ಸಂಪಾದಕೀಯ್:
ಕವಿತಾ ಕುಳಾರಾಂತ್ 'ಕೊಂಕಣ್ ಕೊಗುಳ್'
ಕೊಂಕಣಿ ಸಂಗೀತ್ ಮ್ಹಣ್ತಾನಾ ಜರ್ ಕೊಣಾಯ್ಚೆ ಜಿಬೆರ್ ವಿಲ್ಫಿ ರೆಬಿಂಬಸಾಚೆಂ ನಾಂವ್ ಯೇನಾ, ತರ್ ತ್ಯಾ ಮನ್ಶಾಕ್ ಕೊಂಕಣಿ ಭಾಶೆವಿಶಿಂಚ್ ಗಿನ್ಯಾನ್ ನಾ ಮ್ಹಳ್ಳೆಂ ವಾಕ್ಮೂಲ್ ಮುಲಾಜ್ ನಾಸ್ತಾಂ ದಿವ್ಯೆತಾ. ಕೊಂಕಣಿ ಜೆನ್ನಾಂ ಪಾಸುನ್ ಉರ್‍ತಾ, ತೆನ್ನಾಂ ಪಾಸುನ್ ವಿಲ್ಫಿ ರೆಬಿಂಬಸ್ ಉರ್‍ತಾ ಸಾಂಗ್ಚ್ಯಾಂತ್ ಕಸಲೋಯ್ ಸೈಲಾಪ್ ನಾ. ತಿತ್ಲೆ ವಿಸ್ತಾರಾಯೆಕ್, ಬಳ್ವಂತ್ ರಿತಿನ್ ಹ್ಯಾ ಎಕೆ ವೆಕ್ತಿನ್ ಆಪ್ಲೆ ಪ್ರತಿಭೆಚಿಂ ಕಿರ್ಣಾಂ ಫಾಂಕಯ್ಲ್ಯಾಂತ್. ಆನಿ ತೊ ಉಜ್ವಾಡ್ ಸಾಸ್ಣಾಕ್ ಬಾಳ್ತಲೊ.
ಕೊಂಕಣಿ ಕಾಂತಾರಾಂ ಆನಿ ಕವಿತಾ ಮಧ್ಲೆಂ ಅಧ್ಯಯನ್ ಕೆಲ್ಲ್ಯಾಂಕ್ ಏಕ್ ಕವಿ ಜಾವ್ನ್ ವಿಲ್ಫಿ ರೆಬಿಂಬಸ್ ಖಂಯ್ಚ್ಯಾ ಪಾಂವ್‌ಡ್ಯಾರ್ ಆಸಾ ಮ್ಹಳ್ಳೆವಿಶಿಂ ಜರೂರ್ ಜಾಣ್ವಿಕಾಯ್ ಆಸ್ತಲಿ. ಆಪ್ಣಾಕ್ ಕವಿಂಚೆ ಫಂಕ್ತಿರ್ ಕೆದಳಾಯ್ ಲೆಕೊಂಕ್ ನಾತ್‌ಲ್ಲೊ ವಿಲ್ಫಿ ರೆಬಿಂಬಸ್, ಜಾಯ್ತೆಪಾವ್ಟಿಂ ತಾಚ್ಯಾ ಪದಾಂನಿ ಅಸಲೆ ಎಕೆ ಕವಿಂಚೆ ಫಂಕ್ತಿಕ್‌ಚ್ ಸವಾಲ್ ಕರುನ್ ಮ್ಹಳ್ಳೆಬರಿ ಉಬೊ ಜಾಲ್ಲೊ ಝಳ್ಕತಾ. ತಾಚಿ ಭಾಸ್ ಸಾಧಿ ದಿಸ್ಯೆತಾ, ಪುಣ್ ತಿ ಕಾಳ್ಜಾಚಿ ಭಾಸ್. ತಾಂತುಂ ಅಲಂಕಾರ್ ಭರೊನ್ ಉಮಾಳ್ತಾತ್. ದೆಕುನ್ ತಾಚೆಂ ಹರ್‍ಯೆಕ್ ಉತರ್ ಸುಕ್ಣೆಂ ಜಾವ್ನ್ ತುಜ್ಯಾ ಮನಾಂತ್ ಘೊಂಟೆರ್ ಬಾಂದ್ತಾ.
ವಿಲ್ಫಿ ರೆಬಿಂಬಸಾನ್ ಕೆದಳಾಕಿ 'ಕವಿತಾ ಕುಳಾರ್' ಸುಂರ್‍ಗಾರಾಂವ್ಕ್ ಯೇಜಾಯ್ ಆಸ್‌ಲ್ಲೆಂ. ಆಯ್ಲೆವಾರ್ ಜಾಲ್ಲೆ ಮುಲಾಕತೆಂತ್ ಹಿ ಆಮ್ಚಿ ಆಶಾ ಸುಫಳ್ ಕರುಂಕ್ ತಾಣೆ ಸಯ್ ಘಾಲಿ. 'ಕೊಂಕಣ್ ಕೊಗುಳ್' ತುಮ್ಚ್ಯಾ ಕಾಳ್ಜಾಂಕ್ ಸದಾಂಕಾಳ್ ಸುಖ್ ದಿತಲಿ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಳ್ಬಾವಯ್ಲ್ಯಾ ಧೊವಾ
ಮೊಳ್ಬಾವಯ್ಲ್ಯಾ ಧೊವಾ
ಭೊಂವ್ತಾಯ್ ಗಾಂವಾನ್ ಗಾಂವಾ
ಆಪವ್ನ್ ದಾಕಯ್ ಮೊಗಾಕ್ ಮ್ಹಜ್ಯಾ
ಜೀವ್ ದೀ ಮ್ಹಜ್ಯಾ ಜಿವಾಕ್
ಮೋಗ್ ತೊ ಮ್ಹಜೊ ಗೆಲಾ
ಆಜ್ ಹಾಂವ್ ಎಕ್ಲಿಂ ಜಾಲ್ಯಾಂ
ಸುಖ್ ದುಕಾಂಚ್ಯಾ ಲ್ಹಾರಾಂ ಮಧೆಂ
ಉಪ್ಯೆಂವ್ಕ್ ನೆಣಾ ಜಾಲ್ಯಾಂ
ಲಗ್ನಾ ಬಾಂಧಾಕ್ ವೆಚೆಂ
ಮೊಗಾಚೆಂ ಏಕ್ ತಾರುಂ
ಮಧೆಂ ದರ್ಯಾಂತ್ ಬುಡೊನ್ ಗೆಲೆಂ
ವಿಘ್ನಾಂಚೆಂ ಲ್ಹಾರ್ ಮಾರುನ್
ಹ್ಯಾ ವಗ್ತಾ ಹಾಕ್ ಮಾರ್‍ತಾಂ
ಕೋಣ್ ದೀತ್ ಆಧಾರ್
ಕೋಣ್ ನಾ ಜಾಲೊ ಆಪ್ಲೊ ಮ್ಹಣೊಂಕ್
ದೀಸ್ ಆದ್ಲೆ ಚಿಂತಾನಾ
ದುಕಾನ್ ರಡೊಂಕ್ ಯೆತಾ
ರುಪ್ಣೆಂ ತುಜೆಂ ನಿಯಾಳ್ತಾನಾ
ಕಾಳಿಜ್ ಭೆಸಾಂ ಜಾತಾ
ಮನ್ ರಡ್ತಾ, ಕಳ್ವಳ್ತಾ
ಚಿಂತಾಸ್ತಾನಾ
ಸಾಂಗುಂ ಕೊಣಾಕ್ ಕೊಣ್ ಆಯ್ಕತಾ?
-ವಿಲ್ಫಿ ರೆಬಿಂಬಸ್