ಸಂಪಾದಕೀಯ್:

ಕುಡಿಥಾವ್ನ್ ಮೆಕ್ಳೊ ಜಾಂವ್ಚ್ಯಾ ಅತ್ಮ್ಯಾಕ್ ಸರ್ಗಿಂಚೊ ಉಜ್ವಾಡ್ ಗರ್ಜೆಚೊ

ಸಲ್ವಣಿ ಆನಿ ಜೀಕ್ ಮನ್ಶಾ-ಜಿವಿತಾಚ್ಯೊ ಆಡಾಂವ್ಕ್ ನಜೊ ಜಾಲ್ಲ್ಯೊ ಸಂಗ್ತಿ. ಕೊಣಾಕ್ ಜೀಕ್ ಮ್ಹಳ್ಳಿ ತಿ ಹಾತಾಕ್ ಪಾವನಾತಲ್ಲಿ ವಸ್ತ್ ಜಾಂವ್ಕ್ ಪುರೊ ಆನಿ ಕೊಣಾಕ್ ಸಲ್ವಣಿ ಭೊಗುನ್ ಕಳಿತ್ ನಾ ಆಸೊಂಕ್ ಪುರೊ. ಪುಣ್ ಜಿವಿತಾಚಿ ಸಾಂಜ್ ಜಾತಾನಾ, ಆನಿ ಸಗ್ಳೆಂ ಸಂಪದ್ಲೆಂ ಮ್ಹಳ್ಳ್ಯಾಚೆಂ ಗಿನ್ಯಾನ್ ಮನ್ಶಾಕ್ ಕಳೊಂಕ್ ಲಾಗ್ತಾನಾ, ಉರ‍್ತಾ ಏಕಚ್ ವಾಟ್. ಸರ್ಗಾಕ್ ವೆಚಿ! ಕುಡಿ ಥಾವ್ ಮೆಕ್ಳೊ ಜಾಂವ್ಚ್ಯಾ ಅತ್ಮ್ಯಾಚಿ ಸುರಕ್ಷಿತಾಯ್ ಹಾಂಗಾಸರ್ ಗರ್ಜೆಚಿ ಜಾತಾ.

ಅತ್ಮ್ಯಾಕಯ್ ಉಜ್ವಾಡಾಚಿ ವಾಟ್ ಜಾಯ್ಜಾಯ್ ಪಡ್ತಾ. ಆನಿ ಹೆಂಚ್ ಹಾಂಗಾಚೊ ಕವಿ ಸಾಂಗ್ತಾ.

ಪಯ್ಲೆಪಾವ್ಟಿಂ ಕವಿತಾ ಕುಳಾರಾಚಿ ಸೊಭಾಯ್ ಚಾಕುಂಕ್ ಹಾಂಗಾ ಆಯಿಲ್ಲ್ಯಾ ನೆವಿಲ್ ಫೆರ್ನಾಂಡಿಸಾಕ್ ಆಮಿ ಹುನೊನಿ ಯೆವ್ಕಾರ್ ದಿತಾಂವ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸಾಂಜ್ ಜಾತಾನಾ

ಸುರ್ಯಾಚೆಂ ದಿಸಾ ಪಯ್ಣ್ ಸಂಪ್ತಾನಾ
ಅಂಧ್ಕಾರಾ ಥಾವ್ನ್ ಪಯ್ಸ್ ರಾವೊಂಕ್
ಜಿಣಿ ರಾಕ್ತಾ ನವ್ಯಾ ಉಜ್ವಾಡಾಕ್
ತೆದ್ನಾಂ ಉಗ್ದಾಸ್ ಯೆತಾ
ಆಮಾಶೆಚಿ ರಾತ್ !

ಪರ್ತ್ಯಾನ್ ನಿರಾಸ್ತಾ
ಚಂದ್ರೆಮಾಕ್ ಶಿರಾಪ್ತಾ
‘ಲಾಗೊಂ ತುಕಾ ಗ್ರಹಣ್
ರಾವೊಂ ತುಜೆಂ ಭ್ರಮಣ್
ಮೆಳನಾ ಜಾಂವ್ ತುಕಾ ಉಂಚ್ಲೆಂ ಶಿಯಾಸಣ್
ತುಜೆರ್ ಫೊಂಡ್ಕುಲೆ ಪಡೊಂಕ್ ಹೆಂಚ್ ಕಾರಣ್’

ಕ್ಷಣಾಚ್ಯಾ ರಾಗಾಕ್ ತೊ ವಿರಾರ್ ಜಾತಾ
ಕ್ರೂರ್ - ಕರ್ಮಿಪಣಾಚಿಂ
ಕಾಮಾಂ ಕರುಂಕ್ ಧೈರ್ ಘೆತಾ
ದ್ವೇಶ್ ಕಾಡುಂಕ್ ಪಳೆತಾ
ಆಕ್ರೇಕ್ ಚುರ್ಚುರ‍್ತಾ, ರಡ್ತಾ, ಕಂಗಾಲ್ ಜಾವುನ್
ಅತ್ಮೊ ಹೊಗ್ಡಾವ್ನ್ ವಾಟೊ ಸೊಧ್ತಾ
ಉಜ್ವಾಡಾಚ್ಯೊ!

-ನೆವಿಲ್ ಫೆರ್ನಾಂಡಿಸ್