ಸಂಪಾದಕೀಯ್:
ಮನ್ಶಾ ಸಂಬಂಧಾಚ್ಯಾ ತುಟಾಫುಟಿಚೆಂ ಏಕ್ ಗೀತ್
ಎಕಾ ಜಿವಾಕ್ ಜೀವ್ ದಿಲ್ಲ್ಯಾ ಜಿವಾಚೆಂ ಜೀವ್ ಆಸ್ತಾನಾಂಚ್ ನಪ್ಪಟ್‌ನಾರ್ ಜಾಂವ್ಚೆಂ ಏಕ್ ಘಡಿತ್ ಹಾಂಗಾಸರ್ ಮಾರ್ಮಿಕ್ ರಿತಿನ್ ಉಬೆಂ ಜಾಲಾಂ. ತಶೆಂ ನಪ್ಪಟ್‌ನಾರ್ ಜಾಲ್ಲೊ ಜೀವ್ ಆಕ್ರೇಚೆ ಘಡ್ಯೆ ಪಾಸತ್ ಆಪ್ಣಾಚ್ಯಾ ಕುಸ್ವ್ಯಾಂತ್ ವ್ಹಾವಯಿಲ್ಲ್ಯಾ ಫಳಾಖಾತೀರ್ ಆಶೆವ್ನ್ ಕಾನ್-ದೊಳೆ ಸೊಡುನ್ ರಾಕೊನ್ ರಾಂವ್ಚೆಂ ಸನ್ನಿವೇಶ್ ಕಸಲ್ಯಾಯ್ ಕಸಾಪ್ಪ್ಯಾಚೇಂಯ್ ಕಾಳೀಜ್ ಕಡಯ್ತಾ. ಆವಯ್-ಪುತಾ ಮದ್ಲೊ ಸಂಬಂಧ್ ಆನಿ ತ್ಯಾ ಸಂಬಂಧಾ ಮಧೆಂ ತಿಸ್ರೊ ಏಕ್ ಸಂಬಂಧ್ ಘುಸ್ತಾನಾ, ಪರ್‍ನ್ಯಾ ಸಂಬಂಧಾಂತ್ ಯೆಂವ್ಚಿ ತುಟಾಫುಟ್ ಹೆ ಕವಿತೆಂತ್ ಉಟೊನ್ ದಿಸ್ತಾ.
ಹ್ಯಾಚ್ ವಿಷಯಾಚೆರ್ ಹ್ಯಾ ಆದೀಂಯ್ ಜಾಯ್ತ್ಯಾಂನಿ ಸಾಂಗ್ಲಾಂ ಆಸ್ಯೆತ್. ಪುಣ್ ಕುಟ್ಮಾ ಸಂಬಂಧಾಂಚಿಂ ಪಾಳಾಂ ಬಳಾಧಿಕ್ ರೊಂಬೊನ್ ಆಸ್‌ಲ್ಲೆ ಭಾರತೀಯ್ ಸಂಸ್ಕೃತೆಂತ್, ಅಸಲೆಂ ಏಕ್ ಘಡಿತ್ ಜಿರಂವ್ಕ್ ಜಾಯ್ನಾ ತಸಲಿ ಉಂಡಿ ಜಾವ್ನ್ ಗೆಲ್ಯಾ. ತ್ಯಾಚ್ ಖಾತೀರ್ ಸನ್ನು ಮೊನಿಸಾಚಿ ಹಿ ಕವಿತಾ ಆಯ್ಚ್ಯಾ ದಿಸಾಕ್ ಲೆಗುನ್ ವಾಚ್ತಲ್ಯಾಂಚಿಂ ಕಾಳ್ಜಾಂ ಮನಾಂ ಜಿಕೊಂಕ್ ಸಕ್ತಾ.
ಮುಂಬಯ್ ತಸಲ್ಯಾ ಮ್ಹಾನಗರಾಂತ್ ಸಾಹಿತಿಕ್ ತಶೆಂ ಸಾಂಸ್ಕೃತಿಕ್ ಶೆತಾಂತ್ ಆಪ್ಣಾಕ್‌ಚ್ ಸಮರ್ಪಿಲ್ಲೊ ಸನ್ನು, ಆಜ್ ದುಬಾಯ್ ಶೆರಾಂತ್ ಆಸೊನ್ ತೆಂಚ್ ಮಿಸಾಂವ್ ಮುಕಾರ್ ವ್ಹರೊನ್ ಆಸಾ. ಹೆ ಕವಿತೆಕ್ ತುಮಿ ದಿಂವ್ಚೊ ಯೆವ್ಕಾರ್ ತಾಚ್ಯಾ ಮಿಸಾಂವಾಂತ್ ತಾಕಾ ಗರ್ಜೆಚಿ ಹುಮೆದ್ ದಿತಲೊ ಮ್ಹಳ್ಳೊ ಆಮ್ಚೊ ಭರ್‍ವಸೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರುದಾನ್
ಹಾತಾಂತ್ ಕೊಂತ್, ಕರ್‍ತಾಂ ರಜಾರ್
ಮಾಗ್ಣೆಂ ದುಕಾ ಖಂತಿಚೆಂ
ದುಕಾಂ ಸಭಾರ್, ಕಾಳ್ಜಾ ಖಾಂಚಿರ್
ಚಿಂತಾಂ ದಿಸಾ ರಾತಿಚೆಂ
ನಾಸ್ತಾಂ ಆಧಾರ್, ಭೊಗ್ತಾಂ ಅನಾಥ್
ಕುಟ್ಮಾವಿಣೆಂ ಗತಿಚೆಂ
ವಿಧಿ ಖೆಳಾನ್, ಕುಟ್ಮಾ ಫಳಾನ್
ಖಾವಯ್ಲೆಂ ಶಿತ್ ಆಸ್ರ್ಯಾಚೆಂ!
ಸಾಂಗುಂ ಕಶೆಂ, ಸೊಡುಂ ಕಿತೆಂ
ಮತಿಕ್ ವೆಂಗ್ಲಾಂ ರುದಾನ್
ಕರುನ್ ಪೊಸಪ್, ದಿತಚ್ ಶಿಕಪ್
ಆರಾಯ್ಲೆಂ ತಾಕಾ ದುಡ್ವಾನ್
ಬಾಕಿ ರೀಣ್, ಮೊಗಾ ಋಣ್
ನಾಡ್ಲೆಂ ಸರ್ಪಾ ಎವೆನ್
ಮ್ಹಜ್ಯಾಚ್ ರಗ್ತಾನ್, ಸ್ತ್ರೀಯೆಕ್ ಆಶೆವ್ನ್
ಪೊಸ್ಕೆಂ ಘೆತ್ಲೆಂ ಆಸ್ರ್ಯಾನ್!
ಆಜ್ ಕೂಡ್, ರುಕಾಡ್ ಜಾಲ್ಯಾ
ಕಾತಿ-ಮಿರಿ ಪರ್ನಿ ಜಾಲ್ಯಾ
ದುಕಾಂ ಝರ್ ದೊಳ್ಯಾಂತ್ ಆಟೊನ್
ಚಿಂತ್ನಾಂ ಆಂಕ್ರಿ ಜಿವಿ ಜಾಲ್ಯಾ
ಉಮಾಳೆ ವ್ಹಾಂವ್ತಾತ್, ಕಾಳ್ಜಾಂತ್ ಮ್ಹಜ್ಯಾ
ಬೊಬಾಟುಂಕ್ ಆಶಾ ಜಬ್ಬೊರ್ ಜಾಲ್ಯಾ
ಉಚಾರುಂ ಕಶಿಂ ಭೊಗ್ಣಾಂ ಮ್ಹಜಿಂ
ಜೀಬ್ ತಶೀಯ್ ಮೊನಿ ಜಾಲ್ಯಾ!
ಎಕ್ಸುರಿಂ, ನಾ ಏಕ್‌ಯ್ ಸಾಂಗಾತ್
ಕುಟ್ಮಾವಿಣೆಂ ಜೀಣ್ ಕೊಣ್ ವರ್ಣಿತ್?
ಆವಾಜ್ ನಾ, ಫಕತ್ ರುದಾನ್
ಸರ್ವೆಸ್ಪರ್ ಮ್ಹಜೆಂ ಮಾಗ್ಣೆಂ ಆಯ್ಕತ್?
ಆಶೆಚೆಂ ಕೀರ್ಣ್, ದಾರ್ವಟ್ಯಾರ್ ಫಾಂಕತ್?
ಪೂತ್ ಮ್ಹಜೊ ಪರತ್ ಆಪಯ್ತ್?
ಜಿಯೆಂವ್ಚಿ ಆಶಾ ನಾಸ್ತಾಂ,
ಆಶೆವ್ನ್ ಆಸಾಂ ಪುತಾಕ್
ಕೂಡ್ ಮ್ಹಜಿ ಫೊಂಡಾಂತ್ ನಿದತ್?
ನಿರ್ಮಿನಾಕಾ ಮ್ಹಾತಾರ್‌ಪಣ್,
ಉಟಯ್ ವಾದಾಳ್ ದೆವಾ
ಕಿತೆಂ ಉರ್‍ಲಾಂ ದುಕಿ ಅತ್ಮ್ಯಾಂತ್!
ಆಜ್ ದುಕಾಂ ಝರಿ ಸುಕೊನ್ ಗೆಲ್ಯಾತ್
ಚಿಂತ್ನಾಂ ಮ್ಹಜಿಂ ಗೊಬೊರ್ ಜಾಲ್ಯಾಂತ್
ಉಸ್ವಾಸ್ ಮ್ಹಜೊ ರಾವೊನ್ ಗೆಲಾ
ಕೂಡ್ ಮ್ಹಜಿ ನಿದಾಯ್ತಾತ್ ಪೆಟೆಂತ್
ತರೀ, ಅತ್ಮೊ ಮ್ಹಜೊ ರಾಕೊನ್ ರಾವ್ಲಾ ಆಶೆನ್
ಕೆದ್ನಾ ಪೂತ್, ಆಸ್ರ್ಯಾ ದಾರಾರ್ ಉದೆತ್?
-ಸನ್ನು ಮೊನಿಸ್, ಬೊಳಿಯೆ