ಸಂಪಾದಕೀಯ್:
ಗಿರೇಸ್ತ್ ಪ್ರತಿಮಾಂನಿ ವರ್ಣಿಲ್ಲಿ ದುಬ್ಳ್ಯಾ ಕವಿಚಿ ಗತ್
ಪ್ರತಿಮಾಂಚಿ ರಾಸ್ ಭರೊನ್ ವೊಮ್ತತಾ ಹೆ ಕವಿತೆಂತ್. ಹ್ಯೊ ಸಗ್ಳ್ಯೊ ಪ್ರತಿಮಾ ಕವಿನ್ ಸಾಂಗ್ಲ್ಯಾತ್ ಜಾಲ್ಯಾರಿ ಕಿತ್ಯಾ ಖಾತೀರ್? ಸ್ವತಾ ಕವಿ ಜಾವ್ನಾಸಲ್ಲ್ಯಾ ಆಪ್ಣಾಚಿ ಗತ್ ವರ್ಣುಂಕ್!
ಇತ್ಲೆಂ ಸಾಂಗ್ತಾನಾ ಕಲ್ವಂತಾಚೆಂ ಕಮರ್, ಗರಿಬಾಚೆಂ ಗುಮಟ್, ಮಳ್ಯಾಂತ್ಲೊ ಕಾರೆಣೊ, ದೊಂಗ್ರಾವೆಲೊ ಝರೊ - ಕಾಂಯ್ ಉಣೆಪಣಾಂತ್ ನಾಂತ್. ಪುಣ್ ಮನೀಸ್ ತಾಂಕಾಂ ವೊಳ್ಕುಂಕ್ ಸಕನಾ. ವೊಳ್ಕತಾನಾ ವೇಳ್ ಉತ್ರಾಲ್ಲೊ ಆಸ್ತಾ.
ಕೊಂಕಣಿಚೊ ಕವಿ ಜಾಲ್ಯಾರಿ ಅಸೋಚ್ ನ್ಹಯ್? ಮಾಗೀರ್ ಚಾ. ಫ್ರಾ. ದೆಕೊಸ್ತಾವಿಶಿಂ ತುಮಿ ಕಿತೆಂ ಮ್ಹಣ್ತಾತ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಚಾರ್ ಚೊವ್ಗಾಂ ಮಾನ್ ನಾ
ಕಲ್ವಂತಾಚ್ಯಾ ಕಮ್ರಾವೆರಿ ಭಾಂಗರಾಚೆಂ ನೆವಾಳೆಂ
ನಾಕಾ ನೊತಿಂ ಗಳ್ಯಾಂ ಆಸತ್ ಸುವರ್ಣಾಚೆಂ ಘೊಸಾಳೆಂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಸಂಸಾರಾಕ್ ಹಾಚೆಂ ಭಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ
ಗರಿಬಾಚ್ಯಾ ಗುಮ್ಟಾವೆರಿ ಸೊಭಾಗೆಚೊ ನಾದ್‌ಮೂ
ತಳ್‌ವ್ಯಾಂ ತಾಲ್ ಪಾಯಾಂ ನಾಚ್ ಸಂಗೀತಾಚೊ ಸಾದ್‌ಮೂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಆಯ್ಕಾತೆಲ್ಯಾಂ ಕಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ
ಮಳ್ಯಾಂತುಲ್ಯಾ ತಳ್ಯಾಂ ತಿರೀಂ ಕಾರೆಣ್ಯಾಚಿ ರಾಸ್‍ಮೂ
ವಾಸಾ ತಾಚ್ಯಾ ರೊಸಾ ತಾಚ್ಯಾ ಜಾಯ್ತ್ಯೊ ವ್ಯಾಧಿ ನಾಸ್‌ಮೂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಕೊಣಾಕ್ ತಾಚೆಂ ಧ್ಯಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ
ದೊಂಗ್ರಾವೆಲ್ಯಾ ಝರ‍್ಯಾವೆರಿ ಅಮೃತಾಚಿ ಧಾರ್‌‍ಮೂ
ಗೊಡಾ ಮಿಟಾ ಲವಣಾಂಚಿ ಆಸಾ ತಾಂತುಂ ಥಾರ್‌ಮೂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಕೊಣಾಕ್ ತಾಚಿ ತಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ
ಕೊಂಕಣಿಚೊ ಕವಿ ಹಾಂವ್ ಜಾತಾತ್ ಮ್ಹಜಿಂ ಸೊಭಾಣಾಂ
ಮರ್‌ಚೆ ಆದಿಂ ಕರೀತ್ ಆಸಾತ್ ಮಡ್ಯಾಚೆರಿ ರುದಾನಾಂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಜೆವ್ಣಾಕ್ ಕೆದಿಂ ಪಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ
-ಚಾ. ಫ್ರಾ. ದೆಕೊಸ್ತಾ
च्यार चोवगां मान ना
कल्वंताच्या कम्रावेरी भांगराचें नेवाळें
नाका नोतीं गळ्यां आसत सुवर्णाचें घोसाळें
तरी बाबा आयकात म्हाका
संस्राक हाचें भान ना
च्यार चोवगां मान ना
गरीबाच्या गुम्टावेरी सोभागेचो नादमू
तळ्व्यां ताल पायां नाच संगीताचो सादमू
तरी बाबा आयकात म्हाका
आयकातेल्यां कान ना
च्यार चोवगां मान ना
मळ्यांतुल्या तळ्यां तिरीं कारेण्याची रासमू
वासा ताच्या रोसा ताच्या जायत्यो व्याधी नासमू
तरी बाबा आयकात म्हाका
कोणाक ताचें ध्यान ना
च्यार चोवगां मान ना
दोंग्रावेल्या झर्यावेरी अमॄताची धारमू
गोडा मिटा लवणांची आसा तांतूं थारमू
तरी बाबा आयकात म्हाका
कोणाक ताची तान ना
च्यार चोवगांक मान ना
कोंकणीचो कवी हांव जातात म्हजीं सोभाणां
मरचे आदीं करीत आसात मड्याचेरी रुदानां
तरी बाबा आयकात म्हाका
जेवणाक केदीं पान ना
च्यार चोवगां मान ना
-चा. फ्रा. देकोस्ता