರ್ಡಾಲೆಂ
ಜಾಯ್ ದೀಸ್ ಹೊಲಾಂತ್
ತಾಜೆ ಘರಾಂತ್
ಸತ್ಯನಾರಾಯಣ್

ಹಾಂವ್ ಆನಿ ತೋ

ತೋ ಭಾಯಲೊ
ಆನಿ ಹಾಂವ್ ಭಿತರಲೊ

ಆತಾ ಮಾಕಾ ದಿಸತಾ
ಖಂಚೆ ಭಾಯರ್ ಆನಿ ಖಂಚೆ ಭಿತರ್
ದೆವಳಾ ಭಿತರ್ ಆಂಗಣ್ ಕೀ
ಆಂಗಣಾ ಭಿತರ್ ದೆವಳ್?

-ಗುರು ಬಾಳಿಗಾ

-मेल्विन रोड्रीगस