ಸಂಪಾದಕೀಯ್:
ಮಿರ್‍ಗಾಜಳಾಚ್ಯಾ ಬಿರ್‍ಮೆಂತಾ ಸಂಸಾರಾಂತ್ ಜಿಯೆತೆಲ್ಯಾಂಚಿ ಬಿರ್ಮತ್ ಪಾವಾ!
ಥೊಡೆಪಾವ್ಟಿಂ ಆಮಿ ಆಶೆಲ್ಲೆಂ ಜಾತಾ, ಆತ್ತಾಂ ಜಾತಾ ಮ್ಹಳ್ಳಿ ಭೃಮಿದ್ ಆಮ್ಕಾಂ ರೆವೊಡ್ ಘಾಲ್ನ್ ಆಸ್ತಾ ತರೀ ತೆ ಆಶೆಚಿಂ ಕುಪಾಂ ಮಾತ್ರ್ ಆಂಬ್ರಾಚೆರ್ ಮಾಂಡ್ತಾತ್ ಸೊಡ್ಲ್ಯಾರ್ ಪಾವ್ಸ್ ಖಿಣಾಕ್ ತರೀ ಶೆಣೊನ್ ವಚನಾತ್‌ಲ್ಲ್ಯಾವೆಳಾ ಆಮಿ ನಿರಾಶೆಚ್ಯಾ ಕೊಂಡಾಕ್ ಶೆವ್ಟತಾಂವ್. ಆಶೆಂವ್ಚೆಂ ಮನ್ಶಾ ಲಕ್ಷಣ್. ನಿರಾಶಾಯ್ ಮನ್ಶಾ ಲಕ್ಷಣ್. ಪುಣ್ ನಿರಾಶಾ ಜಾಲ್ಲ್ಯಾ ವೆಳಾ ಧರ್‍ತೆಕ್ ಶೆವ್ಟಲ್ಲ್ಯಾಂತ್ ಜಿವಿತಾಚೊ ಶೆವೊಟ್ ಪೊಂತಾಕ್ ಪಾಂವ್ಚ್ಯಾಂತ್ ಗಳಾಯ್ ಜಾತಾ. ಶೆವ್ಟಲ್ಲೊ ಉಟೊನ್ ಉಸ್ವಾಸ್ ಸೊಡ್ತಾನಾಂಚ್ ವೇಳ್ ಉತ್ರೊನ್ ವೆತಾ. ದೆಕುನ್ ಆಮಿ ಜಾಯ್ತೆ ಜಣ್ ಜಿವಿತಾಂತ್ ಹಾರ್‍ವತಾಂವ್.
ತಸಲೆಂ ಏಕ್ ಚಿಂತಪ್ ಹಾಂಗಾಸರ್ ಸಾದರ್ ಜಾಲ್ಲೆ ಕವಿತೆಂತ್ ಉದೆಲಾಂ. ಸುನಿಲ್ ಆಲ್ಫ್ರೆಡ್ ಫೆರ್ನಾಂಡಿಸ್ ಜಾಯ್ತೆಪಾವ್ಟಿಂ ದೇಶಾಂಚ್ಯಾ ರಾಜಕೀಯಾಚ್ಯೊ ಗಜಾಲಿ, ದುಬ್ಳಿಕಾಯೆಂತ್ ಶಿಜ್ಚ್ಯಾಂಚ್ಯೊ ಗಜಾಲಿ, ದಣ್ಸಲ್ಲ್ಯಾಂಕ್ ರೆವ್ಡಲ್ಲ್ಯಾ ಸಾಂಖ್ಳೆಂಚ್ಯೊ ಗಜಾಲಿ ಬರಯ್ತಾ ತರೀ ಹೆಪಾವ್ಟಿಂ ವೆಗ್ಳೊಚ್ ಸೊಭಿತ್ ವಿಷಯ್ ಘೆವ್ನ್ ಹಾಂಗಾಸರ್ ಆಯ್ಲಾ.
ರೆಂವೆಂತ್ ಜಿಯೆತಲ್ಯಾಂಕ್ ಮಿರ್‍ಗಾಜಳಾಚೊ ಬಿರ್‍ಮೆಂತಾ ಸಂಸಾರ್ ಕಾಂಯ್ ನವೊ ನ್ಹಯ್. ಹಾಂಗಾಸರ್ ತೊ ಕೊಣಾಲಾಗಿಂ ಉಲಯ್ತಾ ಮ್ಹಳ್ಳ್ಯಾ ಸವಾಲಾಕ್ ಕೆದಳಾ ಪಾಸುನ್ ಆಮಿ ಜಾಪ್ ಸೊಧಿನಾಂವ್ ತೆದೊಳ್ ಪಾಸುನ್ ಹಿ ಕವಿತಾ ವಾಚುಂಕ್ ಬರಿ ಲಾಗ್ತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭರ್ವಶ್ಯಾಚಿಂ ಕುಪಾಂ
ಸುಕಾಟ್ ವಾಳ್ವಟಾಂತ್ ಉದೆಲಿಂ
ಕುಪಾಂ ಭರ್ವಶ್ಯಾಚಿಂ
ಸುಕ್‌ಲ್ಲೆಂ ತಣ್ ನೀಟ್ ಜಾಲೆಂ
ಲಾಬ್ತಲಿ ಮ್ಹಣ್ ಥಂಡಾಯ್ ಪಾವ್ಸಾಚಿ
ಕುಪಾಂನಿ ಫಕತ್ ಕಾಳೊಕ್ ಹಾಂತ್ರಾಯ್ಲೊ
ಪುಣ್ ಝಡೊಂಕ್ ನಾ ಪಾವ್ಸ್
ಉಬೊನ್ ಗೆಲೆಂಯ್ ದಾಕವ್ನ್ ಆಶಾ
ಕೆಲೆಂಯ್ ತುಂವೆಂ ನಿರಾಶಾ
ತರಿ ಹಾಂವೆಂ ತುಜೊ ಪಾಟ್ಲಾವ್ ಕೆಲೊ
ದವರ್ನ್ ತುಜೆರ್ ಭರ್‍ವಸೊ
ದಿತಲೆಂಯ್ ಮ್ಹಣ್ ಸುಶೆಗ್
ವೊತುನ್ ಪಾವ್ಸ್ ಥಂಡಾಯೆಚೊ
ತುಜೊ ಪಾಟ್ಲಾವ್ ಕರ್ನ್
ಹಾಂವ್ ಸಗ್ಳೊಚ್ ಥಕ್‌ಲ್ಲೊಂ
ತುಕಾ ಆಪ್ಣಾಂವ್ಕ್ ಹಾಂವ್
ಸಂಪೂರ್ಣ್ ಸಲ್ವಲೊಂ
ಉರ್‍ಲೆಂಯ್ ತುಂ ಮ್ಹಜ್ಯಾ ಜಿವಿತಾಂತ್
ಫಕತ್ ಏಕ್ ಮಿರ್‍ಗಾಜಳ್ ಜಾವ್ನ್!
-ಸುನಿಲ್ ಫೆರ್ನಾಂಡಿಸ್, ಕೋಟ