ಸಂಪಾದಕೀಯ್:

ಆಮಿ ಮಾಂಕೊಡ್ ಜಾತಾಂವ್ ಜಾಲ್ಲ್ಯಾನ್, ಗಾಂಧಿನ್ ಆಶೆಲ್ಲೊ ಸಂಸಾರ್ ಆಜ್ ಉರ‍್ಲೊನಾ.

ಹಿ ಏಕ್ ದಾದಾಗಿರಿ ಮ್ಹಣೊಂ? ಹಿ ಏಕ್ ಗುಲಾಮ್‍ಗಿರಿ ಮ್ಹಣೊಂ? ಆಯ್ಕೊಂಕ್ ಆಶೆನಾತಲ್ಲ್ಯಾ ಕಾನಾಂಕ್ ಭೊಂವಾರಾಂತ್ಲೆ ಬೊಗೊಳ್ಪಿ, ಕುಸ್ಡ್ಯಾ ಆನಿ ಕುಸ್ಕ್ಯಾ ಉತ್ರಾಂಚೆ ಫಾರ್ ಸೊಡ್ತಾನಾ, ಕಾನ್ ಕೆಪ್ಪೆ ಜಾಯ್ನಾಸ್ತಾನಾ ರಾವ್ತಿತ್? ಉಲೊಂವ್ಕ್ ಆಶೆನಾತಲ್ಲ್ಯಾ ತೊಂಡಾಥಾವ್ನ್, ತಾಂಕಾಂ ಜಾಯ್ ಜಾಲ್ಲಿಂ ಉತ್ರಾಂ ಸಾಂಗೊಂಕ್ ಲಾಯ್ಲ್ಯಾ ಉಪ್ರಾಂತ್, ಜಿಬೆಚೆರ್ ಹುನೊನಿ ಶಿಸೆಂ ವೊತ್ಲೆಂ ಜಾಲ್ಯಾರ್, ವಾಚ್ಯಾ ಮೊನಿ ಜಾಯ್ನಾಸ್ತಾಂ ರಾವತ್? ವಾಯ್ಟ್ ಪಳೆಂವ್ಕ್ ಆಶೆನಾತ್ಲ್ಯಾ ದೊಳ್ಯಾಂಕ್ ಸಂಸಾರಾಚೆಂ ಕುಸ್ಡೆಪಣ್ ದಾಕಯ್ಲೆಂ ಜಾಲ್ಯಾರ್, ದೊಳೆ ಕುರ್ಡೆ ಜಾಯ್ನಾಸ್ತಾಂ ರಾವ್ತಿತ್?

ವಾಯ್ಟ್ ಪಳೆಂವ್ಕ್ ನಜೊ, ಉಲಂವ್ಕ್ ನಜೊ ಆನಿ ಆಯ್ಕೊಂಕ್ ನಜೊ ಮ್ಹಳ್ಳಿ ಶಿಕವ್ಣ್ ದಿಂವ್ಚ್ಯಾಕ್ ಗಾಂಧೀಜಿನ್ ದೊಳೆ, ತೋಂಡ್ ಆನಿ ಕಾನ್ ಧಾಂಪುನ್ ಆಸ್ಲ್ಯಾ ತೆಗಾಂ ಮಾಂಕ್ಡಾಂಚಿ ವೊಪಾರ್ ವಾಪರಲ್ಲಿ. ಆಯ್ಚ್ಯಾ ಕಾಳಾರ್ ಹೆಪರಿಂ ಜಿಯೆಂವ್ಕ್ ತಿತ್ಲೆಂ ಸಲೀಸ್ ನ್ಹಯ್. ಜರ್ ಕೊಣೀ ಹೆ ಭಾಶೆನ್ ಜಿಯೆಂವ್ಕ್ ಅಶೆಲೊ ತರ್ ಆಯ್ಚೆಂ ಸಾಮಾಜಿಕ್ ವಾತಾವರಣ್ ಹಾಕಾ ಪೂರಕ್ ನಾ. ಗಾಂಧಿಚೆ ತತ್ವ್ ಆಜೂನಿ ಜಿವೆ ಅಸಾತ್. ಪುಣ್ ಹ್ಯಾ ತತ್ವಾಂ ವಿರೋಧಿ ಜೀವನ್ ಶೈಲೆನ್ ಹ್ಯಾ ತತ್ವಾಂಚೆ ಪ್ರಸ್ತುತಾಯೆಕ್ ಮಾಂಕೊಡ್ ಕರ್ನ್ ಸೊಡ್ಲಾಂ ಮ್ಹಳ್ಳೆವಿಶಿಂ ಬೋವ್ ಸುಂದರ್ ರಿತಿನ್ ಕವಿನ್, ಹೆ ಕವಿತೆಂತ್ ಜಾಹೀರ್ ಕೆಲಾಂ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಗಾಂಧಿಬಾಪಾಚೆ ಮಾಂಕೊಡ್

ಆಮಿ ತೇಗ್ ಮಾಂಕೊಡ್ ಭಾವ್
   ಗಾಂಧಿ ಬಾಪಾಚೆ
      ವಾಯ್ಟಾಥಾವ್ನ್ ಪಯ್ಸ್ ರಾಂವ್ಚ್ಯಾಕ್
ದೊಳೆ, ಕಾನ್, ತೋಂಡ್ ಧಾಂಪುನ್ ಬಸಲ್ಲೆ.

ಆಮ್ಚೆ ಮಧ್ಲೊ ಎಕ್ಲೊ
   ವಾಯ್ಟ್ ಪಳೆಂವ್ಕ್ ಇನ್ಕಾರ್ ಕೆಲ್ಲೊ
      ವಾಯ್ಟ್ ಮಾತ್ ದಾಕಂವ್ಚ್ಯಾ ಸಂಸಾರಾನ್
ಕರ್ನ್ ಸೊಡ್ಲೊ ತಾಕಾ ಸಾಸಣ್ ಕುರ್ಡೊ

ಆಮ್ಚೆ ಮಧ್ಲೊ ಎಕ್ಲೊ
   ವಾಯ್ಟ್ ಆಯ್ಕೊಂಕ್ ನಾಕಾ ಮ್ಹಳ್ಳೊ
      ವಾಯ್ಟ್ ಮಾತ್ ಉಲಂವ್ಚ್ಯಾ ಸಂಸಾರಾನ್
ಕರ್ನ್ ಸೊಡ್ಲೊ ತಾಕಾ ಸಾಸಣ್ ಕೆಪ್ಪೊ

ಆಮ್ಚೆ ಮಧ್ಲೊ ಎಕ್ಲೊ
   ವಾಯ್ಟ್ ಉಚಾರ‍್ಚ್ಯಾಕ್ ಪಾಟ್ ಕೆಲ್ಲೊ
      ವಾಯ್ಟ್ ಮಾತ್ ಆಯ್ಕೊಂಕ್ ಆಂವ್ಡೆಂವ್ಚ್ಯಾ ಸಂಸಾರಾನ್
ಕರ್ನ್ ಸೊಡ್ಲೊ ತಾಕಾ ಸಾಸಣ್ ಮೊನೊ

ತೇಗ್ ಆಮಿ ಜಿವೆ ಆಸಾಂವ್
   ದೊಳೆ, ಕಾನ್, ತೋಂಡ್ ಧಾಂಪುನ್
      ಗಾಂಧಿ ಬಾಪಾಚಿ ಸೃಷ್ಟಿ ಮ್ಹಣೊನ್
ಆಜೂನ್ ಪರ್ಯಾಂತ್ ಮಾಂಕೊಡ್ ಜಾವುನ್....

-ಸ್ಟ್ಯಾನಿ ಬೆಳಾ

संपादकीय:

आमी मांकोड जातांव जाल्ल्यान, गांधीन आशेल्लो संसार आज ऊर‍्लोना.

ही एक दादागिरी म्हणों? ही एक गुलाम‍गिरी म्हणों? आयकोंक आशेनातल्ल्या कानांक भोंवारांतले बोगोळपी, कुस्ड्या आनी कुसक्या उत्रांचे फार सोडताना, कान केप्पे जायनासताना रावतीत? उलोवंक आशेनातल्ल्या तोंडाथावन, तांकां जाय जाल्लीं उत्रां सांगोंक लायल्या उपरांत, जिबेचेर हुनोनी शिसें वोतलें जाल्यार, वाच्या मोनी जायनासतां रावत?  वायट पळेवंक आशेनातल्या दोळ्यांक संसाराचें कुस्डेपण दाकयलें जाल्यार, दोळे कुर्डे जायनासतां रावतीत?

वायट पळेवंक नजो, उलवंक नजो आनी आयकोंक नजो म्हळ्ळी शिकवण दिंवच्याक गांधीजीन दोळे, तोंड आनी कान धांपून आसल्या तेगां मांकडांची वोपार वापरल्ली.  आयच्या काळार हेपरीं जियेवंक तितलें सलीस न्हय.  जर कोणी हे भाशेन जियेवंक अशेलो तर आयचें सामाजीक वातावरण हाका पूरक ना. गांधिचे तत्व आजूनी जिवे असात.  पूण ह्या तत्वां विरोधी जीवन शैलेन ह्या तत्वांचे प्रसतुतायेक मांकोड कर्न सोडलां म्हळ्ळेविशीं बोव सुंदर रितीन कवीन, हे कवितेंत जाहीर केलां.

-मेलवीन रोड्रिगस

कविता: