ಸಂಪಾದಕೀಯ್:
ವಿಧವ್‌ಪಣ್ ಸಮಸ್ಯಾ ನ್ಹಯ್, ಏಕ್ ಪರಿಗತ್!
ಸ್ತ್ರೀಯೆಚ್ಯಾ ಅಸಹಾಯಕ್‌ಪಣಾಚೆರ್ ಫಾಯ್ದೊ ಉಟಂವ್ಚಿ ಏಕ್ ಕವಿತಾ ಹಾಂಗಾಸರ್ ಆಮಿ ದಿಲ್ಯಾ. ವಿಧವ್‌ಪಣ್ ಸಮಸ್ಯಾ ನ್ಹಯ್, ಏಕ್ ಪರಿಗತ್. ಪುಣ್ ವಿಧವ್‌ಪಣಾಚ್ಯಾ ಪರಿಗತೆನ್ ಉಬೆ ಕರ್‍ಚೆ ಸಮಸ್ಯಾಂಚೆ ಪಾಗೊರ್ ಅಪಾರ್. ಆಯ್ಚ್ಯಾ ಸಂಸಾರಾಚ್ಯಾ ಸಮಸ್ಯಾಂ ಪಯ್ಕಿ ವಿಧವ್‌ಪಣ್ ಖಂಯ್ಸರ್ ಉರ್‍ತಾ ಆನಿ ಆಯ್ಚಿ ಸಮಾಜ್ ವಿಧ್ವಿಕ್ ಖಂಯ್ಚೆ ನದ್ರೆನ್ ಪಳೆತಾ ಮ್ಹಣ್ಚಿಂ ಸವಾಲಾಂ ವೆಗ್ಳಿಂಚ್ ದವರ್‍ನ್, ಹಿ ಸಮಸ್ಯಾ ಆಮ್ಚೆ ಸಮಾಜೆಂತ್ ಸಂಪೂರ್ಣ್ ರಿತಿನ್ ಹುಮ್ಟುನ್ ವಚೊಂಕ್ ನಾ ಮ್ಹಳ್ಳಿ ಹಕೀಗತ್ ಆಮಿ ಮಾಂದುನ್ ಘೆತ್ಲಿ ಜಾಲ್ಯಾರ್, ಹಿ ಕವಿತಾ ಆಪುರ್ಬಾಯೆಚಿ ಝಳ್ಕತಾ.
ಸಗ್ಳೆ ಕವಿತೆಂತ್ ದುಸ್ರ್ಯಾ ಕಡ್ವ್ಯಾಂತ್, ನೆಂಟ್ಯಾ ಭುರ್ಗ್ಯಾಂನಿ ಆಪ್ಲೆ ಆವಯ್ಕ್ ನೆಟಂವ್ಚಿ ಜಿ ಇಮಾಜ್ ಉಬಿ ಜಾಲ್ಯಾ ತಾಚಿ ಕಿತ್ಲಿ ತೋಖ್ಣಾಯ್ ಕೆಲ್ಯಾರಿ ಉಣಿಂಚ್.
ಕ್ಲಾರಾ ಫೆರ್ನಾಂಡಿಸ್ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರ್ ಸಜಂವ್ಕ್ ಆಯ್ಲ್ಯಾ. ತಿಕಾ ಉಲ್ಲಾಸಾಚೊ ಯೆವ್ಕಾರ್ ದಿತಾನಾ, ಚಡಿತ್ ಮಾಪಾನ್ ಸ್ತ್ರೀಯಾಂನಿ ತಶೆಂ ಚಲಿಯಾಂನಿ ಹಾಂಗಾಸರ್ ರಾವೊಂಕ್ ಯೇಜಾಯ್ ಮ್ಹಣ್ ಆಮಿ ಉಲೊ ದಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವಿಧವ್
ಧವೆಂ ಕಾಪಡ್ ಹಾಂವ್ ನ್ಹೆಸ್ತಾಂ
ಗೊಮ್ಟೊ ಮ್ಹಜೊ ರಿತೊ ಆಸ್ತಾ
ಕಪಾಲ್ ಮ್ಹಜೆಂ ತಿಳೊ ಆಶೆತಾ
ಶೆಂಡೊ ಮ್ಹಜೊ ಫುಲಾಂಕ್ ಆಂವ್ಡೆತಾ
ಹಾಂವ್ ಏಕ್ ವಿಧವ್!
ಭುರ್ಗಿಂ ಮ್ಹಜಿಂ ನೆಂಟಿಂ ತರೀ
ಖೆಳ್ಟಾ ಖೆಳ್ಟಾನಾ ತಿಳೊ ಲಾಯ್ತಾತ್
ಶೆಂಡೊ ಮ್ಹಜೊ ಸುಂರ್ಗಾರಾಯ್ತಾತ್
ಕಿತೆಂ ಸಾಂಗೊಂ ಹಾಂವ್ ತಾಂಕಾಂ
ಹಾಂವ್ ಏಕ್ ವಿಧವ್!
ದಾದ್ಲೆ ಮ್ಹಾಕಾ ಪಳೆತಾನಾ ಆಂಯ್ಡೆ ಗಳಯ್ತಾತ್
ಮೊಲಾಧಿಕ್ ಕಾಣಿಕೊ ಧಾಡ್ತಾತ್
'ಆಸ್ರೊ ಆಮಿ ತುಕಾ ದಿತಾಂವ್' ಮ್ಹಣ್ತಾತ್
ಕಾಜಾರಿ ಸಾಕ್ರಾಮೆಂತಾಂತ್ ಎಕ್ವಟೊ೦ಕ್ ಆಶೆನಾಂತ್
ಕಿತ್ಯಾಕ್? ಹಾಂವ್ ಏಕ್ ವಿಧವ್!
-ಕ್ಲಾರಾ ಫೆರ್ನಾಂಡಿಸ್