ಸಂಪಾದಕೀಯ್:
ಭುರ್ಗ್ಯಾಂಚೆ ಶೆಗುಣ್ ಆನಿ ತಾಚೆರ್ ಗುಂಡಾ ಮವಾಲ್ಯಾಂಚಿ ದಾಢ್
ನವೆಂಬರ್ ಚೊವ್ದಾ ತಾರೀಕ್ ಆಮ್ಚ್ಯಾ ಭಾರತಾಂತ್ ಭುರ್ಗ್ಯಾಂಚೊ ದೀಸ್ ಮ್ಹಣೊನ್ ಮನಾಯ್ತಾತ್. ಹ್ಯಾ ದಿಸಾಕ್ ಮ್ಹಣೊನ್‌ಚ್ ಹಿ ಕವಿತಾ ಆಮಿ ಪರ್ಗಟ್ ಕೆಲ್ಯಾ.
ಲ್ಹಾನ್ ಭುರ್ಗಿಂ ಲ್ಹಾನ್‌ಪಣಾರ್ ಕೊಣಾಚೆ ನಂಯ್ತ್ ಉಪೆತಾತ್, ಕೊಣಾಚ್ಯಾ ವ್ಹಾಳಾಂತ್ ತಿಗುರ್ ಧರ್‍ತಾತ್, ಕೊಣಾಚ್ಯಾ ರಾನಾಂತ್ಲಿಂ ಜಾಂಬ್ಳಾಂ ಫಾರ್‍ತಾತ್ ಆನಿ ಪಾಟಿಚೆರ್ ತವಳ್ ತವಳ್ ರೊತಾಂಚೆ ಮಾರ್ ಖಾತಾತ್. (ಆಯ್ಚ್ಯಾ ಕಾಳಾರ್ ಹೆಂಚ್ ಸಾಂಗಪ್ ತಿಕ್ಕೆಶೆ ಘುಂವ್ಡಾವ್ನ್ ಸಾಂಗಜೆ ಪಡ್ತಾ, ಜಶೆಂ - ಲ್ಹಾನ್ ಭುರ್ಗಿಂ ಕೊಣಾಚ್ಯಾ ಬಾತ್ ಟಬ್ಬಾಂತ್ ಉಪೆತಾತ್, ಕೊಣಾಚ್ಯಾ ಫ್ರಿಡ್ಜಾಂತ್ಲಿಂ ಸೊಸೆಜಾಂ ಚೊರ್‍ತಾತ್, ಕೊಣಾಚ್ಯಾ ಎಸ್ಟೇಟಾಂತ್ಲಿಂ ....ಇತ್ಯಾದಿ). ಲ್ಹಾನ್‌ಪಣಾರ್ ಖಂಯ್ಚ್ಯಾ ಭೊಂವಾರಾಂತ್ ಭುರ್ಗಿಂ ವ್ಹಡ್ ಜಾತಾತ್, ಕೊಣಾಚ್ಯಾ ಪ್ರಭಾವಾಚೆ ಥೆಂಬೆ ಭುರ್ಗ್ಯಾಂಚೆರ್ ಪಡ್ತಾತ್, ತಸೋಚ್ ತಾಂಚೊ ಜಿನೊಸ್ ರೂಪ್ ಜೊಡುನ್ ಘೆತಾ.
ಆನಿ ಹೆ ಥೆಂಬೆ ಗೂಂಡಾ, ಮವಾಲ್ಯಾಂಚೆ ಜಾಲೆ ತರ್? ಆಪ್ಣಾಚೊ ಭುರ್ಗೋಯ್ ಗೂಂಡಾ ಮವಾಲಿ ಜಾಲೊ ತರ್?
ತಸಲೆ ಥೆಂಬೆ ಪಡ್ಚೆಚ್ ನಾಕಾ ಮ್ಹಳ್ಳಿ ಕಾವ್ಜೆಣಿ, ಭಿರಾಂತ್ ಹೆ ಕವಿತೆಂತ್ ಉಪೆತಾ. ಪಿ.ಜೆ. ಕರುಗಳ್ನಡೆ ಹಾಚೆ ಆದೀಂಯ್ ಕವಿತಾ ಕುಳಾರಾಂತ್ ಸೊಭಿತ್ ಕವಿತಾ ಘೆವುನ್ ಆಯ್ಲಾ. ಆತಾಂ ತಾಚೆ ಕವಿತೆದ್ವಾರಿಂ ಆಮಿ ಸರ್ವಯ್ ಭುರ್ಗ್ಯಾಂಕ್ 'ಏಕ್ ಭಾಗಿ ಭುರ್ಗ್ಯಾಂಚೊ ದೀಸ್' ಮಾಗ್ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಘಾಯೆಲ್ಲೆಂ ಲ್ಹಾನ್‌ಪಣ್
ಕಿರಾತ್ಯಾಚೊ ಕಸಾಯ್ ಜಾಯ್ತ್
ತುಜಿ ಯಾದ್ ಮ್ಹಾಕಾ ನಾಕಾ
ಲ್ಹಾನ್‌ಪಣಾಲೆ ದೀಸ್ ಮ್ಹಜೆ
ಮತಿ ಪಡ್ದ್ಯಾರ್ ನಾಕಾಚ್ ನಾಕಾ
ಮ್ಹಾರಾ ಕೊರ್ಗ್ಯಾ ಜಾತ್ ಜಾಯ್ತ್
ಮರ್ಯಾದ್ವಂತ್ ಕುಟಮ್ ನಾಕಾ
ಚ್ಯಾರ್ ಘರಾಂ ಮಾಗೊನ್ ಖಾವ್ಯೆತ್
ಪೊಟಾ ಭುಕ್ ಸೊಸುಂಕ್ ನಾಕಾ
ಕಿರಾ ಜಾತ್ ಸಗ್ಳಿ ಏಕ್‌ಚ್
ಪಾಟ್ಯಾ ಕಿರಾಕ್ ಊಂಚ್ ಜಾಗೊ
ಶಾಳೆಂತುಲ್ಯಾ ಬಾಂಕಾಂ ಮಧೆಂ
ಪಾಟೊ ನಾತ್ಲೊ ಕೀರ್ ವೊಗೊ
ಪಾಚ್ವ್ಯಾ ಪಾಕಾಂನಿ ಸೊಭ್ಚ್ಯಾ ಕಿರಾಕ್
ಮರ್ಯಾದ್ ಆಸಾ ತಾಚ್ಯಾ ಕೊರಾಂತ್
ಪಿಸ್ಡೊನ್ ಗೆಲ್ಲ್ಯಾ ಪಾಚ್ವ್ಯಾ ಕಿರಾಕ್
ಸೊಭ್ಚ್ಯಾ ಕಿರಾನ್ ಲೊಟ್ಲೆಂ ಕೊಂಡಾಂತ್
ಪೊಟಾ ಭುಕೆನ್ ಲಾಸ್ಚೆಂ ಮಾಜರ್
ಗೊರೊಜ್ ಮಾರಿ ರಾಗಾನ್ ಉಡಿ
ಖಬ್ರೆಕ್ ತಾಚೆ ಆಯ್ಲೆ ತರ್
ಕುಡಿರ್ ದಾವ್ಲಿ ತುಜೆ ವೊಡಿ
ಕಪಲಾ ದಿಲಾಂ ಬಿರುದಾಂ ಫಲಕ್
ಗುಂಡಾ ಮವಾಲಿ ತಾಚಿ ವೊಳಕ್
ಬಳಾನ್ ಕೆಲಾಂ ತಾಚೆರ್ ರಾಜ್
ಹಕ್ಕಾಂ ಖಾತೀರ್ ಮ್ಹಣೊನ್ ಝುಜ್
ಬಾಳಾ ಮತ್ ಫುಲಾ ಸಾರ್ಕಿ
ಗರೀಬ್‌ಪಣಾಕ್ ಚಿಡಾಯ್ನಾಕಾ
ತಾಚ್ಯಾ ಕಾಳ್ಜಾಕ್ ಭಾಲಿ ತೊಪುನ್
ಗುಂಡಾ ಮವಾಲಿ ವಾಡಯ್ನಾಕಾ
-ಪಿ.ಜೆ. ಕರುಗಳ್ನಡೆ, ಬಾರ್ಕುರ್