ಸಂಪಾದಕೀಯ್:
ಕೊಣಾಚೀಯ್ ಭುಕ್ ಥಾಂಬಂವ್ಚಿ ಕವಿತಾ
ಏಕ್ ಲ್ಹಾನ್ ಸಾನ್ ವಿಷಯ್ ಉತ್ರಾಂಚ್ಯಾ ಚಮತ್ಕಾರಾನ್ ಸಜವ್ನ್ ಕವಿನ್ ಮ್ಹಾನ್ ಕೆಲಾ. ಸಾದೆಪಣಾಂತ್ಲಿ ಕುಶೆಲತಾಯ್ ಕವಿಕ್ ಹೊಗ್ಳಿಕೆಚೊ ತುರೊ ದೀಂವ್ಕ್ ಸಕ್ತಾ ಆನಿ ತೊ ಉಬೊ ಆಸ್ಚ್ಯಾ ಪಾಂವ್ಡ್ಯಾಕ್ ಮರ್‍ಯಾದ್ ದೀಂವ್ಕ್ ಪಾವ್ತಾ. 'ಭುಕೆಲೊ' ಕವಿತಾ ಭಾಯ್ಲೆ ದೆಕಿಕ್ ಸಾದಿ ದಿಸೊಂಕ್ ಪುರೊ, ಪುಣ್ ಹೆ ಕವಿತೆನ್ ವೆಕ್ತ್ ಕೆಲ್ಲಿ ವಾಳಯ್ ಆಜ್‌ಕಾಲ್ ಹರ್‍ಯೆಕಾ ಸಾಹಿತ್ಯಾಕ್‌ಯ್ ಲಾಗೊನ್ ಯೆತಾ. ಇತ್ಲೆಂ ಕಳಿತ್ ಆಸೊನ್‌ಯ್, ಸಾಹಿತ್ಯ್ ಜೊ ರಚ್ತಾ ತ್ಯಾ ಸಾಹಿತ್ಯ್‌ಕಾರಾಚಿ ತೋಖ್ಣಾಯ್ ಕಿತ್ಲಿ ಕೆಲ್ಯಾರ್‌ಯ್ ಉಣಿಂಚ್! ಕವಿ ಆರ್ಥರ್ ಸೈತ್ ಸಾಹಿತ್ಯಾಚಿ ಪುಜಾ ಕರ್‍ಚ್ಯಾ ಅಸಲ್ಯಾಚ್ ಪಂಗ್ಡಾಚೊ ಮನಿಸ್.
ಕಿತ್ತುನ್ ಪಾಸುನ್ ಆಮ್ಚೆ ಸಹೃದಯಿ ವಾಚ್ಪಿ ಆಸ್ತಲೆ ತಿತ್ತುನ್ ಪಾಸುನ್ ಅಸಲೆ ವಾಳಯೆಕ್ ಬರ್ಕತ್ ನಾ. ಹೊ ವಾಚ್ಪಿ ಆನಿ ವಾಳಯೆ ಮದ್ಲೊ ಪಂತಾಟ್ ಕಿತ್ತುನ್ ಪಾಸುನ್ ಚಲ್ತಲೊ ಮ್ಹಾಕಾ ಖಬರ್ ನಾ. ಏಕ್ ದೀಸ್, ಜೀಕ್ ಎಕ್ಲ್ಯಾಚಿ ಜಾಂವ್ಕ್ ಸಾಧ್ಯ್ ಆಸಾ! ಹಿ ಜೀಕ್ ವಾಚ್ಪ್ಯಾಂಚಿ ಜಾಲಿ ತರ್ ಆಮ್ಚೆ ತಸಲ್ಯಾಂಚ್ಯಾ ಜಿವಾ ಭಿತರ್‍ಲ್ಯಾ ಉಸ್ವಾಸಾಕ್ ಶಾಂತಿ ಲಾಬ್ತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭುಕೆಲೊ
ಕವಿತಾ ಲಿಖ್ಲ್ಯೊ
-ಕಿತ್ಯಾಕ್ ಕವಿ ಭುಕೆಲೊ
ತಾಚೊ ಜಮೊ ಜಾಲೊ
ಛಾಪುನ್ ಬೂಕ್ ಕೆಲೊ
ತಾನೆಲ್ಲ್ಯಾ ವಾಚ್ಪ್ಯಾನ್
ಹೊ ಬೂಕ್ ವೆಲೊ
ವಾಚ್ಪಿ ಸಲ್ವಲೊ
ವಾಚುಂಕ್ ದಡ್ಬಡ್ಲೊ
ಮಾಳ್ಯಾಕ್ ಹೊ ಬೂಕ್ ಗೆಲೊ
ಆಜ್ ಆಜ್ಯಾಪ್!
ಜಾಯ್ ಮ್ಹಳ್ಯಾರಿ ದಿಸನಾ
ತರ್ ಖಂಯ್ ಹೊ ಬೂಕ್ ಗೆಲೊ?
ಹ್ಯೊಚ್ ಕವಿತಾ
ರುಚ್ಲ್ಯೊ ವಾಳಯೆಕ್ ದೆಕುನ್
ವಾಳಯೆನ್ ಬೂಕ್ ಖೆಲೊ
ಹೆಚ್ ವಾಳಯೆನ್
ಮ್ಹಜೋಯ್ ಬೂಕ್ 'ಬುಕ್' ಕೆಲೊ
ಯೆಂವ್ಚ್ಯಾ ವರ್‍ಸಾಕ್!
-ಆರ್ಥರ್ ಪಿರೇರಾ, ಒಮ್ಜೂರ್