ಸಂಪಾದಕೀಯ್:
ಸಮಾಜೆಚ್ಯೊ ಶಿರೊ ಶಿಂದ್ಚಿ ಆಪುರ್‌ಬಾಯೆಚಿ ಕವಿತಾ
ಸಮಾಜೆಚ್ಯೊ ಶಿರೇನ್ ಶಿರೊ ಶಿಂದ್ಚಿ ಏಕ್ ಆಪುರ್‌ಬಾಯೆಚಿ ಕವಿತಾ ಹಾಂಗಾಸರ್ ಕವಿ ಸ್ಟೀವನ್ ಕ್ವಾಡ್ರಸಾಚ್ಯಾ ತಿಂತೆರಾಥಾವ್ನ್ ವ್ಹಾಳ್ಳ್ಯಾ. ಅಸಲೆಂ ಏಕ್ ಶಿಂದಪ್ ಜಾತಾನಾ ದುಡ್ವಾಚ್ಯಾ ಬಳಾನ್ ಮರ್ಯಾದ್ ಮೊಲಾಕ್ ಘೆಂವ್ಚೆ ಸಮಾಜೆಚೆಂ ಪಿಂತುರ್; ಕ್ರಿಸ್ತಾಂವ್ ಧರ್ಮಾನ್ ಅತ್ಮ್ಯಾಂಕ್ ಸಾಲ್ವಾಸಾಂವ್ ದಿಂವ್ಚ್ಯಾ ಇಂದುಲ್ಜೆನ್ಸಾಂಚಿಂ ಕಾಂಯ್ ಥೊಡಿಂ ಕುಯುಕ್ತ್ಯಾಂಚಿಂ ಕರ್‍ತುಬಾಂ ದೊಳ್ಯಾಂ ಮುಕಾರ್ ಬೋವ್‌ಚ್ ತಾಕ್ತೆನ್ ಕವಿನ್ ದವರ್‍ಲ್ಯಾಂತ್.
ಪೆರ್ಮುದೆಚೊ ಸ್ಟೀವನ್ ಕ್ವಾಡ್ರಸ್ ವೃತ್ತೆನ್ ಕೊಲೆಜಿಚೊ ಉಪನ್ಯಾಸಕ್. ಪುಣ್ ಚರಿತ್ರಾ ಮಾತ್ರ್ ತಾಕಾ ಮೊಗಾಚಿ ನ್ಹಯ್. ಕೊಂಕಣಿಚ್ಯಾ ಪಾಳ್ಣ್ಯಾಂತ್ಲ್ಯಾ ಬಾಳ್ಕಾಂಕ್ ಸದಾಂನೀತ್ ಧಲಂವ್ಚೆಂ ಬರೆಂ ಮನ್ ದಾಕವ್ಪಿ ಮನೀಸ್ ತೊ. ತಶೆಂ ಕರ್‍ತಾನಾ ತಾಕಾ ಹೆ ಕವಿತೆಂತ್ ಹಾತಾಳ್ಳಲ್ಯಾ ತಸಲಿಂ ಘಡಿತಾಂ ಆಪ್ಲ್ಯಾ ಭೊಂವಾರಾಂತ್ ಝಳ್ಕನಾಸ್ತಾಂ ರಾವನಾಂತ್ ಆನಿ ತಿಂ ತೊ ಚಮತ್ಕಾರಿಕ್ ರಿತಿನ್ ಕವಿತೆದ್ವಾರಿಂ ಫಿಛಾರ್ ಕರ್‍ತಾ.
ಸ್ಟೀವನಾನ್ ಆಯ್ಲೆವಾರ್ ಬರಯಿಲ್ಲ್ಯೊ ಕವಿತಾ ವಾಚ್ಲ್ಯಾ ಉಪ್ರಾಂತ್ ತಾಕಾ ಕವಿತಾ ಶೆತಾಂತ್ ಆಪ್ಣಾಚೆಂಚ್ ಖಳ್ ರುತಾ ಕರ್‍ಚಿ ಸಕತ್ ಆಸಾ ಮ್ಹಳ್ಳೆವಿಶಿಂ ಮ್ಹಾಕಾ ತರೀ ಖಂಡಿತ್ ಜಾಲಾಂ. 'ಮಾಯೆಗೋ ಯಶೋದಾ' ಹೆ ದಿಶೆನ್ ಏಕ್ ವ್ಹರ್‍ತಿ ಗೊವಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾಳ್ಣ್ಯಾ ಆಂಗ್ಡಿಂನಿ
ಪಾಳ್ಣ್ಯಾ ಆಂಗ್ಡಿಂನಿ ದೊರ್‍ಯೊ ಲಾಂಬ್ ಲಾಂಬ್
ಕುಶಿಂನಿ ಪಿಂಗೆಚಿಂ ಫಳಿಂ
ಮೊಲಾಚೆಂ ಜಾಯ್ ತರ್ ಬಿಟಿಚೆಂ ಫಳೆಂ
ಆನಿ ಆರ್‍ಸೋಯ್ ದವ್ರುಂಕ್ ಜಾತಾ
ಪಾದ್ರ್ಯಾಬ್ ಯೆತಾ ಸಕ್ಕಡ್ ಮಿಸಾಂಕ್
ಲೋಬ್ ನಿತಳ್ ಆಸ್ಲ್ಯಾರ್ ಜಾಲೆಂ
ವೊಲಾಕ್, ಕಾಜಾರಾಕ್ ಸಾಂತುತ್ಸಾವಾಂಕ್
ಆನಿ ಆಲ್ಮಾಂಚ್ಯಾ ಮಿಸಾಕ್
ಜಾಸ್ಮಿನ್ ಫುಲಾಂಚೊ ಪರ್ಮಳ್
ಸಾಡ್ಯಾರಿ ಸೊಭ್ತಾ, ಮೊಡ್ಯಾರಿ ಸೊಭ್ತಾ
ಭಿತರ್ ಕುಸ್ಡೆಂ ಕಿತ್ಲೇಂಯ್ ಭರುಂ
ಭಾಯ್ಲ್ಯಾನ್ ನಿತಳ್ ಧವ್ಶೆಂ ಧವ್ಶೆಂ ದಿಸ್ತಾ!
-ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ