ಸಂಪಾದಕೀಯ್:
ಲೇಡಿ ಡಾಯನಾಚೊ ಉಡಾಸ್ ಆಜೂನ್ ಧೊಸ್ತಾ
ಆಪ್ಲೆ ತರ್‍ನೆ ಪ್ರಾಯೆರ್ ಲಾಕೊಂ ಲೊಕಾಚ್ಯಾ ಕಾಳ್ಜಾಂನಿ ಮಾಜ್ವನಾತ್‌ಲ್ಲಿ ಮ್ಹೊರ್ ದಾಂಬುನ್, ತಾಂಚ್ಯಾ ಮೊಗಾಚ್ಯಾ ದರ್ಯಾಂತ್ ಸದಾಂನೀತ್ ಉಪ್ಯೆಂವ್ಕ್ ಯೇವ್ನ್ ಆಸ್‌ಲ್ಲ್ಯಾ ಪ್ರಿನ್ಸೆಸ್ ಡಾಯನಾಚೊ ಅತ್ಮೊ ವಾರ್‍ಯಾಂತ್ ಭರ್‍ಸೊನ್ ಆದ್ಲ್ಯಾ ಆಗೋಸ್ತಾಂತ್ ಆಟ್ ವರ್‍ಸಾಂ ಜಾಲಿಂ. ಅಜೂನ್‌ಯ್ ತಿಚೊ ಉಡಾಸ್ ಜಾಯ್ತ್ಯಾಂಚಿ ನೀದ್ ಖಳಯ್ತಾ, ಜಾಯ್ತ್ಯಾಂಚ್ಯಾ ದೊಳ್ಯಾಂತೂನ್ ದುಕಾಂ ಹಾಡಯ್ತಾ.
ಭಾರತೀಯ್ ಸಂಸ್ಕಾರಾಂನಿ ವ್ಹಡ್ ಜಾಲ್ಲ್ಯಾಂಕ್ ತಿಚೆಂ ಜಿವಿತ್ ಮಾತ್ಶೆಂ ಕೊಡ್ಸಾಣೆಚೆಂ ದಿಸ್ಯೆತಾ. ಪುಣ್ ಪಾಶ್ಚಾತ್ಯ್ ಸಂಸ್ಕಾರಾಂನಿ ಜಿವಿತಾಚ್ಯೊ ಹರ್ ಘಡಿಯೊ ಚಾಕ್‌ಲ್ಲ್ಯಾ ಡಾಯನಾಲಾಗಿಂ ಏಕ್ ಮೊವಾಳ್ ಕಾಳೀಜ್ ಆಸ್‌ಲ್ಲೆಂ ಮ್ಹಣೊನ್ ಸಂಸಾರ್ ಜಾಣಾ. ತ್ಯಾಚ್ ದೆಕುನ್ ಸಂಸಾರ್ ತಿಕಾ ಫುಗಾರ್‍ತಾ. ಹೆ ಕವಿತೆನ್‌ಯ್ ತೆಚ್ ದಿಶೆನ್ ಜಲ್ಮ್ ಘೆತ್ಲಾ.
ಕ್ಲೊಟಿಲ್ಡಾ ತೆಲ್ಮಾ ಪಯ್ಶಿಲ್ಯಾ ಸೈಪ್ರಸಾಂತ್ ಆಸೊನ್‌ಯ್ ಕೊಂಕಣಿಚ್ಯಾ ಕೊಂತಾಚ್ಯೊ ಮಣಿಯೊಂ ಸದಾಂನೀತ್ ಮೆಜ್ಜಿ ಕವಯಿತ್ರಿ. ತಿಚೊ ಭಾಶೆಮೋಗ್ ಕೊಣಾಯ್ಕಿ ಪಿಶ್ಯಾರ್ ಘಾಲ್ತಾ. ತಿಚಿ ಹುಮೆದ್ ಸಂಸಾರಾಚ್ಯಾ ಹೆರ್ ಕೊನ್ಶಾಂನಿ ಶಿಂಪಡ್ಲಲ್ಯಾಂಕ್ ಕೊಂಕಣಿಚೆಂ ಮಾಂಡಾಸ್ ದೀಂವ್ ಆನಿ 'ಕವಿತಾ ಕುಳಾರ್' ಸೊಭಂವ್ಕ್ ಕವಿತಾ ಬರಂವ್ಚಿ ಉರ್ಭಾ ತಾಂಕಾಂ ಯೇಂವ್ ಅಶೆಂ ಆಮಿ ಆಶೆತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತರ್‍ನ್ಯಾಂಚ್ಯಾ ಕಾಳ್ಜಾಂತ್ಲಿ ರಾಯ್‌ಕುಂವರ್ನ್
ರಾಯಾಳ್ ಕುಟ್ಮಾಂತ್ಲಿ ನ್ಹಯ್ ತರಿ
ದೀಷ್ಟ್ ಚರವ್ನ್ ಸಂಸಾರಾರಿ
ಜಾಲಿ ತಿ ರಾಯ್ ಕುಂವರಿ
ಕಾಳ್ಜಾಂತ್ ತಿ ಮೋವ್
ಆಂಗಾಚೊ ರಂಗ್ ಗೋಂವ್
ಸೊಭಾಯೆಕ್ ಶಿರ್‍ಶಿರತ್ ಲೋಂವ್
ದುಬ್ಳ್ಯಾಂ ಥಂಯ್ ದಾಕವ್ನ್ ಕರುಣ್
ರಾಜ್ವಟ್ಕೆಂತ್ ಜಾಲ್ಲಿ ಧಾರುಣ್
ವಿಚಿತ್ರ್ ತಿಚಿ ಜೀಣ್
ರಾವ್ಳೆರಾಕ್ ಕರ್‍ತಾನಾ ಆದೇವ್ಸ್
ಸಂಸಾರಾರ್ ಜಾಲೆಂ ಫಾಯ್ಸ್
ಪರ್‍ಜಾತಿಚೊ ಜಾಲಾ ಮ್ಹಣ್ ಸಹವಾಸ್
ಬೋವ್ ಲ್ಹಾನ್ ಆವ್ದೆರ್
ಸಾಂಡುನ್ ಗೆಲಿ ಸಂಸಾರ್
ಚಿಂತ್ನಾಂಕ್ ನಾ ಜಾಲೊ ಪರ್‍ಯಾರ್
ಮ್ಹಣ್ತಾತ್ ಆಸಾ ಕಾರಣ್
ಪಾವ್ಲಿ ಅವ್ಘಡಾನ್ ಮರಣ್
ಪಾತ್ಯೆಲೊ ನಾ ಕೋಣ್
ದೊಳೆ ಮೊಗಾಚ್ಯಾಂಚೆ ತರುಣ್
ಸದಾಂಚ್ ಆಸಾತ್ ಭಿಜೊನ್
ಕಠಿಣ್ ವೆಗ್ಳಾಚಾರ್ ತಿಚೊ ಚಿಂತುನ್
ದೆಕಿಭರಿತ್ ಆವಯ್‌ಪಣಾಂತ್
ಜಾಲಿ ಜಿಣಿ ಡಾಯನಾಚಿ ಅಂತ್ಯ್
ಆತಾಂ ದೆಖ್ಚೆಂ ಪಡ್ಲಾಂ ತಸ್ವಿರೆಂತ್
-ಕ್ಲೊಟಿಲ್ಡಾ ತೆಲ್ಮಾ ಡಿ'ಆಲ್ಮೇಡಾ, ಸಾಸ್ತಾನ್ (ಸೈಪ್ರಸ್)