ವರ್ಸು ಪಾಡ್ವೊ

ಸಂಪಾದಕೀಯ್:

ಪಾಯ್ಸಾಬರಿ ಗೋಡ್ ಸುಕನ್ಯಾಚಿ ಕವಿತಾ

ಕೊಂಕಣಿಚ್ಯೊ ಬೋಲಿ ಇತ್ಲ್ಯೊ ಆನಿ ತಿತ್ಲ್ಯೊ ನ್ಹಯ್. ಮಂಗ್ಳುರ್ಗಾರಾಂಕ್ ಮಂಗ್ಳುರಿ ಕಿರಿಸ್ತಾನಾಂಚಿ, ಗೌಡ ಸಾರಸ್ವತಾಂಚಿ, ಉಡುಪಿ, ಕುಂದಾಪುರ‍್ಚ್ಯಾ ಕಿರಿಸ್ತಾನಾಂಚಿ, ಮಾಗೀರ್ ಗೊಂಯ್ಕಾರಾಂಚಿ, ಥೊಡಿ ಕುಡ್ಮ್ಯಾಂಚಿ ಖಬರ್ ಆಸೊಂಕ್ ಪುರೊ. ಪುಣ್ ಹಾಚ್ಯಾಕಯ್ ಮೊಟ್ಯಾ ಮಾಪಾನ್ ಬೋಲಿ ಆಸಾತ್. ಆಯ್ಲೆವಾರ್ ಕವಿತಾ ಟ್ರಸ್ಟಾನ್ ಬಂಟ್ವಾಳಾಂತ್ ಘಡೊವ್ನ್ ಹಾಡ್ಲಲೆ ಕವಿಗೋಷ್ಟಿಂತ್ ಬಾಲಾವ್ಲೆಕಾರ್ ಬೋಲಿಚಿ ಏಕ್ ಕವಿತಾ ಸುಕನ್ಯಾ ನಾಯಕಾನ್ ವಾಚ್ಲಿ. ತಿಚೆ ಸಾಂಗಾತಾ ಹೆರ್ ದೊಗಾಂ ಜಣಾಂನೀಂಯ್ ತಾಂಚ್ಯೊ ಹೆಚ್ ಬೋಲಿಂತ್ಲ್ಯೊ ಕವಿತಾ ಸಾದರ್ ಕೆಲ್ಯೊ.

ಸುಕನ್ಯಾ ನಾಯಕಾಚಿ ಕವಿತಾ ಆಮಿ ಆಸಾ ತಶಿ ಹಾಂಗಾಸರ್ ದಿಲ್ಯಾ. ಮಾರ್ಚ್ 31 ತಾರಿಕೆರ್, ನವ್ಯಾ ವರ್ಸಾಚೊ ಮ್ಹಳ್ಯಾರ್ ಯುಗಾದಿಚೊ ದಿವಸ್. ಹಾಕಾ ಪಾಡ್ವೊ ಮ್ಹಣ್ತಾತ್. ಹ್ಯಾ ಸಂದರ್ಭಾರ್ ಘರಾಂತ್ ಕಸಲೊ ಸಂಭ್ರಮ್ ಚಲ್ತಾ. ಬಾಯಾಂಕ್ ತಶೆಂ ಮಾನಾಯಾಂಕ್ ಕಿತೆಂ ಲಾಬ್ತಾ, ಪುಜಾ ಕಸಲಿ ಚಲ್ತಾ, ಖಾಣ್ ಕಿತೆಂ ಕರ‍್ತಾತ್ ಮ್ಹಳ್ಳೆವಿಶಿಂ ಹಿ ಕವಿತಾ ಆಸಾ. ಪಾಯ್ಸಾಬರಿ ಗೋಡ್ ಆಸಾ, ಹಿ ಕವಿತಾ ಸುಕನ್ಯಾಚಿ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ವರ್ಸು ಪಾಡ್ವೊ

ಮುತ್ತೈದೆ ಬಾಯಾ ಧಾಕ್ಲಿ - ಬಾಳಾ
ಅಗ್ಗಿ ಕುಡ್ಸೊನು
ಕುಟುಂಬಚೆ ವ್ಹಡ್ಲಂಚ ಘರಾಂತ್
ಭಾರಿ ಸಂಬ್ರೊಮ್
ಮುಂಬೈ ಕೊಡಿಯಾಲ್ ಗೆಲ್ಲೆ
ಬಾಯಾಂಸ ಕಾಪಾಡ್, ಮಾಣಾಯಂಸ್ ವೇಸ್ಟಿ
ಧಾಕ್ಲೆಂಸ್ ಅಂಗಿಯೋ ಘೇಂವ್ಹು
ವರ್ಸು ಪಾಡ್ವೊಸ್ ಅಯಿಲೆ

ಚೈತ್ರ ಮೈನೆಚೋ ಶುಕ್ಲ ಪಕ್ಷಚೆ
ಪಾಡ್ಯ ತಿಥಿದಿ ವರ್ಸು ಪಾಡ್ವೊ
ಸಂಭ್ರಮನಿ ಕೋಡ್-ಗೋಡ್
ಖಾವುಂಚೆ ದೀಸ್ ಪಾಡ್ವೊ

ವ್ಹಡಿಲ್ ಮಣಿಸ್ ಪಟ್ಟೆ ನೇಸೋನ್
ಕರ್ತದ್ ಪೂಜೆಚೆ ತಯಾರ್
ಬೇವು ಗೋಡ್ ಘಳುನು ಫೊವಾಚೋ ನೇವೇದ್ಯ್
ಕುಲದೇವತೆ ಪೂಜ್ ಭಕ್ತಿನಿ
ನವ ನ್ಹೌವುರಿ ನ್ಹವುರಿಂಸ್ ಆರತ್ ಕರೋನ್
ದಂಪತಿ ಪೂಜಾಚೆ ಪೊರ್ಲು
ಕಾಜ್ವೆಚ ಬಿಯಚೊ ಪಾಯಸ್ ಅನಿ ಸುಖೆ
ವರ್ಸು ಪಾಡ್ವಚೆ ವಿಶೇಷ್

- ಸುಕನ್ಯಾ ನಾಯಕ್