ಸಂಪಾದಕೀಯ್:
ಕವಿತಾ ಸೊಧುನ್ ವಚೊನ್ ಕವಿತಾಚ್ ಜಾಂವ್ಚೆಂ
ಕವಿತಾ ಸೊಧುನ್ ದಿಯಾ ಮ್ಹಣ್ ಸಾಂಗೊನ್ ವಚೊನ್ ಆಮ್ಕಾಂ ಸರ್ವಾಂಕ್ ಸುಂದರ್ ಕವಿತಾ ದಿಲ್ಯಾ ಹಾಂಗಾಸರ್ ಸುರೇಶ್ ಬಾಳಿಗಾನ್. ಕವಿತಾ ಸೊದ್ಚ್ಯಾ ನಿಬಾನ್, ಘರ‍್ಚ್ಯಾ ಮನ್ಶಾಂಚೆಂ ವ್ಯಕ್ತಿತ್ವ್, ತಾಂಚಿ ಮಟ್ವಿ ವೊಳಕ್ ಕರುನ್ ದಿಲ್ಯಾ ತಾಣೆಂ. ತಾಚಿ ಬಾಯ್ಲ್, ತಾಚಿ ಧುವ್, ತಾಚೊ ಪೂತ್, ತಾಚಿ ಆವಯ್, ತಾಚೊ ಬಾಪೂಸ್ - ಸಗ್ಳಿಂ ಹಾಂಗಾಸರ್ ಯೆತಾತ್.
ತಾಂಚೆ ಮಾರಿಫಾತ್ ಸ್ವತಾ ಕವಿಚಿ ಪರಿಪೂರ್ಣ್ ವೊಳಕ್ ಆಮ್ಕಾಂ ಜಾತಾ. ಆಮ್ಚ್ಯಾ ಘರಾಣ್ಯಾಂನಿ ದಿಸ್ಪಡ್ತೆಂ ಜಾಂವ್ಚೆ ಖೆಳ್, ಆಮ್ಚ್ಯಾ ಘರಾಂತ್ಲಿ ಪರಿಸ್ಥಿತಿ ಕವಿನ್ ಆಮ್ಚ್ಯಾ ದೊಳ್ಯಾಂ ಮುಕಾರ್ ಸೊಭಿತ್ ರುಪ್ಣ್ಯಾಂ ಮಾರಿಫಾತ್ ದವರ‍್ಲ್ಯಾ.
ಬಂಟ್ವಾಳಾಂತ್ ಚಲಲ್ಲೆ ಕವಿಗೋಷ್ಟಿಂತ್ ಆಪ್ಲೆಚ್ ಖಾಸ್ ಶೈಲೆನ್ ಸುರೇಶಾನ್ ಹಿ ಕವಿತಾ ವಾಚುನ್ ಸರ್ವಾಂಕ್ ಖುಶಿ ಕೆಲ್ಲೆಂ. ಆತಾಂ ಕವಿತಾಕುಳಾರ್ ವಾಚ್ಪ್ಯಾಂನಿ ಹೆ ಕವಿತೆಚೊ ಆನಂದ್ ಚಾಕ್ಚೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿತಾ ಹೊಡಗೂನ್ ಗೆಲ್ಯಾ
ಮೆಗೆಲಿ ಕವಿತಾ ಹೊಡಗೂನ್ ಗೆಲ್ಯಾ
ಬರಯಿಲೊ ಕಾಗ್ದಾ ಕುಡ್ಕೊ ದಿಸ್ತಾಚ್ ನಾ
ವಿಸರ್ ಮಾತ್ಯಾರ್ ಯೇವ್ನ್ ಬಸ್ಲಾ
ಖಂಯ್ಚೇಂಯ್ ಹಾತಾಕ್ ಮೆಳ್ತಾಚ್ ನಾ
ಸೊಧೂಯಾಂ ಮ್ಹಳ್ಯಾರ್
ಖಂಯ ಸೂರ್ ಕರಚೆ ಕಳ್ತಾಚ್ ನಾ.
ಯಜ್ಮಾನಿಕ್ ವಿಚಾರ್ಲ್ಯಾರ್
ತೀ ಖಂಯ್ ಕಾನಾಕ್ ವ್ಹರತಾ?
ಕವಿಲಿ ಬಾಯ್ಲ್ ಮ್ಹಣೋನ್ ಘೆವಚ್ಯಾಕ್
ತಿಕಾ ಬಿಲ್ಕುಲ್ ಖೂಶಿ ನಾ
ತೆ ಪುರಾಯ್ ಕಾಮ್ ನಾತಿಲೆಲೆ ಕಾಮ್
ಮ್ಹಣ್ ತಿಗೆಲೆ ಚಿಂತಪ್
ತೀ ಸೀರಿಯಲಾಂತ್ ಬುಡೂನ್ ಗೆಲ್ಯಾ
ತಿಕಾ ಸುನ್ನೇಕ್ ಬಾದಾ ದಿತ್ತಲಿ ಸಾಸೂಮಾಲಿ ಚಿಂತಾ
ಆನಿ ಪಾಡ್ ಜಾಲೆಲೆ ರಿಮೊಟಾಚೆ.
ಮಾಕಾ ದೋಳೇಚ್ ದಿಸನಾರೆ ಪುತಾ
ಮ್ಹಣತಾ ಮೆಗೆಲಿ ಮಾಯ್
ನಾತ್ಯೇಲೆ ಮಾತ್ಯಾರ್ ಕೆಸಾ ಎಡ್ಯಾಂತ್
ಚಾಬೂನ್ ಬಶಿಲೆ "ರಡ್ಡೊ" ಸೊಧೂನ್
ನಾಂಕ್ಟಾನ್ ಕಿಮ್ಚೂನ್
ಮಾರತಾ ಆಸಾ.
ಆನಿ ಮೆಗೆಲಿ ಧೂವ
ತ್ಯೆ ದುಕಿಂತೂಯ್ ಸುಖ ಭೊಗ್ತಚ್
ಮೊಬಾಯ್ಲಾಕ್ ಚಾಬೂನ್ ಬಸ್ಲ್ಯಾ.
ಸೀಕಾಚೊ ಬಾಪೂಸ್
ಉಲಯ್ನಾಶಿ, ಉಠಾಯ್ನಾಶಿ ಜಾಲ್ಲಾ
ವರಸ್ ವೀಸ್
ಆನಿ ತೊ ಸೊಧೀತ್ ಆಸಾ
ಸಾಗ್ವಾನಿ ಆಡ್ಯಾ ಎಡೆಂತುಲ್ಯಾನ್
ದೆಂವ್ಚೆ ಸುರ್ವ್ಯಾಂತ್
ವಿಸರ್ಲೊಲೊ ಆಪಣ್ಯಾಲೊ ಸೋರು
ಹಿತ್ಲಾಚೆ ಝಾಡ್ಕುಟಾಂತ್
ಮಾರ್ಲೊಲೊ ಬೊಲ್
ಸೊಧೂನ್ ಹಾಡುಕ್ ಗೆಲಾ
ಮೆಗೆಲೊ ಚೆರ್ಕೊ
ಆನಿಕಯ್ ಘರಾಕ್ ಪಾವಿಲೊ ನಾ
ತಾಕಾ ಸಚಿನಾಲಿ ನಿವೃತ್ತಿ ಚಿಂತಾ
ಹಾಗೆಲಿ ಭವಿಷ್ಯಾಚಿ ನಾ.
ಸಂಸಾರ್ ಸಗ್ಳೊ ಸೊಧೂಚಾಂತ್ ಪಳ್ಳಾ
ಆನಿ ಮೆಗೆಲಿ ಕವಿತಾ
ಕೋಣ್ ಸೊಧೂನ್ ದಿತಾ?
ತುಮಿ ಕೊಣಯ್?
-ಸುರೇಶ ಬಾಳಿಗಾ, ಬಂಟ್ವಾಳ
संपादकीय:
कविता सोधून वचोन कविताच जांवचें
कविता सोधून दिया म्हण सांगोन वचोन आमकां सर्वांक सुंदर कविता दिल्या हांगासर सुरेश बाळिगान. कविता सोदच्या निबान, घरच्या मनशांचें व्यक्तित्व, तांची मटवी वोळक करून दिल्या ताणें. ताची बायल, ताची धूव, ताचो पूत, ताची आवय, ताचो बापूस - सगळीं हांगासर येतात.
तांचे मारिफात स्वता कविची परिपूर्ण वोळक आमकां जाता. आमच्या घराण्यांनी दिस्पडतें जांवचे खेळ, आमच्या घरांतली परिस्थिती कवीन आमच्या दोळ्यां मुकार सोभीत रुपण्यां मारिफात दवरल्या.
बंटवाळांत चलल्ले कविगोष्टींत आपलेच खास शैलेन सुरेशान ही कविता वाचून सर्वांक खुशी केल्लें. आतां कविताकुळार वाचप्यांनी हे कवितेचो आनंद चाकचो.
-मेल्विन रोड्रीगस
कविता:
कविता होडगून गेल्या
मेगेली कविता होडगून गेल्या
बरयिलो कागदा कुडको दिसताच ना
विसर मात्यार येवन बसला
खंयचेंय हाताक मेळताच ना
सोधूयां म्हळ्यार
खंय सूर करचे कळताच ना.
यज्मानीक विचारल्यार
ती खंय कानाक व्हरता?
कविली बायल म्हणोन घेवच्याक
तिका बिल्कूल खूशी ना
ते पुराय काम नातिलेले काम
म्हण तिगेले चिंतप
ती सीरियलांत बुडून गेल्या
तिका सुन्नेक बादा दित्तली सासूमाली चिंता
आनी पाड जालेले रिमोटाचे.
माका दोळेच दिसनारे पुता
म्हणता मेगेली माय
नात्येले मात्यार केसा एड्यांत
चाबून बशिले "रड्डो" सोधून
नांकटान किमचून
मारता आसा.
आनी मेगेली धूव
त्ये दुकिंतूय सूख भोगतच
मोबायलाक चाबून बसल्या.
सीकाचो बापूस
उलयनाशी, उठायनाशी जाल्ला
वरस वीस
आनी तो सोधीत आसा
सागवानी आड्या एडेंतुल्यान
देंवचे सुरव्यांत
विसरलोलो आपण्यालो सोरू
हितलाचे झाडकुटांत
मारलोलो बॉल
सोधून हाडूक गेला
मेगेलो चेरको
आनिकय घराक पाविलो ना
ताका सचिनाली निवृत्ती चिंता
हागेली भविष्याची ना.
संसार सगळो सोधूचांत पळ्ळा
आनी मेगेली कविता
कोण सोधून दिता?
तुमी कोणय?
-सुरेश बाळिगा, बंटवाळ