ಸಂಪಾದಕೀಯ್:
ದೊಗಾಂಕ್ ರಖಮ್ ಮೆಳ್ತಾನಾ ತಿಸ್ರ್ಯಾನ್ ಜಕ್ಮಿ ಜಾಯ್ಜಾಯ್ ಪಡ್ತಾ
ಘೊಡ್ಯಾಚೆಂ ಕಾಮ್ ಧಾಂವ್ಚೆಂ. ಧಾಂವ್ಚೆ ಪಾಟ್ಲೊ ಶೆವೊಟ್ ಕಿತೆಂ ಮ್ಹಣೊನ್ ತಾಕಾ ಕೆದಳಾಯ್ ಕಳಿತ್ ಜಾಯ್ನಾ. ತೊ ಧಾಂವ್ಚ್ಯಾ ರೇಸಾಂತ್ ಜಿಕ್ತಾ ಯಾ ಸಲ್ವತಾ ಮ್ಹಳ್ಳೇಂಯ್ ತಾಕಾ ಸಮ್ಜನಾ. ಘೊಡೆ ಧಾಂವ್ಡಾಂವ್ಚ್ಯಾ ಜ್ಯಾಕಿಚೆ ಮಾರ್ ಖೆಲ್ಯಾರ್, ಆನಿಕೀ ವೆಗಾನ್ ಧಾಂವ್ಚ್ಯಾಕ್ ತಾಕಾ ಪ್ರೇರಣ್ ಲಾಭ್ತಾ ಆಸ್ಯೆತ್ - ದುಕಿ ಮಧೇಂಯ್.
ಹಿ ದೂಕ್, ಹೊ ಖೆಳ್, ಹೊ ಭೊಂಗೊಸ್ತಳ್ ಕೊಣ್ ಕೊಣಾಖಾತೀರ್ ಕರ್‍ತಾ. ಹಿ ಕೊಣಾ ಜಿವಿತಾಚೆರ್ ಕೊಣೆ ಖೆಳ್ಚಿ ಜುಗಾರ್? ದೊಗಾಂ ಮದ್ಲ್ಯಾ ನ್ಯಾಯಾಕ್ ತಿಸ್ರ್ಯಾಕ್ ಆದಾಯ್ ಮ್ಹಣೊನ್ ಆಮಿ ಸಮ್ಜೊಂಚೆಂ ಆಸಾ. ಪುಣ್ ಹಾಂಗಾಸರ್ ಸಮಾ ಉಳ್ಟೆಂ ಘಡ್ತಾ. ದೊಗಾಂಕ್ ಆದಾಯ್, ತಿಸ್ರ್ಯಾಕ್ ಘಾಯ್ ಯಾ ದೊಗಾಂಕ್ ರಖಮ್, ತಿಸ್ರೊ ಜಕಮ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಿಣ್ಯೆ ವಿಪರ್ಯಾಸ್
ಜಾಕಿನ್ ಮಾರ್‍ಚ್ಯಾ ಮಾರಾಂಕ್ ,
ರೇಸಾಚೊ ಘೊಡೊ ಧಾಂವ್ತಾ.
ಜಿಕ್ಲ್ಯಾರ್ ವ ಸಲ್ವಲ್ಯಾರಯ್
ತಾಕಾ ಖಂಯ್ ಕಳ್ತಾ?
ಸಂತೊಸ್ ಕೊಣಾಕ್? ದೂಕ್ ಕೊಣಾಕ್?
ಜೀಕ್ ಕೊಣಾಕ್ ಲಾಬ್ತಾ?
ಜಾಕಿಕ್, ಘೊಡ್ಯಾಕ್ ವ ಧನ್ಯಾಕ್?
ಕೊಣಾಕ್ ಖೆಳ್? ಕೊಣಾಚೊ ಭೊಂಗೊಸ್ತಳ್?
ಪಾಜೆ ಫಾತ್ರಾಕ್ ಆಕಾರ್ ದೀವ್ನ್
ಪೂಜಾಚೆಂ ಸಾಧನ್ ಜಾತಾನಾ
ಥೊಡೆ ಫುಲಾಂಕ್ ಕಪಾತ್ ಕರ್‍ತಾತ್
ಥೊಡೆ ಮನ್ಶಾ ರಗತ್ ವೊತ್ತಾತ್
ಥೊಡೆ ದೂಧ್ ವೊತುನ್ ರಡ್ತಾತ್
ಥೊಡೆ ಉಜ್ವಾಡಾ ಆಯೆರ್ ದಿತಾತ್
ಪುಣ್ ಫಾತರ್ ತೊ ಕಿತೆಂ ಜಾಣಾಂ?
ಫಾತರ್ ತೊ ನೋಟ್ ಛಾಪುಂಕ್ ನೆಣಾಂ!
ಆಪ್ಲಿಂ ಫಿತಿಸ್ಪಣಾಂ ವಿಕ್ರಾಪಾಕ್ !
ಚಿಂತ್ಪಿ -ಶಿಕ್ಪಿ ಸಾದೊ ಬರವ್ಪಿ ಜಾವ್ನ್
ಫಾತ್ರಾಕ್ ಪಾಯ್ ಉಕಲ್ಚ್ಯಾ
'ಪೆಟ್ಯಾಕ್ ’ ಕಿತ್ಯಾಕ್ ದುರ್ಸನಾ?
ಮ್ಹಾಡ್ಡುಲ್ಯಾನ್ ’ಮಿನಿ ಸ್ಕರ್ಟ್’ ಘಾಲ್ಯಾರೀ ,
ಕಿತ್ಯಾಕ್ ಖೆಳ್ಕುಳಾಂ ಕರಿನಾ?
ದೆವಾಚಿ ಆಶಾ ದಾಕವ್ನ್
ಧರ್ಮಾ ಪಾಟ್ಲ್ಯಾನ್ ವೆತಲ್ಯಾಕ್
ಕಿತ್ಯಾಕ್ ತಾಕಾ ಸೊಸನಾ?
ದೆವಾಕ್ ಆಕಾರ್ ಸಂಸಾರಿ "ವಸ್ತುಂಚೆಂ" ಜಾಯ್?
ದೆವಾಚಿ ತಸ್ವೀರ್ ಕೊಣೆಂ ಕಾಡ್ಲ್ಯಾ ಗಾಯ್?
ಬರವ್ಪ್ಯಾಂಕ್ "ಸರ್ಗ್" ನಾಕಾಗೀ? ವ
ಸರ್ಗ್ "ಕಿತೆಂ?" ತೊ ಜಾಣಾಂ?
"ಮರಣ್"- ಚಿಂತಪ್ ನಾತ್‌ಲ್ಲ್ಯಾಕ್
ಸದಾಂ ಆಪ್ಲ್ಯಾ ಖಾಂದಾರ್ ಆಸ್ತಾ
"ಮರಣ್" -ಪೆಲ್ಯಾಚೆಂ ಜಿಣ್ಯೆ ಸತಾಂ
ಆಮ್ಕಾಂ ವಾಂಚೊಂಕ್ ಶಿಕಯ್ತಾ
ಮರೊಂಕ್ ಆಸಾ ಸರ್ವಾಂಕ್,
ಜಿಯೆವ್ನ್ ದಾಕಂವ್ಚಿ ಗರ್ಜ್
ಮರೊನ್ ವಾಂಚ್ತಲೊ ಮನೀಸ್
ಆಮರ್ ಜಾತಲೊ ಉಂಡಾಂತ್
ಪೊಕೊಳ್ ಮನಿಸ್, ಕ್ರತ್ಯಾಂನಿ ಮೆಲ್ಲೊ
ಸಾರೆಂ ಜಾತಲೊ ಸಿಮಿಸ್ತ್ರಿಂತ್ ಫೊಂಡಾಂತ್.
- ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್
संपादकीय:
दोगांक रखम मेळताना तिसऱ्यान जकमी जायजाय पडता
घोड्याचें काम धांवचें. धांवचे पाटलो शेवोट कितें म्हणोन ताका केदळाय कळीत जायना. तो धांवच्या रेसांत जिकता या सलवता म्हळ्ळेंय ताका समजना. घोडे धांवडांवच्या ज्याकिचे मार खेल्यार, आनिकी वेगान धांवच्याक ताका प्रेरण लाभता आसयेत - दुकी मधेंय.
ही दूक, हो खेळ, हो भोंगोस्तळ कोण कोणाखातीर करता. ही कोणा जिविताचेर कोणे खेळची जुगार? दोगां मदल्या न्यायाक तिसऱ्याक आदाय म्हणोन आमी समजोंचें आसा. पुण हांगासर समा उळटें घडता. दोगांक आदाय, तिसऱ्याक घाय या दोगांक रखम, तिसरो जकम.
-मेल्विन रोड्रीगस
कविता:
जिणये विपर्यास
जाकिन मारच्या मारांक ,
रेसाचो घोडो धांवता.
जिकल्यार व सलवल्यारय
ताका खंय कळता?
संतोस कोणाक? दूक कोणाक?
जीक कोणाक लाबता?
जाकीक, घोड्याक व धनयाक?
कोणाक खेळ? कोणाचो भोंगोस्तळ?
पाजे फातराक आकार दीवन
पूजाचें साधन जाताना
थोडे फुलांक कपात करतात
थोडे मनशा रगत वोत्तात
थोडे दूध वोतून रडतात
थोडे उजवाडा आयेर दितात
पुण फातर तो कितें जाणां?
फातर तो नोट छापूंक नेणा
आपलीं फितिसपणां विकरापाक !
चिंतपी -शिकपी सादो बरवपी जावन
फातराक पाय उकलच्या
पेट्याक कित्याक दुरसना?
म्हाड्डुल्यान मिनी स्कर्ट घाल्यारी ,
कित्याक खेळकुळां करिना?
देवाची आशा दाकवन
धर्मा पाटल्यान वेतलयाक
कित्याक ताका सोसना?
देवाक आकार संसारी "वस्तुंचें" जाय?
देवाची तस्वीर कोणें काडल्या गाय?
बरवप्यांक "सर्ग" नाकागी? व
सर्ग "कितें?" तो जाणां?
"मरण"- चिंतप नातल्ल्याक
सदां आपल्या खांदार आस्ता
"मरण" -पेल्याचें जिणये सतां
आमकां वांचोंक शिकयता
मरोंक आसा सरवांक,
जियेवन दाकंवची गर्ज
मरोन वांचतलो मनीस
आमर जातलो उंडांत
पोकोळ मनीस, क्रत्यांनी मेल्लो
सारें जातलो सिमिस्त्रींत फोंडांत.
- लॅन्सी पिंटो नायक, कुलशेकर