ಸಂಪಾದಕೀಯ್:

ಜಿಣಿಭರ್ ಕಷ್ಟೊಂಚ್ಯಾ ಭುರ್ಗ್ಯಾಚ್ಯಾ ಎಕಾ ಹಾಶಾಕ್ ಆವಯ್ಚ್ಯಾ ಕಾಳ್ಜಾಂತ್ಲೆ ಉಮಾಳೆ

ಹೆಂ ಕೊಣಾಚೆಂ ರುದಾನ್? ಹ್ಯಾ ರುಕಾವಯ್ಲಿಂ ಫುಲಾಂ ಸದಾಂ ಸಲ್ವತಾತ್ - ಪರ್ಮಳ್ ಪಸ್ರಾಂವ್ಕ್. ಹ್ಯಾ ರುಕಾವಯ್ಲೆ ಖೊಲೆ ಸದಾಂ ಝಡ್ತಾತ್ - ವಾರ‍್ಯಾಕ್ ಧಲೊಂಕ್ ಜಾಯ್ನಾಸ್ತಾಂ. ಇತ್ಲೆಂ ಆಸೊನಯ್ ಸುರ್ವೆಚ್ಯಾ ಬಿರ್ಬಿರ‍್ಯಾ ಪಾವ್ಸಾಕ್, ಸಕಾಳಿಂಚ್ಯಾ ಧೊವಾಚ್ಯಾ ಯೆಣ್ಯಾವೆಳಾರ್ ಹಿಂ ಫುಲಾಂ, ಹೆ ಖೊಲೆ ಆಪ್ಣಾಕಚ್ ವಿಸ್ರೊನ್ ನಾಚ್ತಾತ್. ಹ್ಯೆ ಘಡಿಯೆ ರುಕಾಚಿಂ ಪಾಳಾಂ ತಾಂಚ್ಯಾ ಮುಖಮಳಾವಯ್ಲಿ ಖುಶಿ ಪಾರ್ಕುನ್, ಸಂತೊಸಾಚಿಂ ದುಕಾಂ ಗಳಯ್ತಾತ್.

ಖಂಯ್ಚ್ಯಾ ನಮುನ್ಯಾಚೆಂ ರುದಾನ್ ಹೆಂ? ಕಿತ್ಯಾ ಖಾತೀರ್ ಅಶೆಂ ಜಾತಾ? ಸೊಧ್ನಾಂ ಕರಿಜಾಯ್ ಪಡ್ತಾತ್. ಕವಿ ಬೆಳಾಚೊ. ತಾಚ್ಯಾ ಕಾಸರ್ಗೋಡ್ ಜಿಲ್ಲ್ಯಾಂತ್ಲ್ಯಾ, ಪಡ್ರೆ, ಪೆರ್ಲ ಭಾಗಾಂನಿ ಎಂಡೋಸಲ್ಫನ್ ದುರಂತಾಕ್ ಬಲಿ ಜಾವ್ನ್ ಜಲ್ಮಾತಾನಾಂಚ್ ಅಪಾಂಗ್ ಜಾವ್ನ್ ಜಲ್ಮೊಂಚ್ಯಾ ಭುರ್ಗ್ಯಾ ಬಾಳಾಂಕ್ ಚಿಂತ್ಲೆಂ ಜಾಲ್ಯಾರ್, ಹೆ ಕವಿತೆಚಿ ಗಂಭೀರತಾ ಸವ್ಕಾಸಾಯೆನ್ ತುಕಾ ರೆಂವೊಡ್ ಘಾಲುಂಕ್ ಯೆತಲಿಚ್. ತೆವಿಶಿಂ ತುಕಾಚ್ ದಾಧೊಸ್ಕಾಯ್ ಭೊಗುಂಕ್ ಸೊಡ್ತಾಂ.

"ಹೆತ್ತಮ್ಮನಿಗೆ ಹೆಗ್ಗಣವೂ ಮುದ್ದು" ಮ್ಹಳ್ಳಿ ಸಾಂಗ್ಣಿ ಆಸಾ ಕನ್ನಡ್ ಭಾಷೆಂತ್. ಹ್ಯಾಯಿ ಕವಿತೆಂತ್ ಅಪಾಂಗ್ ಭುರ್ಗ್ಯಾಂನಿ ಅಪ್ರೂಪ್ ಮುಖಮಳಾರ್ ಹಾಸೊ ಫಾಂಕಯ್ತಾನಾ, ಆವಯ್ಚೆಂ ಕಾಳೀಜ್ ಕಿತೆಂ ಚಿಂತಾ, ಮ್ಹಳ್ಳೆಂ ಪಾರ್ಕುಂಚೆಂ ಪ್ರೇತನ್ ಕವಿನ್ ಕೆಲ್ಲೆಬರಿ ದಿಸ್ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ರುದಾನ್

ಎಕಾ ದುರ್ಭಾಗಿ ಪಾವ್ಸಾವೆಳಾರ್
  ಹಾಂವೆಂ ಏಕ್ ರೂಕ್ ಲಾಯ್ಲೊ-
    ರುಕಾರ್ ಫುಲ್ಲಿಂ ಫುಲಾಂ
      ಸಲ್ವೊಂಕ್ ಮಾತ್ ಶಿಕ್ಲಿಂ
        ಪಾಚ್ವೆ ಖೊಲೆ
          ಕೀಡ್ ಪಡೊನ್ ಝಡೊಂಕ್ ಮಾತ್ ಶಿಕ್ಲೆ
            ತರೀ ಪಾವ್ಸಾ ವೆಳಾರ್
              ಯಾ
               ಧೊವಾ-ಕಾಳಾರ್
            ಕಿತೆಂಚ್ ನೆಣಾಸ್ಲೆ ಹೆ
          ಸರ್ವ್ ವಿಸ್ರೊನ್ ಹಾಸ್ತಾಲೆ
        ಪುಣ್,
      ಮಾತಿಯೆ ಭಿತರ್ ಪುರೊನ್ ಆಸ್ಲಿಂ
    ಪಾಳಾಂ ಮಾತ್
  ಕೊಣಾಕಚ್ ಕಳಿತ್ ನಾತ್ಲೆಪರಿಂ
ಭಿತರ್ಲೆ ಭಿತರ್ ರಡ್ತಾಲಿಂ.

-ಸ್ಟ್ಯಾನಿ ಬೆಳಾ