ಕಾಳೀಜ್ ವಿಕ್ರಾಪಾಕ್ ಪಡ್ಲಾಂ

ಸಂಪಾದಕೀಯ್:

ಝೆಂಜ್ರಲ್ಲೆಂ ಕಾಳೀಜ್ ವಿಕ್ರಾಪಾಕ್ ಘಾಲಾಂ

ಏಕ್ ಕಾಳೀಜ್ ಝೆಂಜ್ರಲಾಂ. ಜಿವಿತಾಚೆ ಪಾಯ್-ವಾಟೆರ್ ಕಾಂಟ್ಯಾಖುಂಟ್ಯಾಂನಿ ಪಾಫ್ಸುನ್ ಗೆಲಾಂ. ಸಂಸಾರಾಚೆಂ ಸುಖ್ ಸರ್ವಸ್ರ್ವ್ ಚಿಂತ್ಚ್ಯಾ ಮನ್ಶಾಂಚ್ಯಾ ಧಖ್ಯಾ ಮುಕಾರ್ ಹೆಂ ಕಾಳೀಜ್ ಚಿಡ್ಡಲಾಂ. ಆತಾಂ ಕಾಂಯ್ ಉಪ್ಕಾರಾಕ್ ಪಡ್ಚೆಂ ನ್ಹಯ್ ಹೆಂ ಕಾಳೀಜ್. ಹ್ಯಾ ಕಾಳ್ಜಾಚ್ಯಾ ವಾರೆಸ್ದಾರಾನ್ ಘಟ್ ಮನ್ ಕೆಲಾಂ ಹೆಂ ಕಾಳೀಜ್ ವಿಕುನ್ ಸೊಡುಂಕ್.

ಆಯ್ಚ್ಯಾ ದಿಸಾ ಒನ್‌ಲಾಯ್ನ್ ಜಾಳಿಜಾಗ್ಯಾಂನಿ ಖಂಯ್ಚೇಂಯ್ ಸಂಕ್‌ಪಾಶಾಣ್ ಲೆಗುನ್ ವಿಕುನ್ ವೆಚ್ಯಾ ಕಾಳಾರ್, ಹೆಂ ಕಾಳೀಜ್ ಲೆಗುನ್ ವಿಕುನ್ ವಚತ್. ತುಮ್ಕಾಂ ಜಾಯ್ ತರ್, ಮನ್ ಕರಾ. ಮನ್ ಕರ‍್ಚ್ಯಾ ಪಯ್ಲೆಂ ಥೊಡೆಂ ತರೀ ಕಾಳ್ಜಾಚೆ ಪರಿಸ್ಥಿತಿವಿಶಿಂ ಪಾರ್ಕುಂಕ್ ವಚಾ.

ಹೆ ಪಾರ್ಕಣೆಂತ್ ಕವಿತಾ ತುಮ್ಕಾಂ ಸುಂದರ್ ದಿಸ್ತಲಿ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕಾಳೀಜ್ ವಿಕ್ರಾಪಾಕ್ ಪಡ್ಲಾಂ

ನಯನಾ, ಆಜ್ ಮೊಗಾಕ್ ಚಿಂತುನ್ ಆಶ್ರು ವ್ಹಾಳೊಂಕ್ ಲಾಗ್ಲೆ
ಕಾಳೀಜ್ ತೆಂ ಭೆಕೂಫ್, ಮೌನ್ ರಾವೊಂಕ್ ನೆಣಾಂ.
ಬುದ್ದು ನಯನಾಕ್, ಫಕತ್ ಭಾಯ್ಲೊ ಸಂಸಾರ್ ದಿಸ್ತಾ,
ಹಾಂವ್ ತೊ ಪ್ರೇಮಿ, ದುಕಾಂನಿ ಕಾಳೀಜ್ ಮುಡ್ಡುನ್ ರಡ್ತಾಂ.

ಕಿತ್ಯಾಕ್ ದೆವಾ? ಮ್ಹಾಕಾ ಅಸ್ಲೆಂ ಕಾಳೀಜ್ ದಿಲೆಂಯ್?
ರಗ್ತಾಂತ್ ಭಿಜೊವ್ನ್, ಉದ್ಕಾನ್ ರಡ್ಚೆಂ !?
ಭೊಗ್ಣಾಂ-ಚಿಂತ್ನಾಂಚಿ ವಾಟ್ ಲಾವುನ್ ಸದಾಂ,
ಮತಿಂತ್ ಸದಾಂ ಶಿಜೊವ್ನ್, ಉಜ್ಯಾಂತ್ ಭಾಜ್ಚೆಂ!?

ಕಾಳೀಜ್ ತರ್ ಲೊಂಕ್ಡಾ-ಆಯ್ದಾನ್ ದಿಲ್ಲೆಂಯ್,
ಸದಾಂ ತೇಜ್ ಕರುಂಕ್, ಫಾತ್ರಾಕ್ ಸಾಣ್ಯಾಕ್ ಧರ‍್ತೊಂ.
ಭಿವ್ಕುರ‍್ಯಾ ಕಾಳ್ಜಾಕ್ ಘೆವ್ನ್ ಕಿತೆಂ ಕೆಲೆಂಯ್?
ಯೆಮ್ಕುಳೊ ಮೋಗ್ ಕರುಂಕ್, ಆಂಕ್ವಾರ್ ಉರ‍್ತೊಂ.

ಧಖ್ಯಾ ಕಾಳೀಜ್, ಆಜ್ ಮ್ಹಜೆಂ ವಿಕ್ರಾಪಾಕ್ ಪಡ್ಲಾಂ
ಆಮ್ಚ್ಯಾ ಸಮಾಜಾಂತ್ ಮೊಗಾಕ್, ಹುಂಗ್ತೆಲ್ಯಾಚಿ ಆಜ್ ಗತ್ ನಾ
ಮತ್ಲಾಬಿ ಮನ್ಶಾಂನಿ, ಸ್ವಾರ್ಥಾಚ್ಯಾ ಆಬ್ಲೆಶಾನ್ ದುಕೊಳ್ ಹಾಡ್ಲಾ
ಅರ್ಗಾಂ ದೆವಾಕ್, ಸಂಸಾರಿ ಬಾಜಾರಾಂತ್ ಖಂಯ್ಚೀಯ್ ಜಾತ್ ನಾ

ಜಿಯೆ ಆನಿ ಆಮಿ ಜಿಯೆಂವ್ಕ್ ಸೊಡ್ಯಾಂ
ಕೊಣ್‌ಯ್ ಜಾಯ್, ತಾಂಕಾಂ ಮೊಗಾನ್ ವಿಂಚ್ಯಾಂ
ಸಂಸಾರಿ ರಿವಾಜಿಂಕ್ ದೊಳೆ ಧಾಂಪುನ್ ಸೊಡ್ಯಾಂ
ಮೊಗಾಂತ್ ಪಾಸ್ಳೆಂತ್ ಎಕ್ಲ್ಯಾಕ್ ಜಿವಿತ್ ದಿವ್ಯಾಂ.

-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್.