ಸಂಪಾದಕೀಯ್:
ಚಂಚಲ್ ಮನಾಕ್ ಲಾಗೊನ್ ಜಿವಿತ್ ಸಗ್ಳೆಂ ನಪ್ಪಟ್‌ನಾರ್
ಮನ್ಶಾಚೆಂ ಮನ್ ಚಂಚಲ್ ಆಸ್ತಾ. ಹ್ಯಾ ಚಂಚಲ್‌ಪಣಾಕ್ ಲಾಗೊನ್ ಜಾವ್ನ್ ಗೆಲ್ಲ್ಯಾ ಕಾಳಾಚ್ಯೊ ಆನಿ ಫುಡಾರಾಂತ್ಲ್ಯಾ ಕಾಳಾಚ್ಯೊ ಯೋಚನಾ ಮನಾಕ್ ವೆಡೊ ಘಾಲ್ತಾತ್. ಹಾಕಾ ಲಾಗೊನ್ ತುಜೆಂ ವರ್ತಮಾನ್ ಕಷ್ಟಾಂಚೆಂ ಜಾತಾ. ಹ್ಯಾ ಕಷ್ಟಾಂಚ್ಯಾ ವರ್ತಮಾನಾಕ್ ಲಾಗೊನ್ ಹಾಂಗಾಚಿ ಕವಯಿತ್ರಿ ದೆವಾಲಾಗಿಂ ಇತ್ತೆ ಕರಚೆಂ ಮ್ಹಣೊನ್ ನಿಮ್ಗಿತಾ.
ಕಿತ್ಲೆಂ ಬರೆಂ ಆಸಲ್ಲೆಂ ದೇವ್ ಹ್ಯಾ ಪ್ರಶ್ನಾಕ್ ಜಾಪ್ ದಿತೊ ಆಸಲ್ಲೊ ತರ್? ಜಾಪ್ ಆಮಿಂಚ್ ಸೊಧುನ್ ಕಾಡ್ಕಾ. ವರ್ತಮಾನಾಕ್ ಪೊಟ್ಲುನ್ ಧರುಂಕ್ ಆಮಿ ಶಿಕೋಕಾ.
ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯಿಲ್ಲ್ಯಾ ಗೀತಾ ಕಿಣಿಕ್ ಆಮ್ಚೊ ಯೆವ್ಕಾರ್. ಮಾರ್ಚ್ ತೀಸ್ ತಾರಿಕೆರ್ ಬಂಟ್ವಾಳ್ ಸಂಚಯಗಿರಿಂತ್ ಜಾಲ್ಲೆ ಕವಿಗೋಷ್ಟಿಂತ್ ವಾಚಲ್ಲಿ ತಿಚಿ ಕವಿತಾ ಹಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಚಂಚಲ ಮನ
ಇತ್ತೆ ಕರಚೆ ಸಾಂಗರೇ ದೇವಾ
ಮನ ಸಾಂಗಲ್ಯಾರ ಆಯಕನಾ.
ಭಜನ ಕೆಲ್ಯಾರ ನೀದ ಯೆತಾ
ಧ್ಯಾನ ಕೆಲ್ಯಾರಿ ಮನ ಧಾಂವತಾ
ಜಪಾ ಬಸಲ್ಯಾರ ಲೇಕ ಚುಕತಾ
ಹಾಂಗೇಲೆಂ ತಾಂಗೇಲೆಂ ಮಾತೆಕ ಯೆತಾ.
ಇತ್ತೆ ಕರಚೆ..
ಭಗವದ್‌ಗೀತಾ ವಾಚೂಕ ಜಾತಾ
ಮನಾ ದಾಕೂನ ನಾ ಜಾತಾ
ದೇವಳಾಕ ಯೆತಾ ವತಾ
ಮನ ಪೂರಾ ಘರಾಂತು ಆಸತಾ
ಇತ್ತೆ ಕರಚೆ..
ಆದಿ ವಿಷಯ ಉಡಗಾಸ ಜಾತಾ
ಉಡಗಾಸ ಜಾವನು ರಡೂಕ ಯೆತಾ
ಆಜಿ, ಆತಾಂಚೆ ಸೊಡೂನ ಪಡತಾ
ಫಾಯಚೆ ವಿಷಯಾಚೇ ಯೆಚ್ಚನ ಲಾಗತಾ.
ಇತ್ತೆ ಕರಚೆ..
ಹೋಡ ಹೋಡ ಸೊಪನ ಲೆಕತಾ
ಮನಾ ಭಿತ್ತರ ಮಾಂಡೊ ಗಿಳತಾ
ಕೋಟ್ಯಧೀಶ್ವರ ಜಾಲ್ಲೊ ಸೋ ದಿಸತಾ
ಘಡಿ ಭಿತ್ತರ ಶೂನ್ಯ ಜಾತಾ
ಇತ್ತೆ ಕರಚೆ..
ಸಾಂಗೂಕ ಭಾರೀ ಸುಲಭ ದಿಸತಾ
ಮನುಷ್ಯ ಜಲ್ಮು ದುರ್ಲಭ ಆಸತಾ
ಭಕ್ತೀನ ತುಕಾ ಪ್ರಣಾಮ ಕರತಾ
ಧೃಡ ಮನ ದೀ ಮ್ಹಣೂನ ಮಾಗತಾ
ಇತ್ತೆ ಕರಚೆ..
-ಗೀತಾ ಸಿ. ಕಿಣಿ
संपादकीय:
चंचल मनाक लागोन जिवीत सगळें नप्पटनार
मनशाचें मन चंचल आसता. ह्या चंचलपणाक लागोन जावन गेल्ल्या काळाच्यो आनी फुडारांतल्या काळाच्यो योचना मनाक वेडो घाल्तात. हाका लागोन तुजें वर्तमान कषटांचें जाता. ह्या कषटांच्या वर्तमानाक लागोन हांगाची कवयित्री देवालागीं इत्ते करचें म्हणोन निमगिता.
कितलें बरें आसल्लें देव ह्या प्रश्नाक जाप दितो आसल्लो तर? जाप आमिंच सोधून काडका. वर्तमानाक पोटलून धरुंक आमी शिकोका.
पयले पावटीं कविता कुळाराक आयिल्ल्या गीता किणीक आमचो येवकार. मार्च तीस तारिकेर बंटवाळ संचयगिरिंत जाल्ले कविगोषटिंत वाचल्ली तिची कविता ही.
-मेल्विन रोड्रीगस
कविता:
चंचल मन
इत्ते करचे सांगरे देवा
मन सांगल्यार आयकना.
भजन केल्यार नीद येता
ध्यान केल्यारी मन धांवता
जपा बसल्यार लेक चुकता
हांगेलें तांगेलें मातेक येता.
इत्ते करचे..
भगवदगीता वाचूक जाता
मना दाकून ना जाता
देवळाक येता वता
मन पूरा घरांतू आसता
इत्ते करचे..
आदी विषय उडगास जाता
उडगास जावनू रडूक येता
आजी, आतांचे सोडून पडता
फायचे विषयाचे येच्चन लागता.
इत्ते करचे..
होड होड सोपन लेकता
मना भित्तर मांडो गिळता
कोट्यधीश्वर जाल्लो सो दिसता
घडी भित्तर शून्य जाता
इत्ते करचे..
सांगूक भारी सुलभ दिसता
मनुषय जल्मू दुरलभ आसता
भक्तीन तुका प्रणाम करता
धृड मन दी म्हणून मागता
इत्ते करचे..
-गीता सी. किणी