ಸಂಪಾದಕೀಯ್:
ಹೊ ರಾಯ್, ಕಟ್ಟಿ ದಾಂಡೊ ಘೆವ್ನ್ ಭೊಂವ್ತಾ.
ಹೊ ಮೊಗಾಚೊ ರಾಯ್. ಕಾಳ್ಜಾಂತ್ ಗಿರೇಸ್ತ್. ಮೊಗಾಂತ್ ಗಿರೇಸ್ತ್. ಪುಣ್ ಭುಕೆಚೆ ಮೊಡ್ಕೆಂತ್ ಕಾಂಯ್ ನಾ. ಮೆಳ್‌ಲ್ಲೆಂಯ್ ಹಾತ್ ಚುಕೊನ್ ವೆಚಿ ಗತ್ ಹ್ಯಾ ಮೊಗಾಚ್ಯಾ ಭಿಕಾರ್‍ಯಾಚಿ. ಹೊ ಮಾಸಾಂ ಪಕ್ವಣಾಂಕ್ ಆಶೆನಾ, ಫಕತ್ ನೀಸ್ ಪುರೊ ತಾಕಾ. ತರೀ ಹ್ಯಾ ನಿಸಾಕ್ ತುರ್ಪಣ್‌ಕಾಯ್. ಹಾಣೆ ಮೊಗಾಕ್ ಜೊಡುಂಕ್, ಆಸ್‌ಲ್ಲಿಂ ನಗಾಂ, ಸುವರ್ಣಾಂಚೆ ಕೊಳ್ಶೆ, ಭಾಂಗರ್ ಸಗ್ಳೆಂ ಆಡವಾಕ್ ದವರ್‍ಲಾಂ. ಪಾಟಿಂ ಮೆಳತ್ ಮ್ಹಳ್ಳಿ ಗ್ಯಾರಂಟಿ ನಾ.
ಮೋಗ್ ಅಸೋಚ್! ಪಿಸೊ ಪಿಸೋಚ್! ತಾಕಾ ಆವಯ್ ಬಾಪಯ್ ಆಸನಾಂತ್! ಮೊಗಾಂತ್ ಕೊಣ್ ಹಾರ್‍ವತಾ, ತಾಂಕಾಂ ಕಟ್ಟಿ ದಾಂಡೊಚ್ ಗತ್. ಆನಿ ತಸಲಿ ಏಕ್ ಕವಿತಾ ಬೋವ್ ಆಪುರ್ಬಾಯೆನ್ ಕವಿ ಎಚ್ಚೆಮ್ಮಾನ್ ಹಾಂಗಾಸರ್ ಸಾದರ್ ಕೆಲ್ಯಾ.
ಉತ್ರಾಂಚಿ ಮಾಂಡಾವಳ್ ಎಕೆ ಕವಿತೆಚೆ ಬಾಂದಾವಳಿ ಭಿತರ್ ಬೋವ್‌ಚ್ ಜೊಕ್ತೆ ರಿತಿನ್ ಪಾಶಾರ್ ಜಾವ್ನ್ ವೆತಾ. ಕೊಂಕಣಿಕ್ ಅತ್ವೊಚ್ ಏಕ್ ಪ್ರಯೋಗ್ ಎಚ್ಚೆಮ್ಮಾಚೊ. ಹ್ಯಾ ಪ್ರಯೋಗಾವರ್‍ವಿಂ ಕೊಂಕಣಿ ಮಾತ್ರ್ ನ್ಹಯ್, ಎಚ್ಚೆಮ್ ಸೈತ್ ಗಿರೇಸ್ತ್ ಜಾಲಾ. ಎಚ್ಚೆಮ್ಮಾನ್ ಯೆದೊಳ್‌ಚ್ ದೋನ್ ಕವಿತಾ ಪುಸ್ತಕಾಂ ಕೊಂಕಣಿ ಪರ್ಜೆಕ್ ದಿಲ್ಯಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಾಯಾಚೆಂ ರಡ್ಣೆಂ
ಹಾಂವ್‌ಗೋ ಪಡ್ಪಶಿ ದಿತಾನಾ ಸಳ್ ಕರ್‍ನ್
ನಾಕಾ ಮ್ಹಣೊನ್ ಆತಾಂ ರಡೊನ್ ಬಸ್ಲಾಂ
ಹಟ್ಟಿ ಭುರ್ಗ್ಯಾಂಪರಿಂ. ಅರ್ಧಿ ಭಾಕ್ರೀಯ್ ಹಾತ್ ಚುಕೊನ್
ಗೆಲಿಗೊ ಮ್ಹಜಿ - ತುಜ್ಯಾ ಮೊಗಾಂತ್ಲಿ
ತುಜ್ಯಾ ಗಾಂವಾಂತ್ ನಂಯೊಂ ವ್ಹಾಳ್ತಾತ್
ಮ್ಹೊಂವಾಚ್ಯೊ, ಪಾವ್ಸ್ ವೊತ್ತಾ ತುಪಾಚೊ
ಮ್ಹಜಿ ತರ್ ತಾನ್ ಥೆಂಬೊ ನಿಸಾಚಿ
ಮೀಟ್ ಚಾಕ್ಲಾಂಗೋ ಹಾಂವೆ - ತುಜ್ಯಾ ಮೊಗಾಂತ್ಲೆಂ
ತುಜ್ಯಾ ರಾವ್ಳೆರಾಂತ್ ನವ್ಕರಾಂಕ್‌ಯ್ ರಸ್ಮಾಂ
ಕಾಪ್ಡಾಂ, ವಜ್ರಾಂ ಶೃಂಗಾರಾಂ, ಆಂಗ್ಲಿಂ
ಮ್ಹಜಿಂ ಆಡವ್ ಸರಫಾಂತ್ - ಹಾಂವ್‌ಗೋ
ನಾಗ್ಡೊಂ ಆತಾಂ - ತುಜ್ಯಾ ಮೊಗಾಂತ್
ತುಜ್ಯಾ ಮೊಗಾಂತ್ ಹಾಂವ್ ಪಿಸೊ, ಉಪಾಶಿಂ
ನಾಗ್ಡೊಂ ದೆಕುನ್ ಹ್ಯಾ ಗಾಂವಾಂತ್ ಚೊರಾಂಕ್ ಪಾಟ್
ಆನಿ ಪರ್ಜೆಚ್ಯಾ ಹಾತಾಂತ್ ಕಟ್ಟಿ ದಾಂಡೊ
ಉರ್‍ಲ್ಯಾ ನಿರ್ಜನ್ ವಾಟ್!
-ಎಚ್ಚೆಮ್, ಪೆರ್ನಾಲ್