ಸಂಪಾದಕೀಯ್:

ಮೊಸ್‌ಣ್ಯಾಚ್ಯಾ ಮನಾಂತ್ ತೀಳ್ನ್ ಪಳೆಂವ್ಚಿ ಕವಿತಾ

ಮಡೆಂ ಲಾಸ್ಚೊ ಮನೀಸ್ ಮೊಸ್ಣೊ. ಹಾಂಗಾಸರ್ ಮೊಸ್ಣ್ಯಾಚೆಂ ಮಾಗ್ಣೆಂ ಆಸಾ. ಹೆಂ ಮಾಗ್ಣೆಂ ಮಾತ್ರ್ ಜೀವ್ ಆಸ್ತಾನಾ ಕೆಲ್ಲೆಂ ಮಾಗ್ಣೆಂ ನ್ಹಯ್. ಮೆಲ್ಯಾ ಉಪ್ರಾಂತ್ ಕೆಲ್ಲೆಂ. ಪರ್ತ್ಯಾನ್ ಏಕ್ ಪಾವ್ಟಿಂ ಲಾವಾರೀಸ್ ಜಾವ್ನ್ ಜಲ್ಮಾಕ್ ಯೆಂವ್ಚಿ ತಾಚಿ ಆಶಾ ಹೆ ಕವಿತೆಂತ್ ಸುಂದರ್ ರಿತಿನ್ ಆಯ್ಲ್ಯಾ.

ಹಿ ಕವಿತಾ ನವ್ಯಾಚ್ ಎಕಾ ಅನ್ಭೋಗಾನ್ ಆಮ್ಕಾಂ ನ್ಹಾಣಯ್ತಾ. ಮೊಸ್ಣ್ಯಾಚ್ಯಾ ಮನಾಂತ್ ಕಿತೆಂ ಶಿಜೊನ್ ಆಸ್ತಾ ಮ್ಹಣೊನ್ ಆಮಿ ಯೆದೊಳ್ ತೀಳ್ನ್ ಪಳಯಿಲ್ಲೆಂ ನಾ. ಸಂಸಾರಾಚ್ಯೊ ಗಜಾಲಿ ತೊ ಖಂಯ್ಚ್ಯಾ ಅನ್ಭೋಗಾಂತ್ಲ್ಯಾನ್ ಪಳೆತಾ ಮ್ಹಳ್ಳೆಂ ಹೆ ಕವಿತೆದ್ವಾರಿಂ ಸಮ್ಜಜಾಯ್. ನಾಂತರ್, ದುರ್ಬಳೆ ವೆಗಿಂ ಲಾಸುನ್ ವೆತಾತ್, ಕಿತ್ಯಾಕ್ ಮ್ಹಳ್ಯಾರ್ ಜೀವ್ ಆಸ್ತಾನಾ ತೆ ಅರ್ಧೆ ಲಾಸಲ್ಲೆ ಆಸ್ತಾತ್ ಮ್ಹಣ್ಚಿ ಸಮ್ಜಿಕಾಯ್ ಕೊಣಾಕ್ ಯೇತ್.

ಸುರೇಶ್ ಬಾಳಿಗಾಕ್ ಕವಿತಾ ಶೆತಾಂತ್ ಉಜ್ವಲ್ ಫುಡಾರ್ ಆಸ್ಚೊ ಮ್ಹಾಕಾ ಝಳ್ಕತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮೊಸಣ್ಯಾಲೆಂ ಮಾಗಣೆಂ

ಕಿತಲಿಂ ಮಡಿಂ ಗೊಬೋರ್ ಕೆಲ್ಯಾಂತ್‌ಕೀ ಹಾಣೆಂ!
ಖಂಯ್ ದಾಕೂನ್ ಆಯಿಲೊ ಹೊ ಹ್ಯಾ ಗಾಂವಾಂತ್?
ಹಾಗೆಲೆಂ ಖರೆಂ ನಾಂವ್ ಕಸಲೆಂ ಕೀ!
ಕಶಿ, ಕೆದನಾ, ಖಂಯ್, ಕಿತಲೆಂ, ಕೊಣ್.. ?
ಬಾಪ್ ರೇ!!! ಸವಾಲಾಂ ವಯ್ರ್ ಸವಾಲ್
ಜವಾಬ್ ದಿವಚ್ಯಾಕ್ ಕೊಣ್ ಆಸಾ?

ದೀವಕಾ ಜಾಲಲೊ ಹಾಂವಚ್
ಮಡೆಂ ಜಾವನ್ ಮುಕಾರಿ ನಿದಲಾಂ
ಸವಾಲಾಂ ಕಾನಾಂತ್ ಪಡ್ತಾತ್
ಜವಾಬ್ ದಿವಚ್ಯಾಕ್ ಮ್ಹಾಕಾ ಜಾಯನಾ
ಇತ್ಯಾಕ್ ಮ್ಹಳ್ಯಾರ್ ಹಾಂವ್ ಮೆಲ್ಲಾಂ
ಜೀವಾಂತ್ ಆಶಿಲೊಂ ಜಾಲ್ಯಾರೀಯ್
ಹಾಂವ್ ಜವಾಬ್ ದೀನಾಶಿಲೊಂ.
ಸತ್ಯ ಸಾಂಗೂನ್ ಮ್ಹಾಕಾ ಖಂಯಚೆಂ
ರಾಜ್ಯ್ ಪರತ್ ಮೆಳಚೆಂ ಆಸಾ?

ತಾಂಣಿ ಮ್ಹಾಕಾ ಮೊಸಣ್ಯಾ ಮ್ಹಣು ಆಪಯಲೆಂ
ಹಾಂವೆಂ ತಾಂಕಾಂ ಆಡಾಯ್ನಿ
ಮಡೆಂ ಲಾಶಿತಲ್ಯಾಕ್
ಖಂಯಚೆಂ ನಾಂವ್ ಜಾಲ್ಯಾರಿ ಇತ್ತೆಂ?

ಹ್ಯಾ ಕಾಮಾಂತ್ ಹಾಂವ್ ಕಿತ್ಲೊ
ಮಾಹಿರ್ ಮ್ಹಳ್ಯಾರ್
ಮೆಗೆಲೇಚ್ ಆವ್ಸುಕ್ ಲಾಶಿತಾನಾಂಯ್
ಹಾಂವ್ ರಳ್ಳೊನಾ.
ಆನಿ ಮೆಗೆಲೆ ಖಾತಿರ್ ಕೊಣ್ ರಡ್ತಲೊ?

ಕುಲಗೋತ್ರ, ಜಾತಿ, ಭಾಸ್
ಮ್ಹಾಕ್ಕಾಚ್ ಖಬರ್ ನಾ,
ಮೆಲೊಲೊ ದುರ್ಬಳೊ ಕೀ ದುಡ್ವಾಳು
ಹಾಂವ್ ವಿಚಾರ್ನಿ
ಜಾಲ್ಯಾರ್ ಮಡೆಂ ಲಾಸ್ತಾನಾ ಮ್ಹಾಕಾಚ್ ಕಳತಾಲೆಂ
ದುರ್ಬಳೆ ವಗಿಂ ಲಾಸುನ್ ವತಾತ್
ಜೀವಸ್ತಾನಾಂಚ್ ಅರ್ಧ್ ಮರ್ನಾಸ್ತಾತ್

ಆಜ್ ವರೆನ್ ತುಗೆಲಾಗಿಂ ಕಾಂಯ್
ಹಾಂವೆಂ ಮಾಗೂಕ್ ನಾ.
ಆಜ್ ಪಯ್ಲೆ ಆನಿ ಆಖೇರಿ ಪಾವ್ಟಿಂ
ತುಗೆಲಾಗಿಂ ಮಾಗತಾಂ.
ತೂಂವೆಂ ಮ್ಹಾಕಾ ಸೊಂಪಿಲೆಂ ಕಾಮ್
ಹಾಂವೆಂ ನಿಶ್ಟೇನ್ ಕೆಲಾಂ.
ಯೆಂವಚ್ಯಾ ಜಲ್ಮಾಂತೂಯ್ ಲಾವಾರಿಸ್ ಜಾವ್ನೂಚ್
ಜಲ್ಮಾ ಯೆಂವಚ್ಯಾಕ್ ಮ್ಹಾಕಾ ಕಬೂಲಿ ಆಸಾ.

-ಬಿ.ಸುರೇಶ್ ಬಾಳಿಗಾ