ಕಿತ್ಯಾಕ್ ಅಶೆಂ ಭೊಗ್ತಾ?

ಸಂಪಾದಕೀಯ್:

ಜಿವಿತಾಚ್ಯಾ ಖರ್ನಾಂತ್ ಹದಾ ಜಾಲ್ಯಾ ಉಪ್ರಾಂತ್ ಧರುಂಕ್ ಮೆಳ್ಚೊ ಅರ್ಥ್

ಜಿವಿತಾಂತ್ಲೆ ಅನ್ಭವ್ ಮನ್ಶಾಕ್ ಜಿಣ್ಯೆಚೆ ಅರ್ಥ್ ಶಿಕಯ್ತಾ. ಹಾಂಗಾಸರ್ ಹೆ ಕವಿತೆಂತ್ ಜಿವಿತಾವಿಶಿಂ ನವಿಚ್ ಏಕ್ ಆಲೋಚೆನ್ ಕವಿನ್ ಕೆಲ್ಯಾ. ಜಿವಿತಾಚ್ಯಾ ಖರ್ನಾಂತ್ ಶಿಜೊನ್ ಹದಾ ಜಾಲ್ಲ್ಯಾಂಕ್ ಮಾತ್ರ್ ಅಸಲ್ಯೊ ಆಲೋಚೆನ್ಯೊ ಯೆತಾತ್. ತವಳ್ ತಸಲ್ಯಾ ಚಿಂತ್ಪಾಕ್ ಮರ್ಯಾದ್ ಯೆತಾ.

ಕವಿತೆಚೆ ದಿಷ್ಟಿನ್ ಲ್ಯಾನ್ಸಿ ಪಿಂಟೊ ನಾಯಕಾಚಿ ಸುಂದರ್ ಕವಿತಾ ಹಿ. ನವ್ಯಾ ತತ್ವಾಂಕ್ ಸುಂದರ್ ಉತ್ರಾಂದ್ವಾರಿಂ ಫಿಛಾರ್ ತಾಣೆಂ ಕೆಲಾಂ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕಿತ್ಯಾಕ್ ಅಶೆಂ ಭೊಗ್ತಾ?

ಜಶೆಂ...!
ಗಾವ್ಚೆಂ ಗೀತ್ ಸಂಪೊಂಕ್ ನಜೊ,
ಆಯಿಲ್ಲಿ ವಾಟ್ ಪಾಟಿಂ ಮೆಳೊಂಕ್ ನಜೊ,
ಕರ‍್ಚೆಂ ಪಯ್ಣ್ ಮುಗ್ದೊಂಕ್ ನಜೊ
ಆಪ್ಲ್ಯಾಂಚ್ಯಾ ಹಾತಿಂ ಫಸೊಂಕ್ ನಜೊ.

ಜಿಣಿ ಜಾಯ್ಜಾಯ್ ಲಾಂಬ್ ದೀಗ್ ಪಯ್ಣ್ ,
ಖಳನಾಸ್ತಾಂ, ವೊಳನಾಸ್ತಾಂ ಆಸ್ಚೊ ರಸ್ತೊ
ನಾಕಾ ಆಸ್ತ್ ಬದಿಕ್, ನಾಂವ್-ಅಂತಸ್ತ್,
ಬಾವನಾತಲ್ಲಿ, ನಿಂವನಾತಲ್ಲಿ ಆಂತರೀಕ್ ಉಮೆದ್

ತಶೆಂ:
ಪಾಟಿಂ ವಚೊಂಕ್ ನಾತಲ್ಲೆಂ ಪ್ರಯಾಣ್,
ನವೆ ಅನ್ಭವ್, ನವ್ಯಾ ಪರಿಸರಾಂತ್ಲಿ ಭೃಮಿದ್
ನಮಿಯಾರಲ್ಲ್ಯಾ ಜಾಗ್ಯಾಕ್ ಪಾಂವ್ಚ್ಯಾ ಆದಿಂ
ಸರ್ಗ್ ಮೆಳೊಂ, ಮರ‍್ಚೆ ಆದಿಂ.

ಹೆಡೆಂ ಉಕ್ಲುನ್, ಜಿಡೆಂ ಫುಲಂವ್ಚೆಂ
ಲೊಕಾಕ್ ದಾಕಂವ್ಚೆಂ ಫಕತ್ ವ್ಹಡ್ಪಣ್!
ಖುಶೆಕ್ ಆಪ್ಲೆ ಜಿಣ್ಯೆಕ್ ಧಲಂವ್ಚೆ
ಶಿಸೆಂ ಪಿಯೆವ್ನ್, ತೃಪ್ತಿ ಆಪ್ಣಾಂವ್ಚೆ.

ಅಶೆಂ:
ಸಾದೊ ಖಾಲ್ತೊ, ಮನಿಸ್ ಕರ್
ಖುಶೆಂತ್ ಜಿಯೆಂವ್ಚ್ಯಾ ಮನ್ಶಾಂ ಮಧೆಂ,
ಮರಣ್ ತುಂ ಧಾಡ್ತಾನಾ ಚಿಂತ್ತಾಂ,
"ಕೊರೊಡಾಂಚಿ" ಲೊಟ್ರಿ ಜಿಕ್ಲಿ ಹಾಂವೆಂ.

ಸಮಾಧಾನ್ ನಾತಲ್ಲೆಂ, ಜಿವಿತ್ ನಾಕಾ,
ದಾಯ್ಜ್ ಆಸೊನ್ ಕರ‍್ಗವ್ಣಿ ನಾಕಾ.
ಲಾಂಬ್ ದೀಗ್ "ಸುಖಾಳ್" ಪಯ್ಣಾರಿ ಕರ್,
ಪಯ್ಣ್ ಸಂಪ್ಚ್ಯಾ ಆದಿಂ "ಅವ್ಘಡ್" ಧಾಡ್.

ಜಾಂವ್:
ಜಿಣಿ ಜಾಂವ್ ಖುಶೆಚಿ ಮಸ್ತಿ.
ಕೆದಿಂಚ್ ಸಂಪನಾತಲ್ಲಿ ಆಶಾ.
ಧಾಂವ್ಡಾಂವ್ದಿ ಹರ್ಯೆಕಾ ಮನ್ಶಾಚಿ ಸುಸ್ತಿ,
ಲಾಭಂವ್ದಿ ಪಾವಲ್ಲಿ ದಿಶಾ.

-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್