ಸಂಪಾದಕೀಯ್:
ವಾರ‍್ಯಾಕ್ ಮ್ಹಣೊನ್ ಜನೆಲ್ ಉಗ್ತೆಂ ದವರ‍್ಲೆಂ, ಝೊಡ್ ವಾರೆಂ ಯೇವ್ನ್ ಗೆಲೆಂ
ಜಿವಿತಾಂತ್ ಜವಾಬ್ದಾರಿ ಹರ್ಯೆಕ್ಲ್ಯಾಕಿ ಆಸ್ತಾ. ಜಾಂವ್ಕ್ ಪುರೊ ಕುಟ್ಮಾಕ್ ಸಾಂಬಾಳ್ಚಿ, ಸಾಮಾಜಿಕ್ ಬರೆಪಣಾಚಿ, ಯಾ ಸ್ವಂತ್ ಫಾಯ್ದ್ಯಾಕ್ ಆಸ್ಚಿ. ಪುಣ್ ಚಡಾವತ್ ಜಾವ್ನ್ ಹೆ ಜವಾಬ್ದಾರೆ ಪಾಟ್ಲ್ಯಾನ್ ಏಕ್ ದಿಶ್ಟಾವೊ ಯಾ ಸ್ವಪಣ್ ಯಾ ಏಕ್ ಆಶಾ ಆಸ್ತಾಚ್. ಮನ್ಶಾಚೆ ಜಿಣ್ಯೆಂತ್ ಜಾಯ್ತೆ ಪಾವ್ಟಿಂ ಹಿ ಜವಾಬ್ದಾರಿ ಆಂದ್ಳಿ ಜಾವ್ನ್ ಬದಲ್ತಾನಾ, ಖಂಯ್ಚೇಯ್ ಚುಕವ್ಯೆತ್ ತಸಲೆ ತ್ರಾಸ್ ಸೈತ್ ತೊ ಸೊಸುನ್ ಘೆತಾ. ಹಾಚೊ ಫಳ್ ಜಾವ್ನ್ ಆಶೆಲ್ಲ್ಯಾ ಸಪ್ಣಾಂ ಸವೆಂ, ಸಂಗಿಂ ಆಸಲ್ಲೇಂಯ್ ತೊ ಹೊಗ್ಡಾವ್ನ್ ಘೆಂವ್ಚೆ ಸಂದರ್ಭ್ ಉದೆತಾತ್.
ಆಮ್ಚೆ ಪಯ್ಕಿ ಕಿತ್ಲ್ಯಾಂಕ್ ಹೊ ಅನ್ಭೋಗ್ ಜಾಂವ್ಕ್ ನಾ? ಆಮ್ಚೆ ಭೊಂವಾರಿಂ ಕಿತ್ಲೆಶೆ ಹ್ಯಾ ವರ್ಗಾಕ್ ಸೆರ್ವಾಲ್ಲೆ ನಾಂತ್?
ಸ್ಟೇನಿನ್ ಉಗ್ತೆಂ ಜನೆಲ್ ಏಕ್ ರೂಪಕ್ ಜಾವ್ನ್ ಮಾತ್ರ್ ಘೆತ್ಲಾಂ ಮ್ಹಣೊನ್ ಆಮಿ ಸಮ್ಜೊನ್ ಘೆತ್ಲೆಂ ಜಾಲ್ಯಾರ್, ಹೆ ಕವಿತೆನ್ ದಿಂವ್ಚೆ ಅರ್ಥ್ ವಿಸ್ತಾರಾಯೆಕ್ ಗಡ್ ಆಸ್ಚಿನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಗ್ತೆಂ ಜನೆಲ್
ಭಿತರ್ ಸರಲ್ಲ್ಯಾ ಥಂಡ್ ವಾರ‍್ಯಾಕ್
ಕೂಡ್ ಕಾಂಪೊಂಕ್ ಲಾಗ್ತಾನಾ
‘ಅಪ್ರೂಪ್’ ಮ್ಹಳ್ಳ್ಯಾ ನಿಬಾನ್
ಹಾಂವೆಂ ಜನೆಲ್ ಧಾಂಪ್ಲೆಂ ನಾ
ರಾನಾಂತ್ಲಿಂ ಪಿಸೊಳಿಂ ಭಿತರ್ ಸರೊನ್
ನಾಕ್, ದೊಳ್ಯಾಂ ಭೊಂವಾರಿಂ ಭೊಂವ್ತಾನಾ
ಭಾಯ್ಲ್ಯಾ ಅಕಾಸಾಂತ್ಲಿಂ ನಕ್ತಿರಾಂ ದೆಖ್ಚೆ ಅಶೆನ್
ಹಾಂವೆಂ ಜನೆಲ್ ಧಾಂಪ್ಲೆಂ ನಾ
ಘಡ್ಘಡ್ಯಾ ಪಯ್ಲ್ಯಾ ಝಗ್ಲಾಣ್ಯಾನ್
ಕುಡಾ ಭಿತರ್ ದಾಢ್ ಘಾಲ್ತಾನಾ
ಫುಡೆಂ ವೊತುಂಕ್ ಆಸ್ಚ್ಯಾ ಪಾವ್ಸಾಕ್ ರಾಕೊನ್
ಹಾಂವೆಂ ಜನೆಲ್ ಧಾಂಪ್ಲೆಂ ನಾ
ಅತಾಂ,
ಹಿಂವ್ ,ಪಿಸೊಳ್ಯಾಂಕ್ ಸೊಸ್ಲೆಂ
ಝಗ್ಲಾಣ್ಯಾವೆಳಾ ದೊಳೆ ಧಾಂಪ್ಲೆ
ಪುಣ್
ವಾರ‍್ಯಾಚೊ ಆನಂದ್ ಲಾಭ್ಲೊನಾ
ನಕ್ತಿರಾಂ ಪ್ರಕಾಸ್ ಫಾಂಕ್ಲೊನಾ
ಪಾವ್ಸಾ ಥೆಂಬೊ ಪಡ್ಲೊ ನಾ
ಆಖ್ರೇಕ್,
ಹಾಂಕಾಂ ರಾಕೊನ್ ಬಸಲ್ಲ್ಯಾ ಮ್ಹಾಕಾ
ಜನೆಲಾ ಭಿತರ್ ಲುಟ್ಕಾರ್ ರಿಗಲ್ಲೊ ತೆಂ ಕಳೊಂಕಚ್ ನಾ!!
-ಸ್ಟೇನಿ ಬೆಳಾ
संपादकीय:
वार्याक म्हणोन जनेल उग्तें दवर्लें, झोड वारें येवन गेलें
जिवितांत जवाब्दारी हऱ्येकल्याकी आसता. जावंक पुरो कुटमाक सांबाळची, सामाजीक बरेपणाची, या स्वंत फायद्याक आसची. पूण चडावत जावन हे जवाब्दारे पाटल्यान एक दिश्टावो या स्वपण या एक आशा आसताच. मनशाचे जिण्येंत जायते पावटीं ही जवाब्दारी आंदळी जावन बदल्ताना, खंयचेय चुकव्येत तसले त्रास सैत तो सोसून घेता. हाचो फळ जावन आशेल्ल्या सपणां सवें, संगीं आसल्लेंय तो होगडावन घेंवचे संदर्भ उदेतात.
आमचे पयकी कितल्यांक हो अनभोग जावंक ना? आमचे भोंवारीं कितलेशे ह्या वर्गाक सेर्वाल्ले नांत?
स्टेनीन उग्तें जनेल एक रूपक जावन मात्र घेतलां म्हणोन आमी समजोन घेतलें जाल्यार, हे कवितेन दिंवचे अर्थ विसतारायेक गड आसचिना.
-मेलवीन रोड्रिगस
कविता:
उग्तें जनेल
भितर सरल्ल्या थंड वार्याक
कूड कांपोंक लाग्ताना
‘अपरूप’ म्हळ्ळ्या निबान
हांवें जनेल धांपलें ना
रानांतलीं पिसोळीं भितर सरोन
नाक, दोळ्यां भोंवारीं भोंवताना
भायल्या अकासांतलीं नक्तिरां देखचे अशेन
हांवें जनेल धांपलें ना
घडघड्या पयल्या झगलाण्यान
कुडा भितर दाढ घाल्ताना
फुडें वोतुंक आसच्या पावसाक राकोन
हांवें जनेल धांपलें ना
अतां,
हिंव ,पिसोळ्यांक सोसलें
झगलाण्यावेळा दोळे धांपले
पूण
वार्याचो आनंद लाभलोना
नक्तिरां प्रकास फांकलोना
पावसा थेंबो पडलो ना
आखरेक,
हांकां राकोन बसल्ल्या म्हाका
जनेला भितर लुटकार रिगल्लो तें कळोंकच ना!!
-स्टेनी बेळा