ಸಂಪಾದಕೀಯ್:
ರೂಚ್ ದಿಂವ್ಚ್ಯಾ ಮಿಟಾಚೆಂ ಅಸ್ತಿತ್ವ್ ಖಂಯ್ಸರ್ ಆನಿ ಕಿತೆಂ?
ಜಾಯ್ತೆ ಮನೀಸ್ ಆಪ್ಣಾಚೆಂ ಅಸ್ಥಿತ್ವ್ ಖಂಯ್ ಥಾವ್ನ್ ಮ್ಹಳ್ಳೆಂ ಚಿಂತುಂಕ್ ವಚನಾಸ್ತಾಂ ಉಡ್ಕಾಣಾಂ ಮಾರುನ್ ಆಸ್ತಾತ್. ಅಶೆಂ ಕೊಣ್ ಚಿಂತ್ತಾತ್, ತೆ ಆಪ್ಲ್ಯಾ ಜಲ್ಮ್-ದಾತಾರಾಂಕ್ ಮರ್ಯಾದ್ ದೀನಾಂತ್. ಆಪ್ಣಾಚೆಂ ವ್ಯಕ್ತಿತ್ವ್ ರುತಾ ಕೆಲ್ಲ್ಯಾ ಶಿಕ್ಷಕಾಂಕ್ ವೊಳ್ಕುಂಕ್ ಪಾವನಾಂತ್. ಜಿವಿತಾಚ್ಯಾ ವೆವೆಗ್ಳ್ಯಾ ಪಾಂವ್ಡ್ಯಾಂನಿ ಆಪ್ಣಾಚ್ಯಾ ವ್ಯಕ್ತಿತ್ವಾಚ್ಯಾ ತಳ್ಯಾಕ್ ಥೆಂಬೆ ಥೆಂಬೆ ವೊತಲ್ಲ್ಯಾ ಖಂಯ್ಚ್ಯಾಯ್ ಪಾವ್ಳ್ಯಾಂಕ್ ಸಮ್ಜುಂಕ್ ಸಕನಾಂತ್.
ತಸಲ್ಯಾ ಎಕಾ ಚಿಂತ್ಪಾಚೆರ್ ಲ್ಯಾನ್ಸಿ ಪಿಂಟೊ ನಾಯಕಾಚಿ ಹಿ ಕವಿತಾ ವಾಚಿಜಾಯ್. ಮೀಟ್ ಸಗ್ಳ್ಯಾಂಚೆ ರುಚಿಂಚೆಂ ಕಾರಣ್ ಜಾಂವ್ಕ್ ಪುರೊ. ಪುಣ್ ಮಿಟಾಕ್ ಕೊಣ್ ರೂಚ್ ದೀವ್ನ್ ಆಸಾ? ದರ್ಯಾ ನಾತಲ್ಲೊ ತರ್, ಮಿಟಾಚ್ಯಾ ಅಸ್ತಿತ್ವಾಚೆಂ ಕಿತೆಂ? ಮನ್ಶಕ್ ರುಚಿಚಿ ಮರ್ಜಿ ನಾತಲ್ಲಿ ತರ್ ಮಿಟಾಚ್ಯಾ ಅಸ್ತಿತ್ವಾಚೆಂ ಕಿತೆಂ?
ಹ್ಯಾ ಆನಿ ಜಾಯ್ತ್ಯಾ ಹೆರ್ ಸವಾಲಾಂಕ್ ಜಾಪಿ ಸೊಧ್ಚೆಂ ಪ್ರೇತನ್ ಹೆ ಕವಿತೆಂತ್ ಲ್ಯಾನ್ಸಿನ್ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಿಟಾ ಕಣಾಂಚೆಂ ಝಗ್ಡೆಂ
ಮಿಟಾ ಕಣಾಂಚಿ ಜಮಾತ್ ಚಲ್ಲಿ,
ಸರ್ವ್ ಮಿಟಾಂ ಎಕ್ಟಾಂಯ್ ಜಾಲ್ಲಿಂ.
ಗೆಟೆ ಮೀಟ್, ಖಡೆ ಮೀಟ್
ಧವೆಂ ಮೀಟ್, ಮೆಜಾ ಮೀಟ್,
ಗರ್ವಾನ್ ಭರಲ್ಲೆಂ ಟಾಟಾ ಮೀಟ್,
ಆಪುಣ್ ಧವೆಂ.... ಐಯೊಡೈಜ್,
ಮನ್ಶಾಕ್ ಭಲಾಯ್ಕೆಚೊ ವಯ್ಜ್,
ರುಚಿಕ್ ಸರ್ವಾಂನಿ ದಾಢ್ ಘಾಲ್ಲಿ.
ಮನ್ಶಾ ಜಿಬೆನ್ ಸಯ್ ಘಾಲ್ಲಿ.
ಖಡ್ಯಾ ಮಿಟಾಕ್ ದುಬಾವ್ ಘುಸ್ಲೊ,
"ದರ್ಯೊ ಸುಕ್ಲ್ಯಾರ್ ಕರ್‍ಚೆಂ ಕಿತೆಂ?
ಜಿಣಿ ಜಾತಲಿ ಆಮ್ಚಿ ರಿತೆಂ!"
ಭಿರಾಂತ್ ಆನಿ ಆಶಾ ಘುಸ್ಲಿ,
ಸರ್ವ್ ಮಿಟಾಂಚಿ ಬೊಲ್ತಿ ಬಂಧ್.
ಜಶೆಂ ಸರ್ವ್ “ಬಿಪಿ”ಚೆ ಸಂಬಂಧ್.
ಮೀಟ್ ಆಸ್ಚೆಂ ರುಚಿಕ್,
ಮೂಳ್ ಆಮ್ಚೆಂ ದರ್ಯಾಂತ್.
ದರ್ಯೊ ಉರ್‍ತಲೊ ಸರ್ವಾಂಕ್,
ಮನ್ಶಾಕೂಳ್ ಮರ್‍ತಾ ಪರ್ಯಾಂತ್.
ಜಶೆಂ ಸುರ್ಯೊ ಆಸ್ತಾ ಪರ್ಯಾಂತ್
ಖಾಣಾಂ-ಪಕ್ವನಾಂಕ್ ಸದಾಂ ಜಾಯ್,
ಖಾತಲ್ಯಾಂಕ್ ಮೀಟ್ ರುಚಿಚೊ ರಾಯ್.
ಆತಾಂ ಸವಾಲ್ ರೂಚ್ ಕೊಣಾಚಿ?
ರಾಂದ್ಚ್ಯಾ ರಾಂದ್ಪಾಚಿ, ಖಾಂವ್ಚೆ ಜಿಬೆಚಿ?
ರಾಂದಲ್ಲೆಂ ಖೆಲಾಂ, ಭುಕೆಲ್ಲ್ಯಾ ಪೊಟಾಂನಿ,
ಖುಶಿ ಭೊಗ್ಲ್ಯಾ ದಾಧೊಶಿ ಮನಾಂನಿ,
ಕೊಣೆಂ ರಾಂದ್ಲಾಂ? ಕೊಣೆಂ ಮೀಟ್ ಘಾಲಾಂ?
ಕೊಣಾಕ್ ಜಾಯ್ ಚಿಂತುಂಕ್?
ದಾಧೊಶಿ ಜಾತಾನಾ ಆಪ್ಲೆಂ ಪೊಟ್,
ರಾಂದಲ್ಲ್ಯಾಕ್, ಮೀಟಾಕ್ ಫಕತ್ ಖೊಟ್ .
ಮನ್ಶಾ ದಾಧೊಸ್ಕಾಯೆಕ್ ದರ್ಯೊ ರಚ್ಲಾ
ಆಪುಣ್ ಏಕ್ ಮಿಟಾಕಣ್.
ದರ್ಯೊ ಆಸಲ್ಲ್ಯಾನ್ ಆಪುಣ್ ಜಣ್
ಆಪುಣ್ ಉಡಲ್ಲ್ಯಾನ್ ಜಾಯ್ನಾ ದರ್ಯೊ.
ರುಚಿ ಆಸ್ಚ್ಯೊ ಮನ್ಶಾ ಮರ್ಜೆಕ್,
ರೂಚ್ ಭೊಗ್ಚೆಂ ಮನ್ಶಾ ಗರ್ಜೆಂತ್.
ಭುಕೆಲ್ಲ್ಯಾಂಕ್ ಖಾಣ್ ಜಾತಾ ಋಣಿ,
ಭುಕೆತಾನಾ ಪಳೆಯ್ನಾ, ಮೀಟ್ ಕೊಣೀ.
ದರ್ಯೊ ಆಸಲ್ಲ್ಯಾನ್ ಮೀಟ್ ಆಸಾ,
ಮಿಟಾಕ್ ಕಿತೆಂ ಅಸ್ಥಿತ್ವ್ ಆಸಾ?
ಖಾತಲೆ ತೆ ಮರ್ಜೆನ್ ಖಾಂವ್ದಿ
ಮೀಟ್ ಸದಾಂ ಆಮರ್ ಜಾಂವ್ದಿ.
ರೂಚ್ ಸುಕ್ತಾನಾ ಉಗ್ಡಾಸ್ ಕಾಡ್ತಲೆ,
ಮಿಟಾಕ್ ಆಪ್ಲೆ ಬಗ್ಲೆಕ್ ಘೆತಲೆ.
ದಾಧೊಶಿ ಕರ್‍ಚೆಂ ದೆವಾ ಧರ್ಮ್
ಆಶೆಂವ್ಚೆಂ ಸದಾಂ ಮನ್ಶಾ ಕರ್ಮ್.
- ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್.
संपादकीय:
रूच दिंवच्या मिटाचें अस्तित्व खंयसर आनी कितें?
जायते मनीस आपणाचें अस्थित्व खंय थावन म्हळ्ळें चिंतूंक वचनास्तां उडकाणां मारून आसतात. अशें कोण चिंततात, ते आपल्या जल्म-दातारांक मर्याद दीनांत. आपणाचें व्यक्तित्व रुता केल्ल्या शिक्षकांक वोळकूंक पावनांत. जिविताच्या वेवेगळ्या पांवड्यांनी आपणाच्या व्यक्तित्वाच्या तळ्याक थेंबे थेंबे वोतल्ल्या खंयच्याय पावळ्यांक समजूंक सकनांत.
तसल्या एका चिंतपाचेर लॅन्सी पिंटो नायकाची ही कविता वाचिजाय. मीट सगळ्यांचे रुचिंचें कारण जावंक पुरो. पुण मिटाक कोण रूच दीवन आसा? दर्या नातल्लो तर, मिटाच्या अस्तित्वाचें कितें? मनशक रुचिची मर्जी नातल्ली तर मिटाच्या अस्तित्वाचें कितें?
ह्या आनी जायत्या हेर सवालांक जापी सोधचें प्रेतन हे कवितेंत लॅन्सीन केलां.
-मेल्विन रोड्रीगस
कविता:
मिटा कणांचें झगडें
मिटा कणांची जमात चल्ली,
सर्व मिटां एकटांय जाल्लीं.
गेटे मीट, खडे मीट
धवें मीट, मेजा मीट,
गर्वान भरल्लें टाटा मीट,
आपुण धवें.... ऐयोडैज,
मनशाक भलायकेचो वयज,
रुचीक सरवांनी दाढ घाल्ली.
मनशा जिबेन सय घाल्ली.
खड्या मिटाक दुबाव घुसलो,
"दऱ्यो सुकल्यार करचें कितें?
जिणी जातली आमची रितें"
भिरांत आनी आशा घुसली,
सर्व मिटांची बोलती बंध.
जशें सर्व "बिपी"चे संबंध.
मीट आसचें रुचीक,
मूळ आमचें दर्यांत.
दऱ्यो उरतलो सरवांक,
मनशाकूळ मरता पर्यांत.
जशें सुरयो आस्ता पर्यांत
खाणां-पकवनांक सदां जाय,
खातलयांक मीट रुचिचो राय.
आतां सवाल रूच कोणाची?
रांदच्या रांदपाची, खांवचे जिबेची?
रांदल्लें खेलां, भुकेल्ल्या पोटांनी,
खुशी भोगल्या दाधोशी मनांनी,
कोणें रांदलां? कोणें मीट घालां?
कोणाक जाय चिंतूंक?
दाधोशी जाताना आपलें पोट,
रांदल्ल्याक, मीटाक फकत खोट .
मनशा दाधोसकायेक दऱ्यो रचला
आपुण एक मिटाकण.
दऱ्यो आसल्ल्यान आपुण जण
आपुण उडल्ल्यान जायना दऱ्यो.
रुची आसच्यो मनशा मर्जेक,
रूच भोगचें मनशा गर्जेंत.
भुकेल्ल्यांक खाण जाता ऋणी,
भुकेताना पळेयना, मीट कोणी.
दऱ्यो आसल्ल्यान मीट आसा,
मिटाक कितें अस्थित्व आसा?
खातले ते मर्जेन खांवदी
मीट सदां आमर जांवदी.
रूच सुक्ताना उगडास काडतले,
मिटाक आपले बगलेक घेतले.
दाधोशी करचें देवा धर्म
आशेंवचें सदां मनशा कर्म.
- लॅन्सी पिंटो नायक, कुलशेकर.