ಸಂಪಾದಕೀಯ್:
ಪ್ರಕೃತಿಚೊ ಮೋಗ್ ಕರ್‍ತಲ್ಯಾಂಕ್ ದಾಢ್ ಘಾಲ್ಚಿಂ ಸವಾಲಾಂ ಸಭಾರ್!
ಕವಿ ದಿಸಾಚಿಂ ಚೊವೀಸ್ ವೊರಾಂಯ್ ವೊಡ್ತಾಂ-ಹಿತ್ಲಾಂನಿ, ರಾನಾ-ಮೊಲ್ಯಾಂನಿ ಭೊಂವುನ್ ಆಸಾ ಆನಿ ಪಾಸಾಯೊ ಮಾರೀತ್ ಆಸಾ ತರ್ ತಾಚೆ ಮತಿಕ್ ರೆವೊಡ್ ಘಾಲ್ಚ್ಯಾ ಸವಾಲಾಂಚಿಂ ಸೆಂಪಲಾಂ ವೆಗ್ಳಿಂಚ್ ಆಸ್ತಾತ್. ತಿಂ ಸಾದ್ಯಾ ಮನ್ಶಾಚೆ ಮತಿಕ್ ಸುಸ್ತನಾಂತ್. ತಶೆಂ ಜಾಲಾಂ ಹೆ ಕವಿತೆಂತ್!
ವೇಳ್ ಸಕಾಳಿಂಚೊ ಸರ್‍ವಾಂನಿ ಪಳೆಲಾ. ದಫ್ತರ್, ಕಾರ್ಖಾನೊ ಆನಿ ಹೆರ್ ಸುವಾತ್ಯಾಂನಿ ಘೊಳ್ತಲ್ಯಾಂಕ್ ತಶೆಂ ಮಜ್ದೂರಿ ಕರ್‍ತಲ್ಯಾಂಕ್ ಸಕಾಳಿಂಚ್ಯಾ ವೆಳಾ ಕಸಲಿಂ ಸವಾಲಾಂ ಯೇಂವ್ಕ್ ಸಾಧ್ಯ್ ಆಸಾತ್? ಕಾಮಾಕ್ ವೇಳ್ ಜಾಲೊ ಮ್ಹಣ್ಚ್ಯಾ ಆಕ್ಲಾಸಾಂನಿ ಕಿತ್ಲೆಶೆ ಸಕಾಳ್ ಆಮ್ಚೆ ನಾಂವ್ ನಾಸ್ತಾಂ ವೆತಾತ್. ನಿದೆಚ್ಯಾ ದೊಳ್ಯಾಂಕ್ ಖಾಡುಂ ಘಾಲುನ್ ಕಾಮಾಕ್ ಧಾಂವ್ಚ್ಯಾ ಆಮ್ಚೆ ಪಯ್ಕಿಂತ್ಲ್ಯಾ ಕಿತ್ಲ್ಯಾ ಜಣಾಂನಿ ಸಕಾಳಿಂಚ್ಯಾ ಮೊಳ್ಬಾರ್ ತರ್‍ನ್ಯಾ ವ್ಹರೆತಾ ಬರಿ ಸೊಭ್ಚೊ ಸುರ್ಯೊ ಪಳೆಲಾ?
ಕಿತ್ಲೆಶ್ಯಾ ಜಣಾಂಕ್ ಚ್ಯಾರ್ ವೊಣ್ತಿಂ ಭಾಯ್ಲೊ ಸಂಸಾರ್ ಪಳೆಂವ್ಕ್‌ಚ್ ಅಸಾಧ್ಯ್ ಜಾಲ್ಲ್ಯಾ ಹ್ಯಾ ಕಾಳಾರ್ ಹಿ ಕವಿತಾ ವೆಗ್ಳೊಚ್ ಏಕ್ ಅನ್ಬೋಗ್ ದಿಂವ್ಚ್ಯಾಂತ್ ನವಲ್ ನಾ. ಕವಿ ಮನು ಬಾಹ್ರೇನ್ ಪ್ರಕೃತಿಚೊ ಕವಿ. ಪ್ರಕೃತಿಚ್ಯಾ ಹರ್ ಜೀವಿಂಕ್ ಲಾಗ್ಶಿಲ್ಯಾನ್ ವೊಳ್ಕುಂಚೊ ಕವಿ. ತಾಂಚೊ ಮೋಗ್ ಕರ್‍ಚೊ ಕವಿ. ತಾಚಿ ಹ್ಯಾ ಆದೀಂಯ್ ಏಕ್ ಕವಿತಾ ಆಮಿ ಪರ್ಗಟ್ ಕೆಲ್ಯಾ. ಹಿ ತಾಚಿ ಕವಿತಾ ಫುಡಾರಾಂತ್ಲಿ ತುಮ್ಚಿ ಸಕಾಳ್ ಭಾಗಿ ಕರುಂ ಅಶೆಂ ಆಮಿ ಆಶೆತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಕಾಳಿಂಚೊ ವೇಳ್
ಭಾಗಿಂತ್ಲ್ಯಾ ಸೊಭಿತ್ ಫುಲಾಂಚೊ
ಪರ್ಮಳ್ ಸುಗಂಧ್ ವ್ಹಾಳ್ತಾ
ಸುರ್ಯಾಚಿಂ ಕಿರ್ಣಾಂ ಪಡ್ತಾನಾ
ಸೊಭಾಯ್ ತಾಂಚಿಂ ಚಡ್ತಾ
ಭೊಂವರ್ ಎಕ್ಲೊ ಭೊಂವುನ್ ಘುಂವೊನ್
ತಾಂಚೆರ್ ಯೇವ್ನ್ ಬಸ್ತಾ
ಅಮೃತ್ ತುಮ್ಚೆಂ ಚಿಂವೊನ್ ಫುಲಾಂನೊ
ಮ್ಹೊಂವಾ ಪೊಳಿ ಬಾಂದ್ತಾ
ಭಾಗಿಂತ್ಲ್ಯಾ ರಂಗ್‌ರಂಗಾಳ್ ಫುಲಾಂಕ್
ಕೊಣೆ ನಾಂವಾಂ ದಿಲ್ಯಾಂತ್?
ಸಕಾಳಿಂಚ್ಯಾ ಥಂಡ್ ಥಂಡ್ ವಾರ್‍ಯಾಕ್
ಕಿತ್ಯಾಕ್ ತುಮಿ ಫುಲ್ತಾತ್?
ಸಾಂಜೆಚೊ ವೇಳ್ ತೊ ಯೆತಾನಾ
ಫುಲಾಂನೊ ಕಿತ್ಯಾಕ್ ಬಾವೊಂಕ್ ಲಾಗ್ಲ್ಯಾತ್?
ಚಾಂದ್ನ್ಯಾಚ್ಯಾ ಉಜ್ವಾಡಾಕ್ ತುಮಿ
ನಿದೊನ್ ಕಿತ್ಯಾಕ್ ಪಡ್ಲ್ಯಾತ್?
ರಾನಾಂತ್ ಉಡಿ ಮಾರ್‍ಚ್ಯಾ ಮಾಂಕ್ಡಾಂನೊ
ಸುರ್ಯೊ ಉದೆವ್ನ್ ಆಯ್ಲೊ
ಭಾಂಗ್ರಾಳ್ಯಾ ಕಿರ್ಣಾಂಚ್ಯಾ ಪರ್ಜಳಾಕ್
ಕಾಳೊಕ್ ಧಾಂವೊನ್ ಗೆಲೊ
ಕೊಂಡಾಂತ್ಲ್ಯಾ ಮಾಸ್ಳ್ಯಾಂನೊ
ಉಬೊನ್ ವೆಚ್ಯಾ ಸುಕ್ಣ್ಯಾಂನೊ
ಮೋರ್ ನಾಚುಂಕ್ ಲಾಗ್ಲೊ
ಗ್ಹೀಳ್ ದಿಂವ್ಚ್ಯಾ ಹಸ್ತಿಂನೊ
ಧಾಂವೊನ್ ವೆಚ್ಯಾ ಚಿತ್ಳಾಂನೊ
ಸಕಾಳಿಂಚೊ ವೇಳ್ ಜಾಲೊ
-ಶ್ರೀ ಮನು ಬಾಹ್ರೇನ್