ಸಂಪಾದಕೀಯ್:
ಆವಯ್ಚೆಂ ಕಾಳೀಜ್ ಅಶೇಂಯ್ ಕಿತ್ಯಾಕ್?
ಏಕ್ ಆವಯ್ ಅಶಿ ಆಸ್ತಾ ಕಾಂಯ್ ತರ್? ಬೊಮ್ ಘಾಲ್ಚೆಂ ಕಾಳೀಜ್ ಸೈತ್ ತಿಚ್ಯಾ ಹರ್ದ್ಯಾಂತ್ ಆಸ್ತಾ ಕಾಂಯ್ ತರ್? ಏಕ್ ನೀಜ್ ಘಡಿತಾಚೆರ್ ಹೊಂದೊನ್, ಕವಿ ಪ್ರಕಾಶ್ ಪರಿಯೆಂಕಾರಾನ್ ಆಪ್ಲಿಂ ಭೊಗ್ಣಾಂ ಹೆ ಕವಿತೆ ಮಾರಿಫಾತ್ ವ್ಯಕ್ತ್ ಕೆಲ್ಯಾಂತ್.
ಹ್ಯಾ ಆದಿಂ ಅನಿಲ್ ಬೈಂದೂರಾಚಿ ಕವಿತಾ ಆಮಿ ಪರ್ಗಟ್ ಕೆಲ್ಲಿ. ಎಕೆ ಆವಯ್ಚೆಂ ವಿಶೇಸ್ ಕಾಳೀಜ್ ತೆ ಕವಿತೆನ್ ಪಾರ್ಕಿಲ್ಲೆಂ. ಹಾಂಗಾಸರ್ ಸಮಾ ವಿರೋಧ್ ಏಕ್ ಕಾಳೀಜ್, ಪುಣ್ ತೆಚ್ ಆವಯ್ಚೆಂ ಆಮ್ಕಾಂ ದಿಸ್ತಾ.
ಎಕ್ಲೊ ಪೂತ್ ಜಾವ್ನ್ ಹಾಂಗಾಸರ್ ಎಕ್ಲೊ ಕವಿ ಮಾಗೊನ್ ಆಸಾ. ಮಾಗೀರ್ ಕವಿಚೆಂ ಕಾಳೀಜ್ ಕಶೆಂ ಆಸೊಂಕ್ ಜಾಯ್ ಮ್ಹಣ್ ಹಿ ಕವಿತಾ ಸಾಂಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬ್ಲೆಕ್ ವಿಂಡೋ
ರಶಿಯೆಂತ್ಲ್ಯಾ ರೆಲ್ವೇ ಸ್ಟೇಶನಾಚೆರ್
ಕಾಲ್ ಎಕೆ ಬಾಯ್ಲೆನ್
ಆತ್ಮಘಾತಕೀ ಬೊಮ್ ಫೊಡ್ಲೊ..
ತಾಂತುಂ ಸಾತ್ ಭುರ್ಗಿಂ, ಆಟ್ ಬಾಯ್ಲಾಂ
ಆನಿ ಸ ದಾದ್ಲೆ ಮೆಳುನ್
ವೀಸ್ ಲೋಕ್ ಜಾಗ್ಯಾರ್ ಮೆಲೆ
ತಿತ್ಲೆಚ್ ಲೋಕ್ ಜಖ್ಮಿ ಜಾಲ್ಯಾತ್
ಮ್ಹಣ್ಪಾಚಿ ಖಬರ್ ಆಸಾ...
ಆಪ್ಲ್ಯಾ ಘರ್ಕಾರಾಕ್ ಮಾರಿಲ್ಲ್ಯಾಚೊ ಬದ್ಲೊ ಘೆಂವ್ಕ್
ಬ್ಲೆಕ್ ವಿಂಡೋಚ್ಯಾ ನಾಂವಾನ್
ಮುಖಾರ್ ಸರಲ್ಲಿಂ ಹಿಂ ಮುಸ್ಲಿಮ್ ಬಾಯ್ಲಾಂ
ಘೆತಾತ್ ಜೀವ್ ಏಕ್ ಸಾರ್ಕೊ ಸರ್ವಸಾಮಾನ್ಯಾಂಚೊ
ದಾದ್ಲ್ಯಾಂನಿ ಸುರು ಕೆಲ್ಲ್ಯಾ ಹ್ಯಾ ಆಕಾಂತ್‌ವಾದಾಕ್
ಹಿಂ ಬಾಯ್ಲಾಂ ಕಿತ್ಯಾಕ್ ಬಳಿ ಪಡ್ತಾತ್ ಕಾಂಯ್?
ಆಪುಣ್ ಸ್ವತಾ ಮರ‍್ತಾಂ ಮರ‍್ತಾಂ
ದುಸ್ರ್ಯಾಂಕ್ ಕಿತ್ಯಾಕ್ ಮಾರ‍್ತಾತ್ ಕಾಂಯ್?
ಜೀವನ್ ದಿವ್ಪೀಚ್ ಆತಾಂ
ಜೀವ್ ಘೆವ್ಪೀಯ್ ಜಾಲ್ಯಾಂತ್!
ಪ್ರಿಯ ಆಮ್ಮಾ
ತುಜೆ ಮುಖಾರ್ ಹಾಂವ್ ಜೊಡ್ಟಾಂ ಹಾತ್
ತುಂವೆಂ ಪಳಯ್ಲಾಂ ತಾಚೆಕಯ್
ಹಜಾರ್ ವಾಂಟ್ಯಾಂನಿ ಹೆಂ ಜೀವನ್ ಖೂಬ್ ಸುಂದರ್ ಆಸಾ..
ಖರೆಂಚ್ ಸಾಂಗ್ತಾಂ ಮ್ಹಜೆ ಆವಯ್
ಸರ್ವಯ್‌ಕಾಳ್ ತುಜೆಂ ಜಿವಿತ್ ಉಜ್ವಾಡಾನ್ ಭರ‍್ಪಾಕ್
ತುಜೆ ಖಾತೀರ್ ಹಾಂವ್
ಉಜ್ವಾಡಾಚೆಂ ಜನೆಲ್ ಉಕ್ತೆಂ ಕರ‍್ತಾಂ
ತುಂ ಹೊ ಉಜ್ವಾಡ್ ನ್ಹಾವ್ನ್ ಘೆ
ಜಾಯ್ ಜಾಲ್ಯಾರ್ ಇಲ್ಲೊ ಪಿಯೆವ್ನ್ ಘೆ
ತುಕಾ ಕೊಣಾಕಯ್ ದಿವ್ಪಾಚೊ ಆಸ್ಲ್ಯಾರ್
ಕಿರ‍್ವಂಟಿಕಯ್ ಥೊಡೊ ಖೊವುನ್ ಘೆ..
ಮಾಯೆ, ಆಯ್ಕತಾ ನ್ಹಯ್ ತುಂ ಮ್ಹಜಿ ಹಿ ಸಾಂಗ್ಣಿ?
ತಶೆಂ ಜಾಲ್ಯಾರ್ ಸೊಡ್ ತೊ
ಆಂಗಾರ್ ಬೊಮಾಂನಿ ರೆವಾಡಿಲ್ಲೊ ಕಮರ್‌ಪಟ್ಟೊ
ಆನಿ ಬಾಂದ್ ಹೊ ಆಡ್ವೊ ಕಪಲಾಚೆರ್
ಮಾನ್‍ವತಾವಾದಾಚೊ ಭಾಂಗ್ರಾ ಪಟೊ
ಮಾತೆ, ತುಕಾ ಹಾಂವ್ ಪ್ರಣಾಮ್ ಕರ‍್ತಾಂ
ತುಜ್ಯಾ ಪಾಂಯಾಂಚೆರ್ ಹಾಂವ್ ಲೊಟಾಂಗ್‌ಪಣ್ ಘಾಲ್ತಾಂ
ತುಜ್ಯಾ ಕಮ್ರಾಚೊ ಪಟೊ ಮ್ಹಜ್ಯಾ ಗಳ್ಯಾಂತ್ ಘಾಲುನ್
ಜಾಯ್ ಜಾಲ್ಯಾರ್ ಆತ್ಮದಹನ್ ಲೆಗೀತ್ ಕರ‍್ತಾಂ...
ಆಮ್ಮಾ, ತುಜೋಚ್ ಪೂತ್ ಸಮಜ್ ಮ್ಹಾಕಾ
ನಾ, ತುಜೋಚ್ ಪೂತ್ ಹಾಂವ್!
ಉರಲ್ಲೆಂ ಪುರಾಯ್ ಜೀವಿತ್ ಹಾಂವ್
ತುಜ್ಯಾಯ್ ಪುತಾಚ್ಯಾ ರುಪಾನ್ ಜಗ್ಪಾಕ್ ಸೊದ್ತಾಂ...
ಆಮ್ಮಾ, ಪ್ಲೀಜ್
ಸಡನ್ಲಿ ಬ್ಲೆಕ್ ವಿಂಡೋ ಕ್ರಾಯ್ಡ್,
ಕ್ರಾಯ್ಡ್ ಲಾಯ್ಕ್ ಎನಿಥಿಂಗ್...
ಎಂಡ್ ಸಾಯ್ಲೆಂಟ್ಲಿ ಶಟ್ ಡಾವ್ನ್ ಇಟ್ಸ್ ಡೋರ್
ಫೊರ್, ಫೊರೆವರ್...
-ಪ್ರಕಾಶ್ ಪರಿಯೆಂಕಾರ್
(
ಕಿರ‍್ವಂಟ್=ಪೆಂಕ್ಟಾಕ್ ಖೊವಂವ್ಚಿ ಪೊತಿ)
संपादकीय:
आवयचें काळीज अशेंय कित्याक?
एक आवय अशी आसता कांय तर? बॉम घालचें काळीज सैत तिच्या हर्द्यांत आसता कांय तर? एक नीज घडिताचेर होंदोन, कवी प्रकाश परियेंकारान आपलीं भोगणां हे कविते मारिफात व्यक्त केल्यांत.
ह्या आदीं अनील बैंदूराची कविता आमी पर्गट केल्ली. एके आवयचें विशेस काळीज ते कवितेन पार्किल्लें. हांगासर समा विरोध एक काळीज, पूण तेच आवयचें आमकां दिसता.
एकलो पूत जावन हांगासर एकलो कवी मागोन आसा. मागीर कविचें काळीज कशें आसोंक जाय म्हण ही कविता सांगता.
-मेल्विन रोड्रीगस
कविता
ब्लॅक व्हिंडो
रसीयेतल्या रेल्वे स्टेशनाचेर
काल एके बायलेन
आत्मघातकी बॉम फोडलो...
तातूंत सात भुरगीं, आठ बाय
आनी स दादले मेळून
वीस लोक जाग्यार मेले
तितलेच लोक जखमी जाल्ल्यात
म्हणपाची खबर आसा...
आपल्या घरकाराक मारिल्ल्याचो बदलो घेवंक
ब्लॅक व्हिंडोच्या नांवान
मुखार सरिल्लीं हीं मुस्लीम बायलां
घेतात जीव एक सारको सर्वसामान्यांचो
दादल्यानी सुरू केल्ल्या ह्या आकांतवादाक
हीं बायलां कित्याक बळी पडटात काय ?
आपूण स्वता: मरतां मरतां
दुसऱ्यांक कित्याक मारतात काय ?
जीवन दिवपीच आतां
जीव घेवपीय जाल्यांत !
प्रिय अम्मा,
तुजे मुखार हांव जोडटांहात
तुवें पळयलांताचेकय
हजार वाट्यानी हें जिवन खूब सुंदर आसा...
खरेंच सांगतां म्हजे आवय
सर्वयकाळ तुजें जिवीत उजवाडान भरपाक
तुजे खातीर हांव
उजवाडाचें जनेल उक्तें करतां
तूं हो उजवाड न्हावन घे
जाय जाल्यार इल्लो पियेवन घे
तुकां कोणाकय दिवपाचो आसल्यार
किरवंटीकूय थोडो खोवन घे ...
माये, आयकता न्हय तूं म्हजी ही सांगणी ?
तशें जाल्यार सोड तो
आंगार बॉमानी रेवाडिल्लो कमरपट्टो
आनी बांद हो आडवो कपळाचेर
मानवतावादाचो भांगरा पटो
माते, तुकां हांव प्रणाम करतां
तुज्या पांयांचेर हांव लोटांगण घालतां
तुज्या कमराचो पटो म्हज्या गळ्यांत घालून
जाय जाल्यार आत्मदहन लेगीत करतां...
अम्मा, तुजोच पूत समज म्हाका
ना, तुजोच पूत हांव !
उरिल्लें पुराय जिवीत हांव
तुज्याच पुताच्या रूपान जगपाक सोदतां…
अम्मा, प्लीज
सडनली बॅल्क व्हिंडो क्रायड,
क्रायड लायक ॲनिथींग...
अँड सायलेंटली शट् डावन इट्स डोर
फोर, फोरेव्हर...
- प्रकाश पर्येंकार.