ಸಂಪಾದಕೀಯ್:
ರೂಕ್ ಪೊಸ್‌ಲ್ಲ್ಯಾಂನಿ, ರುಕಾಚಿ ಕೀಡ್ ಧಾಂವ್ಡಾಯ್ಜೆ ಪಡ್ತಾ
ಆಧುನಿಕರಣಾಕ್ ಲಾಗೊನ್, ಪಾಶ್ಚಾತಿಕರಣಾಕ್ ಲಾಗೊನ್, ಭುಂಯ್ಗೊಳೀಕರಣಾಕ್ ಲಾಗೊನ್ ಆಜ್ ಎಕೆ ಭಾಶೆಚಿ, ಎಕೆ ಸಂಸ್ಕೃತೆಚಿ ಮಾತ್ರ್ ಕಿತ್ಯಾಕ್ ಸಗ್ಳೆ ಎಕೆ ಸಮಾಜೆಚಿಚ್ ವೀದ್‌ವಾವ್ಳಿ ಜಾತಾ ತಾಕಾ ಆಮ್ಚಿ ಕೊಂಕಣಿ ಸಮಾಜ್ ಪ್ರಮುಕ್ ದಾಕ್ಲೊ ಜಾವ್ನ್ ಘೆವ್ಯೆತ್. ಆಜ್ ಆಮ್ಚಿ ಕೊಂಕಣಿ ಸಮಾಜ್ 'ಆಮ್ಚಿ' ಜಾವ್ನ್ ಉರೊಂಕ್ ನಾ. ತಶೆಂ ಮ್ಹಣೊನ್ ಫಿಂರ್‍ಗಿ ಗಾಂವಾಂನಿ ತಿಕಾ ತಾಂಚ್ಯಾ ಪಾಲ್ವಾಭಿತರ್ ಮೊಗಾಚೊ ಆಸ್ರೊ ಸೈತ್ ದೀಂವ್ಕ್ ನಾ. ಮ್ಹಣ್ತಾನಾ ಖಂಯ್ಚ್ಯಾಕಿ ಸಾಗೊರಾಚ್ಯಾ ಥಳಾಂತ್ ಗೊಮ್ಟ್ಯಾಕ್ ದಾಂತ್ಯಾಫಾತರ್ ಬಾಂಧುನ್ ಉಪ್ಯೆಂವ್ಚೆಂ ಸಾಹಸ್ ಕರುನ್ ಆಸಾ 'ಆಮ್ಚಿ' ಸಮಾಜ್.
ಶಿತ್ ವೊತುನ್ ಪೇಜ್ ಜಾಲ್ಯಾ ಮ್ಹಣ್ಚೆಂಕಿ? ಪೇಜ್ ವೊತುನ್ ಮಡ್ಡಿ ಜಾಲ್ಯಾ ಮ್ಹಣ್ಚೆಂಕಿ? ಯಾ ಮಡ್ಡಿ ವೊತುನ್ ಖಿರ್ ಜಾಲ್ಯಾ ಮ್ಹಣ್ಚೆಂ?
ಯೆದೊಳ್‌ಚ್ ಖಿರ್ ಜಾಲ್ಲೆ ಎಕೆ ಸಮಾಜೆಚೆರ್ ಪರ್‍ತ್ಯಾನ್ ಏಕ್ ಪಾವ್ಟಿಂ ತೀರ್ ಜೊಕುನ್, ನಿಮಾಣೆಂ ಖಾಲ್ತೆಪಣಿ 'ಆನಿಕ್‌ಯ್ ವೇಳ್ ಉತ್ರೊಂಕ್ ನಾ. ಸುರ್ಯೊ ಬುಡ್ಚ್ಯಾಪಯ್ಲೆಂ ಪಲ್ತಡಿ ಥಾವ್ನ್ ಆಲ್ತಡಿಕ್ ಯೆಯಾ' ಮ್ಹಣ್ಚೊ ಸಂದೇಶ್ ಹಿ ಕವಿತಾ ದಿತಾ.
ಆನಿ ಅಸಲೊ ಸಂದೇಶ್ ದೀಂವ್ಕ್ ಜೊನಿ ಸುರತ್ಕಲಾನ್ ಧೈರ್ ಘೆನಾಸ್ತಾಂ ಆನಿ ಕೊಣೆಂ ಘೆಂವ್ಚೆಂ? ಕೊಣೆ ಕೊಂಕಣಿಚೆ ರೂಕ್ ಪೊಸ್ಲ್ಯಾತ್, ತಾಂಕಾಂ ತ್ಯಾ ರುಕಾಕ್ ಲಾಗ್‌ಲ್ಲಿ ಕೀಡ್ ಧಾಂವ್ಡಾಂವ್ಕ್ ಅಧಿಕಾರ್ ನಾಸ್ತಾಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾತ್ಯೆ ಪರ್ಮಳ್
ಕೊಂಕ್ಣಿ ಮಾತ್ಯೆಂತ್ ಜಲ್ಮಾಲ್ಲೆ ಥೊಡೆ
ಮಾತ್ಯೆ ಪರ್ಮಳ್ ವಿಸ್ರೊಂಕ್ ಪಾವ್ಲೆ
'ಸ್ಟೇಟ್ಸ್' 'ಕೆನಡಾ' ಉಬ್ಲೆ ಬಾವ್ಡೆ
ನಾಗರಿಕ್ ಜಾವ್ನ್ ಥಯಿಂಚ್ ಉರ್‍ಲೆ
ವಿದೇಶಿ ಜಾಲಾಯ್ ಭಾವಾ ಪರ್ದೆಶಾಕ್ ಪಾವೊನ್
ಜಲ್ಮ್ ದಿಲ್ಲೆ ಮಾತ್ಯೆಕ್ ವಿಸ್ರನಾಕಾ
ವಿಲಾಸಿ ಜೀವನ್, ಸಂಸಾರ್ ಆಶೆವ್ನ್
ತೆ ಮಾತ್ಯೆ ವಾಸಾಕ್ ಭುಲನಾಕಾ
ಪರ್ಕಿ ಕೆದ್ನಾಂಯ್ ಪರ್ಕಿಚ್ ಉರ್‍ತಾ
ಫಿಜಿಂತ್ಲ್ಯಾ ಘಡಿತಾಕ್ ವಿಸ್ರನಾಕಾ
ಪರ್ದೆಶಾ ಥಾವುನ್ ವಿಚಾರ್‍ತಾ ಕೊಂಕ್ಣೊ
ಮಾಯ್ ಗಾಂವಾಂತ್ ಕಿತೆಂ ಆಸಾ
ಜಾಪ್ ದಿತಾಂ ಹಾಂವ್‌ರೆ ತಾಕಾ
ಗಾಂವಾಂತ್ ಆಮ್ಚ್ಯಾ ಜಾಯ್ತೆಂ ಆಸಾ
ನಂಯ್ಚೆ ಮಾಸ್ಳೆ ಕಡಿಯೆ ಸಂಗಿಂ
ರುಚಿಕ್ ಪೇಜ್, ಚೆಟ್ಣಿ ಆಸಾ
ಬಾಪ್ಪು, ಮಾವ್ಶಿ, ಮಾಮಾ ಸಂಗಿಂ
ಕುಟ್ಮಾ ಸಂಬಂಧ್ ಗುಂತುನ್ ಆಸಾ
ದಾಯ್ಜಿ ಆನಿ ಗೊತ್ರ್ಯಾಂ ಸಂಗಿಂ
ಭಾಶೆ ಬಾಂಧ್, ಬಾಂಧುನ್ ಆಸಾ
ಆನಿ ಮಾಯ್ ಗಾಂವ್ಚ್ಯಾ ಹವ್ಯಾಂತ್‌ರೆ ಭಾವಾ
ಮಾತ್ಯೆ ಪರ್ಮಳ್ ಮಿಸ್ಳೊನ್ ಆಸಾ
-ಜೊನಿ, ಸುರತ್ಕಲ್