ಸಂಪಾದಕೀಯ್:
ಜಿವಿತಾಂತ್ಲ್ಯಾ ಸರ್ವಯ್ ಖೆಳಾಂಕ್ ಆರ್ಸೊ ಧರ್‍ಚಿ ಕವಿತಾ
ಹರ್‍ಯೆಕ್ ಜಲ್ಮಾಕ್ ಆಯಿಲ್ಲ್ಯಾ ಜಿವಾಕ್ ತಾಚಿಚ್ ಮ್ಹಳ್ಳಿ ಅಸ್ಮಿತಾಯ್ ಆಸಾ. ಜಾವ್ಯೆತ್ ಹೊ ಜೀವ್ ಸಗ್ಳ್ಯಾ ಸಂಸಾರಾಕ್ ವೊಳ್ಕಿಚೊ; ಜಾವ್ಯೆತ್ ಹೊ ಜೀವ್ ಆಪ್ಲ್ಯಾಚ್ ಗಾಂವಾಂತ್ ಅನ್‌ವೊಳ್ಕಿಚೊ. ಜಾವ್ಯೆತ್ ಹೊ ಜೀವ್ ಆಯ್ಚ್ಯಾ ದಿಸಾ ಅಂತ್ರಳಾರ್, ದುಸ್ರ್ಯಾ ದಿಸಾ ತಾಚ್ಯಾ ಕರ್‍ತುಬಾಂಕ್ ಲಾಗೊನ್ ಪಾತಾಳಾಂತ್. ಆಯ್ಚೊ ತುಜೊ ದೀಸ್, ಫಾಲ್ಯಾಂಯ್ ತುಜೋಚ್ ಮ್ಹಣ್ಚಿ ಹಮಿದಾರಿ ಕಿತ್ಲ್ಯಾ ಜಣಾಂಕ್ ಆಸಾ? ಫಾಲ್ಯಾಂಚೊ ದೀಸ್ ಮ್ಹಜೊ ಕಿತ್ಯಾಕ್ ಜಾಂವ್ಕ್ ನಜೊ?
ಹಾಂಗಾಸರ್ ಸುರ್ಯಾಚಿ ಪ್ರತಿಮಾ ಘೆವ್ನ್ ಕವಿಕ್ ಜೊ ವಿಷಯ್ ಸಾದರ್ ಕೆಲಾ, ತಾಂತುಂ ಹ್ಯಾ ಜಿವಿತಾಂತ್ಲೆ ಖೆಳ್ ಸಗ್ಳೆ ಆಟಾಪ್ಲ್ಯಾತ್. ಹೆ ಕವಿತೆಚಿ ಸಕತ್ ತಿತ್ಲೀಯ್ ವಿಶೇಸ್. ಅನಿಲ್ ಪೆರ್ನಾಲ್ ದುಸ್ರೆ ಪಾವ್ಟಿಂ 'ಕವಿತಾ ಕುಳಾರ್' ಸಜಂವ್ಕ್ ಯೆತಾನಾ, ಭರ್ಮಾನ್ ಆಯ್ಲಾ, ಆದ್ಲಿಂ ದುಬ್ಳಿಕಾಯೆಚಿಂ ಪಾಕಾಂ ಪಾಪ್ಡುನ್, ಗಿರೇಸ್ತ್‌ಕಾಯೆಚೊ ಮುಕುಟ್ ಮಾಳುನ್ ಆಯ್ಲಾ.
ಆಮ್ಕಾಂ ಕವಿತೆಚೊ ಮೋಗ್ ಕರ್‍ತಲ್ಯಾಂಕ್ ಅಸಲ್ಯಾ ಕವಿಂಚೊ ಸಾಂಗಾತ್ ಜಾಯ್. ಅನಿಲ್ ಪೆರ್ನಾಲ್ ತಸಲ್ಯಾ ಕವಿಂಚೊ ಸಂಕೊ ಚಡ್ತಾನಾ, ಆಮ್ಚ್ಯಾ ಕಾವ್ಯ್ ಭೊಂವಾರಾಕ್ ಅದ್ಭುತ್ ರಂಗ್ ಯೆತಲೊ ಮ್ಹಣ್ಚ್ಯಾಂತ್ ನವಲ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಸ್ಮಿತಾಯ್
ತುಜ್ಯಾ ಆನಿ ಮ್ಹಜ್ಯಾ ಮಧೆಂ
ಮಯ್ಲಾಂಚೊ ಅಂತರ್
ತುಂ ಅಂತ್ರಳಾರ್
ಹಾಂವ್ ಧರ್‍ತೆರ್
ದೀಸ್‌ಭರ್ ಗೊಮ್ಟಿ ಉಕಲ್ನ್
ತುಜ್ಯಾ ದೊಳ್ಯಾಂಕ್
ದೊಳೆ ಮೆಳಂವ್ಕ್ ಪೆಚಾಡ್ಲೊಂ
ಪ್ರಕಾಸ್‌ಭರಿತ್ ದೊಳ್ಯಾಂಕ್
ಫುಡ್ ಕರ್‍ಚಿ ಸಕತ್
ಹ್ಯಾ ದೊಳ್ಯಾಂನಿ ನಾತ್ಲಿ
ತುಂ ಸಕ್ತೆವಂತ್
ಹಾಂವ್ ಅಸ್ಕತ್
ಉಡ್ಲೊಯ್ ಚಡ್ಲೊಯ್
ಗರ್‍ವಾನ್ ಫುಲ್ಲೊಯ್
ದಿಸಾಕ್‌ಯ್ ಆಸಾ ಅಂತ್ಯ್
ಸಾಂಜ್ ಪರ್‍ಯಾಂತ್ ಹಾಂವ್‌ಯ್ ರಾಕ್ಲೊಂ
ಮ್ಹಜ್ಯಾ ದೊಳ್ಯಾಂಚೆ ನಿಟಾಯೆಕ್
ಯೆತಾ ವರೆಗ್
ಆನಿ ಆಕ್ರೇಕ್....
ತಿ ಘಡೀಯ್ ಆಯ್ಲಿ
ವ್ಹಯ್....
ಸಾಂಜ್ ಜಾಲಿ
ಆತಾಂ ಆಮಿ ದೊಗೀ
ಸಮಾಸಮ್
ಗೊಮ್ಟಿ ಉಕಲ್ಚಿ ಗರಜ್ ನಾ
ಮುಖಾಮುಖಿಂ ಪಳೆವ್ಯೆತ್
ಹಾಂವ್ ಶಾಂತ್.....
ತುಂ ತಾಂಬ್ಸೊ
ದಿಸಾಚ್ಯಾ ಗರ್‍ವಾಕ್
ಲಜ್‌ಚೊ ರಂಗ್‌ಗೀ ನೆಣಾಂ
ತದೇಕ್ ದಿಷ್ಟಿನ್
ತುಕಾಚ್ ದೆಖ್ತಾಂ
ತುಂ ಮಾತ್ರ್ ದಿಷ್ಟಿ ಸಮೊರ್
ಗಳತ್ ವೆತಾಯ್
ಹಳೂ.. ಹಳೂ...
ಸಕಯ್ಲ್.. ಸಕಯ್ಲ್....
ಮಾಜ್ವತ್ ವೆತಾಯ್....
ಶಾಂತ್ ದರ್ಯಾಂತ್
-ಅನಿಲ್ ಪೆರ್ನಾಲ್