ಸಂಪಾದಕೀಯ್:
ಜೊಪಾಂತ್ಲಿ ಆಮುರ್‌ಪಿಕಿ ಕವಿತಾ, ಕಾಳ್ಜಾಂಕ್ ಕನ್ನಾ ಘಾಲ್ತಾ
ಆಪುರ್‌ಬಾಯೆಚ್ಯಾ ಪ್ರತಿಮಾಂನಿ ಗುಂತ್‌ಲ್ಲಿ ಏಕ್ ಉಂಚ್ಲಿ ಕವಿತಾ ಹಾಂಗಾಸರ್ ತುಮ್ಕಾಂ ಚಾಕೊಂಕ್ ದಿಲ್ಯಾ. ತಿ ಚಾಕ್ತಾನಾ ಕವಿತೆಂತ್ಲೊ ಹೊ ಮನೀಸ್ ಕೊಣಾಕ್ ಸೊದ್ತಾಗಾಯ್? ಕಸಲೊ ಜಿನೊಸ್ ಮೆಜ್ತಾಗಾಯ್? ಕೊಣಾಚಿ ವೊಳಕ್ ಧರ್‍ತಾಗಾಯ್? ಆನಿ ಆಕ್ರೇಕ್ ಕೊಣಾಚೆಂ ರುಪ್ಣೆಂ ದೆಖ್ತಾಗಾಯ್? ಮ್ಹಳ್ಳಿಂ ಸವಾಲಾಂ ತುಮ್ಚೆ ಮತಿಕ್ ರೆವೊಡ್ ಘಾಲುಂಕ್ ಪುರೊ. ತುಮ್ಚ್ಯಾ ತುಮ್ಚ್ಯಾ ಜಿವಿತಾಚ್ಯಾ ಅನ್ಭೋಗಾಪ್ರಕಾರ್ ತುಮ್ಕಾಂ ಹ್ಯಾ ಸವಾಲಾಂಚ್ಯೊ ಜಾಪಿ ಲಾಭೊಂಕ್‌ಯ್ ಪುರೊ.
ಕೊಣಾಕ್ ಆವಯ್ಚೊ ಉಡಾಸ್ ಯೆತಲೊ, ಕೊಣಾಕ್ ಪತಿಣೆಚೊ, ಕೊಣಾಕ್ ಲಗ್ನಾಭಾಯ್ಲೆ ಪ್ರೇಯಸಿಚೊ, ಕೊಣಾಕ್ ಆಂಕ್ವಾರ್ ಸಾಯ್ಬಿಣಿಚೊ ಆನಿ ಕೊಣಾಕ್ ಹ್ಯಾ ಸರ್‍ವಾಂಚೊ. ಕೊಣಾಕ್ ಕೊಣಾಯ್ಚೋಯ್ ಉಡಾಸ್ ಯೇಂವ್ದಿ, ಹಿ ಕವಿತಾ ಮಾತ್ರ್ ತುಮ್ಚ್ಯಾ ಉಡಾಸಾಂಚ್ಯಾ ಉಡಾಸಾಂನಿ ಉಡಾಸ್ ಜಾವ್ನ್ ರಾವ್ತಾ ತೆಂ ಖಂಡಿತ್.
ಕಾಯ್ಲೆ ಮಧ್ಲ್ಯಾ ಪಾನ್ಪೊಳ್ಯಾನ್ ಆಪುಣ್ ಭಾಜುನ್ ವೆಚೆ ಗತಿಂತ್ ಆಸೊನ್ ಪಿಂರ್‍ಗತಾನಾಂಯ್ ಗಾಯಾನ್ ಕರ್‍ಚೆಂ ಚಿಂತಪ್ ಎಕಾ ಉಂಚ್ಲ್ಯಾ ಕವಿಕ್ ಮಾತ್ರ್ ಯೇಂವ್ಕ್ ಸಾಧ್ಯ್ ಆಸಾ. ಆಲ್ವಿ ಕಾರ್ಮೆಲಿತ್ ಆಪ್ಲ್ಯಾ ಫುಡ್ಲದ್ 'ಪಿಂತುರಾಂ' ಕವಿತಾ ಪುಸ್ತಕಾದ್ವಾರಿಂಚ್ ಉಂಚ್ಲ್ಯಾಂಚೆ ಪಂಗ್ತಿಂತ್ ಆಪ್ಲೆಂ ನಾಂವ್ ಥಿರಾಯಿಲ್ಲೊ ಕವಿ. ತಾಚೆಥಾವ್ನ್ ಫುಡಾರಾಂತ್‌ಯ್ ಅಸಲ್ಯೊ ಗಿರೇಸ್ತ್ ಕವಿತಾ ಆಮ್ಕಾಂ ಲಾಭ್ತಲ್ಯೊ ಮ್ಹಣ್ಚ್ಯಾಕ್ ಕಾಯಿಂಚ್ ದುಭಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜೋಪ್
ಉದ್ಕಾ ವಯ್ಲೊ ಬುಳ್ಬುಳೊ
ಹುಳ್ವುಳೊನ್ ಧಾಂವ್ತಾನಾ
ಲಿಪೊನ್ ಆಸ್ಚ್ಯಾ ದುಭಾವಾಂನಿ
ತುಕಾ ಸೊಧುನ್ ತಿಳ್ತಲೊಂ
ಪಾಂಯಾಂಕ್ ಧಲ್ಚೊ ಕಿಣ್ಕುಳೊ
ಖೆಳೊನ್ ಲೊಳೊನ್ ನಾಚ್ತಾನಾ
ವ್ಹಾಳೊನ್ ವೆಚ್ಯಾ ತರಂಗಾಂನಿ
ಜಿನೊಸ್ ತುಜೊ ಮೆಜ್ತಲೊಂ
ಕಾಯ್ಲೆ ಮಧ್ಲೊ ಪಾನ್ಪೊಳೊ
ಪಿಂರ್‍ಗೊನ್ ಗಾಯಾನ್ ಕರ್‍ತಾನಾ
ತಾಳ್ ದಿಂವ್ಚ್ಯಾ ಕಾಂಕ್ಣಾಂನಿ
ವೊಳಕ್ ತುಜಿ ಧರ್‍ತಲೊಂ
ದೊಳ್ಯಾ ಪಂದ್ಲೊ ಸಳ್ಸಳೊ
ಗಳೊನ್ ಪೊಲೊ ಭಿಜ್ತಾನಾ
ಕಿರ್ಲೊನ್ ಯೆಂವ್ಚ್ಯಾ ಉಡಾಸಾಂನಿ
ರುಪ್ಣೆಂ ತುಜೆಂ ದೆಖ್ತಲೊಂ
-ಆಲ್ವಿ ಕಾರ್ಮೆಲಿತ್