ಸಂಪಾದಕೀಯ್:
ಕವಿತಾ ಜಲ್ಮೊಂಚ್ಯಾ ವೆಳಾರ್ ವ್ಯಾರ್ ಸಗ್ಳೊ ಬಂಧ್ ಪಡ್ತಾನಾ!
ಕವಿತಾ ಜಲ್ಮೊಂಚೊ ವೇಳ್ ಮ್ಹಣೊನ್ ಆಸ್ತಾ. ಹ್ಯಾ ವೆಳಾರ್ ಮಾತ್ರ್ ಮನ್ಶಾನ್ ಕವಿ ಜಾಂವ್ಚೆಂ. ಹೆರೆವೆಳಾರ್ ತೊ ಸಕ್ಡಾಂಪರಿಂ ಸಾದೊ ಮನೀಸ್. ಹೆ ಕವಿತೆಂತಯ್ ತಶೇಂಚ್ ಘಡ್ಲಾಂ. ಹಾಂಗಾಚೊ ಮನೀಸ್ ಬಂಡಸಾಳ್ಯಾಂತ್ ವ್ಯಾರ್ ಕರ್‍ತಾ. ಪುಣ್ ಕಿತೆಂಕಿ ಹ್ಯಾ ಮನ್ಶಾಭಿತರ್ ಏಕ್ ಕವಿ ಆಸಾ. ಆನಿ ಕೆನ್ನಾಂ, ಕೆನ್ನಾಂ ಹ್ಯಾ ಕವಿಕ್ ಜಾಗ್ ಜಾತಾ. ತಶೆಂ ಮ್ಹಳ್ಯಾರ್ ತೊ ಮನೀಸ್‍ಪಣ್ ಪಾಫ್ಡುನ್ ಕವಿತೆಚ್ಯಾ ನಂದನಾವನಾಕ್ ರಿಗ್ತಾ.
ಬಂಟ್ವಾಳ್ಚ್ಯಾ ಸುರೇಶ್ ಬಾಳಿಗಾನ್ ಆಪ್ಣಾಕ್‍ಚ್ ಹೆ ಕವಿತೆಚೊ ನಾಯಕ್ ಕೆಲಾ. ನಿಜಾಯೆನ್ ತೋಯ್ ಎಕ್ಲೊ ವ್ಯಾರ್‍ಕಾರ್. ತೋಯ್ ಎಕ್ಲೊ ಕವಿ. ಹ್ಯಾ ವ್ಯಾರಾ ಮಧೆಂ, ಹಿ ಕವಿತಾ ತಾಣೆ ಸಾಂಬಾಳ್ತಾನಾ ಕಿತೆಂ ಸಕ್ಕಡ್ ಘಡ್ತಾ ಮ್ಹಳ್ಳೆಂ ಬೋವ್ ಸುಂದರ್‍ ರಿತಿನ್ ತಾಣೆಂ ಬರಯ್ಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಂಗಾಂತ ಕವಿ ರಿಗಲಾ
ಮೆಗೆಲೆ ಆಂಗಾಂತ ಏಕ ಕವಿ ಯೇವನ ರಿಗಲಾ
ಹಾಂವ ವ್ಯಾರೇಲಿ ಫುರಸತ ನಾತಿಲೊ
ಹೆಂ ಕಶಿ ಜಾಲ್ಲೆ ಮ್ಹಣು ಕಳನಾ
ವ್ಯಾರಾಕ ಕಾಂಯ ಬಾಧಕ ನಾ.
ಜಾಲ್ಯಾರ ಫಾಯದೋಯ ಬಿಲ್ಕುಲ ನಾ.
ಹಾಂವ ನುತ ಬಸಲ್ಯಾರ ತೊ ಭಾಯರ ಯೆತಾ
ಗಿಚಿತಾ, ಬರಯತಾ ಆನಿ ಸಾಂಗತಾ
ಹೀ ಏಕಿ ಕವಿತಾ.
ಆಮಿ ಗಾಂವ ಸೋಣ
ಫ್ಲ್ಯಾಟಾಂತ ಯೇವನ ರಾಬತರಿ
ಪೊಶಿಲ್ಯಾ ಪೆಟ್ಯಾಕ ಘರ ನಾ ಜಾಲ್ಲೆ.
ತೊ ವಾಟೇರ ಪಳ್ಳಾ
ಮುಖಾರಚೆ ಡಾಭಾಚೆ ಜಗಲೇರ
ದೀಸ ಕಾಡತಾ
ಮ್ಹಾಕಾ ಪಳಯಲ್ಯಾರ ಭೊಂಕತಾ
ದುಸ್ರ್ಯಾಂಕ ಬಾಲ ಹಾಲಯತಚ
ಕವಿ ಲಾಗಿಂ ನಾಖುಶಿ ದಾಕಯತಾ.
ಲಾಗಿ ಗೆಲ್ಯಾರ ಖೆಳತಲೀಂ
ಸುಕಣ್ಯಾಂಚಿ ಜೋಡಿ
ಆತಾಂ ಮೊಬಾಯ್ಲ ಟವರಾರ ಬಸತಾತಿ
ರೂಕ ಕಾತರ್ಲೆಲೆ ಪರಾಂತ
ತಾನಿಂ ಪಾಕ ಮಾರ್ನ ಉಬತಾನಾ
ವಿಂಗಡ ವಿಂಗಡ ರಿಂಗ್‌ಟೋನ
ಆಯಕತಾ ಕವಿಲೆಂ ಕಾನಾಂಕ
ದಿವೋಡ ಏಕ ವಿಂದುರ ಖಾವಚೆ
ನೆವನಾರ ಬಂಡಸಾಳ್ಯಾಂತ ಆಯಲಾ
ಪಯಲೆಂ ಆಮಿ ಎಕಾಮೆಕಾಂಕ ಬಿತಾಲೆಂ
ಆತಾ ತಾಕಾ ಭಾಯರ ಸರೂಂಕ ಮನಚ ನಾ
ಸಿ.ಸಿ. ಕ್ಯಾಮರಶೆಂ ಮುಲ್ಯಾಂತ ಬಯಸೂನ
ಯೆತಾ ವತಲ್ಯಾಂಚೇರ ದೃಷ್ಟಿ ಘಾಲತಾ
ಕವೀಕ ಮಾತ ದಿಸತಾ
ಚಿಂತಾ, ತಾಗೆಲೆ ದೊಳ್ಯಾಂತ
ತಾಂಕಾ ಕೊಣಾಕಯ ಕವಿಲೀಂ
ಜವಾಬ ಮೆಳನಾ
ತೋಚ ಯೇವನ ಬಸಲಾ
ದುಸರ್‍ಯಾಲೆ ಆಂಗಾಂತ
ನಾ ನಾತಿಲೆ ಖಂಚೇಯ ಸಂಬಂಧು
ಏಕ ದೀಸ ಸೊಡಕಾ ಪಡತಲೆಂ ಕೀ
ಮ್ಹಣು ತಾಕಾಯ ಚಿಂತಾ
ಆಯ್ಲಲೆ ದೋನ ಗಿರಾಯ್ಕಿ ಪಳಯತರ
ವ್ಯಾರೇಲಿ ಜಾಗ ಜಾತಾ
ಆನಿ ಕವಿ ಪರತೂನ ನಿಪೋನ ಬಸತಾ
ಮೆಗೆಲೆ ಆಂಗಾಂತ
-ಬಿ. ಸುರೇಶ ಬಾಳಿಗಾ