ಹಾಸೊ ದಿಸನಾ

ಸಂಪಾದಕೀಯ್:

ಹಾಸೊಂಕ್ ವಿಸರಲ್ಲೊ ಮನೀಸ್

ಆಯ್ಚ್ಯಾ ಸಂಸಾರಾನ್ ಮನ್ಶಾಥಾವ್ನ್ ಡಿಮಾಂಡ್ ಕರ‍್ಚ್ಯೊ ಗಜಾಲಿ ಇತ್ಲ್ಯೊ ವೆಗ್ಳ್ಯೊ ಜಾಲ್ಯಾತ್, ತ್ಯಾ ವೆಗ್ಳೆಪಣಾಂತ್ ಹಾಸೊ ಮ್ಹಳ್ಳೊ ತೊ ಚೆಟ್ನಿ ಜಾವ್ನ್ ಗೆಲಾ. ಆತ್ತಾಂ ದಫ್ತರಾಚೆಂ ವೊಜೆಂ, ಥೊಡ್ಯಾ ವೆಳಾನ್ ದುಡ್ವಾಚಿ ಕರ್ಕರೆ, ಮಾಗೀರ್ ಧರ್ಮಾಚೆಂ ತೆಂತೆಸಾಂವ್ - ಹ್ಯಾ ಸಗ್ಳ್ಯಾ ಮಧೆಂ ಹಾಸೊ ದೀಂವ್ಕ್ ಮನೀಸ್ ವಿಸರ‍್ಲಾ.

ಇತ್ಲೊ ವಿಸರ‍್ಲಾಕಿ, ಫೊಟೊ ಕಾಡುಂಕ್ ಗೆಲ್ಲ್ಯಾಕಡೆ ಸೈತ್ ಆಪ್ಣಾಚಿ ತಸ್ವೀರ್ ಕಶಿ ಆಸಜಾಯ್ ಮ್ಹಳ್ಳೆಂ ಚಿಂತುಂಕ್ ಸೈತ್ ತಾಕಾ ವೇಳ್ ನಾ ಜಾಲಾ.

ಸ್ಟೇನಿ ಬೆಳಾಚಿ ಕಾಳ್ಜಾಕ್ ಧಲಂವ್ಚಿ, ಮೊವಾಳ್ ಕವಿತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹಾಸೊ ದಿಸನಾ

ಜಾಯ್ತ್ಯಾ ತೆಂಪಾಥಾವ್ನ್ ಆಶಾ ಏಕ್ ಆಸ್ಲಿ
ತಸ್ವೀರ್ ಏಕ್ ಕಾಡಂವ್ಕ್ ಜಾಯ್,
ಕುಟ್ಮಾ ನ್ ಸಾಂಗಾತಾ ಬಸೊನ್ ಆಸ್ಚಿ.

ಕಾಳ್ಯಾ ಆನಿ ಧವ್ಯಾ ರಂಗಾನ್ ಭರಲ್ಲಿ
ಯಾದಿಂಚ್ಯಾ ಚವ್ಕಾಂನಿ ಫಿಚಾರ್ ಕೆಲ್ಲಿ

ಬಾಜಾರಾಂತ್ಲ್ಯಾ ಎಕಾ ಸ್ಟುಡಿಯೋಂತ್
ಬೊಟಾಂ ಮಧ್ಲ್ಯಾ ಲೆನ್ಸಾಕ್ ಚೊಯ್ತಾನಾ,
ಸವಾಲ್ ಉಬೆಂ ಫೊಟೊಗ್ರಾಫರಾಚೆಂ:
’ಹಾಸೊ ಖಂಯ್ ಗೆಲೊ’ಮ್ಹಳ್ಳ್ಯಾ ಮಟ್ವೆ ವೊಳಿಚೆಂ,

ಖಂಯ್ ಗೆಲಾ ಹಾಸೊ ಆಮ್ಚೊ
ಆತಾಂ ಚಿಂತ್ಚೊ ವೇಳ್ ಮ್ಹಜೊ.

ಘರ‍್ಚ್ಯಾ ಕುಜ್ನಾಂತ್ ಲಿಪ್ಲಾ
ಯಾ ಚೊರಿ ಜಾಲಾ?
ಕಾರಾಚೆರ್ ಉರ‍್ಲಾ
ಯಾ ಕಾಮಾ ದಫ್ತರಾಕ್ ಘುಸ್ಲಾ?
ಬ್ಯಾಂಕ್ ಕೌಂಟರಾಕ್ ಪಾವ್ಲಾ
ಯಾ ದೇವ್ ಮಂದಿರಾಂಕ್ ಗೆಲಾ?

ಪಾರ್ಟೆ ಸಾಲಾಂಕ್ ರಿಗ್ಲಾ
ಯಾ ಆಮಾಲಿ ಜಾಲಾ?

ಚಿಂತುನ್ ಲಾಗ್ತಾನಾ ಮಾರ‍್ಲೊ ಫ್ಲ್ಯಾಶ್ ಖಿಣಾನ್
ಉಜ್ವಾಡಾ ಕಿರ್ಣಾಂನಿ ಭರ‍್ಲೆಂ ಗಿನ್ಯಾನ್...

-ಸ್ಟ್ಯಾನಿ ಬೆಳಾ